JEREMIA 4 - BIBEL JAMITA NA DENGGAN

Pamioon tu haubaan ni roha

¹ Didok Tuhan, “O halak Israel, muda ra hamu mulak mangulahi, antong mulak ma hamu. Jolo parambungkon hamu ma angka gana-ganaan na Huhagigihon i, jana setia ma hamu tu Au,

² baru pe anso tola hamu marsumpa mangasahon goarKu. Jadi gabe pangidoon ni sandok bangso ma anso Hupasupasu halahi, jana pujion ni halahi ma Au.”

³ Didok Tuhan ma tu halak Juda dohot Jerusalem, “Karejohon hamu ma tanomunu na so dikarejohon dope; ulang sabur hamu same ditonga-tonga ni duri-duri.

⁴ Tiop ma janjimu dohot Au Tuhanmu, jana hapunjungkon ma dirimu di Au, ale halak Juda dohot Jerusalem. Muda nada, gilap ma murukKu jana manutungi songon api na so haintopan sanga na ise pe, hara ni sude angka parbuatanmunu na jahat i.”

Mangondam musu tu Juda

⁵ Palu hamu ma sarune di sude luat on! Tangkas ma marsurak jana marsora na gogo. Suru hamu ma halak Juda dohot Jerusalem marlojong tu angka kota na marbenteng.

⁶ Patuduhon ma dalan tu Sion, dolok ni Tuhan, ompoti hamu ma mangungsi, ulang ma marsidalian. Sian Utara diparo Tuhan hamamago dohot hasegoan.

⁷ Songon singa na ruar sian liang partabunian songon i ma panyego-nyego ni angka bangso na dung mardalan laho mangaroncohon Juda. Mamolngit noma i angka kota ni Juda dipadiar gabe lobu na so adong manginganisa.

⁸ Antong hara ni i, tangis jana mangandungi ma hamu, pake hamu ma abit goni tanda ni arsakmunu. Angke nada sumurut dope sian Juda muruk ni Tuhan na marnyala-nyala.

⁹ Didok Tuhan, “Anggo di ari i mandele ma angka raja dohot angka halak na marpangkat. Tarsonggot ma angka malim jana longang ma angka panurirang.”

¹⁰ Jadi hudok ma, “Tuhan Debata, madung dipaoto-oto Ho halak Jerusalem! Ho do mandok na giot adong ma dame, hape saonnari diondam podang do hosanami.”

¹¹ Di hatihana i dohonon ma tu bangso on dohot tu rayat ni Jerusalem: “Mangombus ma alogo na milas sian angka tor, na harsang di padang halongonan tu angka boru ni bangsongKu; nada na giot mamurpur sanga na paiaskon.”

¹² Tapi alogo na gogo na ro sian parentangKu do i, Au sandiri do saonnari na mandabu uhum tu halahi.

Juda dihobuk musu

¹³ Ligi da, marmuldopan musu i songon ombun. Angka kareta porangna i songon halingsungsung, angka kudona i humipas sian unggas rajawali. Marjaya ma hita on! Mago ma hita!

¹⁴ O Jerusalem, ambungkon ma hajahatan sian bagasan rohamu anso dipalua ho. Sadia honok nari angka pikiran na jahat i sai simpan-simpanonmu di bagasan rohamu?

¹⁵ Sian kota Dan, dohot sian Dolok Efraim madung marroan angka suruan na maroban barita na jat.

¹⁶ Laho paingotkon angka bangso do haroro ni halahi dohot paboahon tu halak Jerusalem na dung ro musu sian luat na dao. Marsurak-surak ma halahi mandok hata ni porang maradopkon angka kota ni Juda,

¹⁷ jana hobuhon ni halahi ma Jerusalem songon halak na manjago ladang. Patunda ni na mangalo ma Juda maradopkon Tuhan umbaen na tarjadi sudena i. Madung didok Tuhan songon i.

¹⁸ O Juda, na nialapanmu sandiri do hamagoan i tu ho. Parngoluonmu dohot angka parangemu do mambaen sude pardangolan i manyusuk tu ate-atemu.

Marsak si Jeremia pasari-sari bangso ni Debata

¹⁹ Iale hancit ni rohangkon, jana na dangol ma antong di au on. Nada be tarpompom au diringku gumadobur taroktokku, angke hubege do sarune mangkulingi, jana sora ni surak-surak porang marsaringari.

²⁰ Mardapot-dapot parmaraan i marroan mangaroncohon sude luat. Ompot ma bandarniba dirumpakkon, abitna i diparsibakkon.

²¹ Sadia honok nari paida-idaonku angka mandera ni porang i, dohot sora ni angka sarune?

²² Didok Tuhan do, “Na oto ma antong bangsongKi, nada ditanda halahi Au. Laing matua songon anak na bodo do halahi saotik pe nada bagi aha diboto; pistar do halahi anggo di hajahatan tapi nada malo di hadengganan.”

Parnidaan ni si Jeremia di haroro ni parmaraan

²³ Manaili ma au adop tano, rumar jana harsang idaon. Mandorgak au adop langit an, nada adong na marsinondang.

²⁴ Hutailihon angka dolok na gincat munggal-unggal maradu gogo.

²⁵ Huida nada adong jolma, unggas pe madung marhabangan sudena.

²⁶ Huligi ma, tano na napu hian madung jadi padang halongonan, jana angka kotana madung maronco di jolo ni Tuhan di jolo ni rimasNa na marjilam-jilam. (

²⁷ Pandok ni Tuhan angkon gabe padang halongonan do sude luat on, tapi nada segohononNia.)

²⁸ Hara ni i marsak ma portibi golap sajo ma langit i. Madung didok Tuhan i, jana indangkon na muba be sangkapNia. Madung dibaen Ia haputusanNia jana nada sumurut be Ia hum salangka.

²⁹ Habegean do gaor sora ni angka parangan na markudo dohot parsior, mambaen ganop halak marlojongi humosa-hosa; marmasuhan halahi tu harangan, tu dolok batu halahi manangkok. Angka kota maradu mamolngit, nada adong be na ra maringanan disi.

³⁰ O ale Jerusalem, madung maronco ho! Aha be gunana marbaju na saksak jana mamake barang sere dohot perak, dohot mangalapuhon colak di mata? Parcuma do dipajeges ho dirimu, angke nada tumbuk be ho di roha ni haholonganmu, mur halahi noma na giot mambuat hosamu.

³¹ Tarbege do tu au sora ni angguk-angguk songon sora ni ina na giot tubu-tubuan; songon dadaboru parsaurangan na manubuhon dakdanakna, songon i ma sora ni boru Sion mongkik-ongkik. Gapa-gapa tanganna i jana sai humolos-holos ia, “Marjaya ma au on – hona bunu au dibaen musu!”