JEREMIA 36 - BIBEL JAMITA NA DENGGAN

Disise si Barukh balunan ni pustaha di Bagas Ni Debata

¹ Di taon paopatkon dung si Joyakim anak ni si Josia gabe raja di Juda, didok Tuhan ma tu au,

² “Buat ma sude balunan ni karotes jana suratkon ma sude na dung Hutonahon tu ho salaho tu Israel dohot Juda, bope taringot tu sude bangso. Suratkon ma sude hata na Hudokkon i mamungka sian pangkataionKu na parjolo tu ho dompak Raja Josia mamarenta lalu tu sadari on.

³ Betak na ra do halak Juda mantak mambaen na jahat muda dibege halahi taringot tu sude parmaraan na giot dondonkononKu tu halahi. Jadi ampunanKu do dosa dohot hajahatan ni halahi.”

⁴ Jadi gabe hupio ma si Barukh anak ni si Neria jana hudiktehon ma tusia sude na nidok ni Tuhan tu au. Jadi disuratkon si Barukh ma sudena i tu karotes balunan i.

⁵ Dung i hudok ma parenta on tusia, “Nada dipatola be au masuk tu Bagas Ni Debata.

⁶ Tapi sanoli on muda hatiha puaso halak, angkon kehe do ho tusi jana siseonmu gogo sude na hudokkon i tuho, anso sude dibege halahi na nidok ni Tuhan tu au. Padalan ma i di inganan na tumbuk begeon ni sude halak tu ho, dohot tu halak Juda na marroan sian angka kota ni halahi be.

⁷ Betak na gabe martangiang do halahi tu Tuhan baenon ni i jana muba halahi sian angka parbuatan ni halahi na jahat i. Sun do muruk ni Tuhan tu halahi jana mangondam do tu halahi.”

⁸ Jadi disise si Barukh ma di Bagas Ni Tuhan hata na nidok ni Tuhan i hombar tu na hudok tusia.

⁹ Di bulan sambilan taon palimahon dung mamarenta si Joyakim raja ni Juda, puaso ma rayat anso maruli ibo ni roha sian Tuhan. Puaso do sude halak na maringanan di Jerusalem dohot angka halak na ro sian kota-kota na di Juda.

¹⁰ Jadi disise si Barukh ma sian balunan ni surat i sandok na dung huhatahon, jana sude do halak manangihon. Di bagasan Bagas Ni Tuhan do i dipatupa, di kantor ni si Gemaria, anak ni si Safan juru tulis ni raja i. Di alaman parginjang i do kantor i, di lambung ni dalan laho masuk tu Pintu Horbangan Baru na di Bagas Ni Tuhan.

Disise surat balunan i tu angka pajabat ni pamarenta

¹¹ Dibege si Mikaya anak ni si Gemarya jana pahompu ni si Safan do si Barukh na manyise hata ni Tuhan na sian surat balunan i.

¹² Dung i kehe ma ia tu bagas godang, tu kantor ni juru tulis ni raja. Topet do marrapot disi sude pajabat ni negara i. Disi do si Delaya anak ni si Semaya, si Elnatan anak ni si Akbor, si Gemarya anak ni si Safan, si Zedekia anak ni si Hananya, si Elisama sada halak jurutulis, dohot angka pajabat na asing i bage.

¹³ Dipaboa si Mikaya ma tu halahi sude na nisise ni si Barukh di Bagas Ni Tuhan i.

¹⁴ Dung i disuru angka pajabat i ma si Jehudi (i ma anak ni si Netanya, pahompu ni si Selemia, dohot anak mulak ni si Kusi) mandapotkon si Barukh mardongan parenta anso ro si Barukh tu halahi maroban surat balunan na nisisenia i. Jadi dioban si Barukh ma surat i.

¹⁵ “Pajuguk ma da,” ning halahi, “Sise ma jolo surat balunan i tu hami.” Dioloi si Barukh ma i.

¹⁶ Dung sidung disise ia, gabe mabiar ma halahi jana marsidokkon na sada tu donganna, “Angkon lapurkonon do on tu raja.”

¹⁷ Didok halahi ma tu si Barukh, “Paboa jolo tu hami, bia panyuratmu sudena on. Adong he si Jeremia paboahon on tu ho?”

¹⁸ “Tutu do, sude hata na tarsurat dison na didikte ni si Jeremia do tu au, jana husurat ma i dohot tinta di surat balunan on,” ning si Barukh mangalusi.

¹⁹ “Angkon martabuni noma ho dohot si Jeremia. Ulang jabat adong halak na umboto inganan partabunianmunu i,” ning halahi.

Ditutung raja i surat balunan i

²⁰ Dung i dibaen angka pajabat i ma surat balunan i di bilik ni si Elisama juru tulis i, lalu kehe ma halahi mandapotkon raja i jana dilapurkon halahi ma sudena.

²¹ Disuru raja i ma si Jehudi mangalap surat i. Dung dibuat ia sian bilik ni si Elisama, disise si Jehudi ma tu raja i dohot tu sude pajabat na marjongjongan humaliang raja i.

²² Bulan sambilan hatiha i jana topet do raja i hatiha juguk di jolo ni parapian di bagas godang musim ngalinia.

²³ Disi abis disise si Jehudi tolu tu opat baris, disibakkon raja i ma i dohot piso na menek jana diambungkon ia ma i tu api. Songon i ma dibaen ia torus lopus abis sude surat balunan i mosok.

^24-25 Haru pe gomos dipangido si Elnatan, si Delaya dohot si Gemarya anso ulang ditutung raja i surat balunan i, tapi nada ra ia manangihon halahi. Nada gabe mabiar sanga manyosal idaon raja i dohot angka parpangkat i umbege isi ni surat i.

²⁶ Mur disuru do tehe si Jerahmeel anak ni raja i rap dohot si Seraya anak ni si Asriel dohot si Selemia anak ni si Abdiel anso manangkup au dohot si Barukh juru tuliski. Tapi ditabunihon Tuhan hami.

²⁷ Dung ditutung Raja Joyakim, surat balunan na hudokkon i tu si Barukh, disuru Tuhan ma au

²⁸ mambuat karotes balunan na asing dohot manyuratkon sude na dung husuratkon i di surat balunan na parjolo i.

²⁹ Disuru Tuhan ma au mandok songon on tu raja i, “Madung ditutung ho surat balunan i, jana nada disapai ho tu si Jeremia sanga hara ni aha umbaen na disuratkon ia bahaso giot ro raja ni Babel mangaroncohon luat on lalu mamunu halakna dohot angka pahan-pahananna.

³⁰ Hara ni i Au Tuhan mandok tu ho ale Joyakim, sahalak pe sian pomparanmu nada adong be na mamarenta songon pomparan ni si Daud. Sampakkonon ma bangkemu tu balian, dipangan las ni ari di arian dohot ombun manyorop di bornginna.

³¹ UhumanKu noma pomparanmu dohot angka donganmu na marpangkat i hara ni angka dosa na nibaenmunu. ParoonKu ma tu hamu sandok bencana na Huondamkon tu hamu, angke nada diterge ho bope halak na maringanan di Jerusalem dohot Juda angka ancaman sian Au.”

³² Jadi hubuat ma karotes balunan na imbaru i jana hulehen ma tu si Barukh juru tuliski, lalu disuratkon ia ma sude na hudiktehon i tusia, i ma isi ni surat balunan na parjolo i ditamba deba nari tona na asing na songon i.