JEREMIA 37 - BIBEL JAMITA NA DENGGAN

Pangidoan ni si Zedekia tu si Jeremia

¹ Di na dipecat ni si Nebukadnesar raja ni Babel i si Joyakin anak ni si Joyakim, diangkat ia ma si Zedekia anak ni si Josia gabe raja di Juda.

² Tapi si Zedekia pe maradu angka pagawenia dohot rayatna nada diihutkon halahi tona na dilehen ni Tuhan tu au.

³ Disuru si Zedekia ma si Jukal anak ni si Selemia, dohot Malim Zefanya anak ni si Maaseya mangidohon anso martangiang au tu Tuhan Debata salaho tu haporluan ni bangso i.

⁴ Nada dipamasuk dope au di hatiha i tu hurungan, jana laing bebas dope au mardalani di tonga-tonga ni rayat i.

⁵ Madung kehe tentara ni Mesir sian Mesir laho marporang. Umbege i, gabe mundur ma tentara ni Babel na manghobuk Jerusalem i.

⁶ Disuru Tuhan Debata ni Israel ma au

⁷ mandok tu si Zedekia songon on, “Anggo tentara ni Mesir na ro i laho tuson mangurupi ho, marbalik do i, jana mulak.

⁸ Jadi ro muse ma halak Babel mangulahi manyerang kota on lalu manaluhon dohot manyurbusa.

⁹ Au Tuhan Hupaingot hamu anso ulang paoto-oto hamu dirimunu marhite pikiran na mandok na so mulak be halak Babel i. Harana pasti do mulak halahi.

¹⁰ Haru pe umpamana ditaluhon hamu sude tentara ni Babel i lopus tading hum angka jolma na margasai di bagasan angka bandar ni halahi, laing jongjong do halahi manyurbu sude kota on.”

Tartangkup si Jeremia jana dihurung

¹¹ Sumurut ma tentara ni Babel sian Jerusalem hara ni na giot ro tentara ni Mesir manuju kota i.

¹² Gabe hutadingkon ma Jerusalem jana kehe ma au tu Luat Benyamin laho manjagit bagianku sian tean-teanan tanonami sapaneanan.

¹³ Tapi di na lalu au di Pintu Horbangan Benyamin, ditangkup komandan ni tentara na disi ma au jana didok ia, “Na giot lari do ho tu pihak ni halak Babel!” (Si Jeria do goar ni komandan i; anak ni si Selemia, pahompu ni si Hananya.)

¹⁴ Hualusi ma, “Nada tutu i! Nada adong maksudku laho kehe tu pihak ni musu i.” Tapi nada ditangihon si Jeria. Ditangkup ia do au jana dioban ia ma au mangadop tu jolo ni angka pajabat ni pamarenta.

¹⁵ Sun ma muruk ni halahi tu au jana diparentahon halahi anso dibalbali au jana dihurung di bagas ni si Jonathan, juru tulis ni bagas godang i. Gabe hurungan do dibaen bagas i.

¹⁶ Dipamasuk ma au tu bagasan sel di toru tano, lolot do au dihurung disi.

¹⁷ Dung i disuru Raja Zedekia ma halak maroban au mangadop tusia di bagas godang. Disi disapai ia ma au di sihabunian betak na adong tona sian Tuhan. “Adong,” ningku mangalusi, lalu hupaudut, “Pasahaton noma raja i tu raja ni Babel.”

¹⁸ Dung i husapai ma, “Aha dehe hajahatanku maradopkon raja i sanga maradopkon angka pagawe ni raja i sanga tu rayat, umbaen na jabat dipamasuk raja i au tu hurungan?

¹⁹ Di dia dehe angka panurirang ni raja i na mandok na so ro raja ni Babel manyerang raja i dohot luat on?

²⁰ Saonnari ale rajanami, raja na sangap, ditangihon raja i ma jolo pangidoankon. Ulang be ditongos raja au mulak tu hurungan na di bagas ni si Jonathan i, mate ma au lalu disi.”

²¹ Jadi gabe diparentahon Raja Zedekia ma anso dihurung au di alaman ni bagas godang. Jadi disi ma au tinggal jana ganop ari dilehen do di au roti sian parmasahan ni roti lopus nada adong be roti di kota i.