JEREMIA 35 - BIBEL JAMITA NA DENGGAN

Hasetiaon ni pinompar ni si Rekhab

¹ Di na gabe raja si Joyakim anak ni si Josia di Juda, didok Tuhan ma tu au,

² “Kehe ma ho manghobari dohot angka halak na sian horong ni si Rekhab. Oban ma halahi tu sada kamar na di bagasan BagasKu, jana parade ma anggur di halahi.”

³ Jadi kehe ma au mangalap sude na sian horong ni si Rekhab, i ma si Jaasanya (anak ni na margoar si Jeremia anak ni si Habasinya) rap dohot sude kahangginia maradu angka dakdanaknia halaklahi.

⁴ Huoban ma halahi tu Bagas Ni Tuhan tu bagasan ni bilik ni anak sisean ni Panurirang Hanan anak ni si Jigdalya. Di ginjang ni bilik ni si Maaseya anak ni si Salum panjago pintu i do parpayak ni bilik i, di lambung ni bilik ni angka pagawe na asing.

⁵ Dung i hupayakkon ma di jolo ni angka halak na sian horong ni si Rekhab i angka piala dohot panginuman na bubung marisi anggur. Jadi hudok ma tu halahi, “Hita inum ma da!”

⁶ Tapi dialusi halahi ma, “Nada hami inum anggur. Diorai ompunami si Jonadab anak ni si Rekhab do hami dohot pomparannami minum anggur. Salolot-lolotna do marlaku larangan i.

⁷ Nada tola hami marsuan-suanan, mambuka kobun anggur sanga marnampunahonsa. Salolot mangolu nada tola muse hami pajongjongkon bagas, tapi angkon torus do maringan di bagasan bandar, anso tarbaen hot hami maringanan di luat on songon halak sileban.

⁸ Sude na niparentahon ni si Jonadab tu hami, hami oloi do i. Salolot mangolu, nada minum anggur hami dohot angka dadaborunami, angka dakdanaknami halaklahi bope dadaboru.

^9-10 Nada pajongjong bagas hami baen inganannami tapi maringanan di bandar do hami. Nada adong muse kobun anggurnami, ladang sanga same ni gandum sisuanon. Pendekna, sandok na niparentahon ni ompunami si Jonadab i, hami oloi do i sudena.

¹¹ Tapi di na ro Raja Nebukadnesar mamorangi luat on, hami putuskon ma maporus sian tentara ni Babel dohot tentara ni Siria, jana mangungsi ma hami tu Jerusalem on. I ma dalanna umbaen na dison hami maringanan saonnari.”

^12-13 Dung i disuru Tuhan Na Markuaso i, Debata ni Israel ma au kehe mandapotkon halak Juda dohot Jerusalem lalu mandok tu halahi, “Au Tuhan, marsapa biasi nada ra hamu manangihon Au, jana nada ra hamu mangihutkon angka na Huparentahon.

¹⁴ Diorai si Jonadab do pomparannia ulang minum anggur, jana dioloi halahi do larangan i. Lopus tu sadari on sahalak pe nada adong sian halahi na minum anggur. Hape Au marpupu torus mangkuling tu hamu, jana nada ra hamu manangihon.

¹⁵ Torus do marpupu Husuru naposongKu, sude angka panurirang tu hamu, jana madung dipaingot halahi hamu laho padenggankon pangalahomunu jana anso mantak hamu mambaen jahat. Dipaingot halahi do hamu anso ulang mamele tu angka debata jana anso ulang mangoloi tu halahi, anso tarbaen hamu torus maringanan di luat na dung Hulehen on tu hamu dohot tu ompumunu. Hape nada ra hamu mamparrohahon jana nada ra hamu manangihon.

¹⁶ Pomparan ni si Jonadab patu do mangoloi parenta ni ompu na umporpar halahi, hape anggo hamu nada ra mangoloi tu Au.

¹⁷ Hara ni i, Au Tuhan Na Markuaso, Debata ni Israel, paroonKu ma tu hamu halak Juda dohot Jerusalem – sandok parmaraan na giot dondonkononKu tu hamu, songon na dung Hudokkon i. Hubaen pe sudena i, hara ni na so ra do hamu manangihon muda mangkuling Au tu hamu jana nada ra hamu mangalusi di na pio-pio Au tu hamu.”

¹⁸ Dung i hudok ma tu angka halak na sian horong ni si Rekhab bahaso na nidok ni Tuhan Na Markuaso i, Debata ni Israel songon on, “Madung dioloi hamu ompumunu si Jonadab; sude parentania dioloi jana didalankon hamu do.

¹⁹ Jadi hara ni i, Au Tuhan Na Markuaso, Debata ni Israel, marjanji Au bahaso sian pomparan ni si Jonadab anak ni si Rekhab, angkon sai adong do halaklahi na mangoloi Au salolotna.”