JEREMIA 34 - BIBEL JAMITA NA DENGGAN

Tona tu si Zedekia

¹ Di na ro si Nebukadnesar raja ni Babel rap dohot angka paranganna na nitambaan ni angka tentara na sian sude bangso dohot harajaan na tunduk tusia mamorangi Jerusalem dohot angka kota na humaliangna, mangkuling ma Tuhan tu au.

² Disuru Ia ma au kehe tu si Zedekia raja ni Juda mandok songon on, “Au Tuhan Debata ni Israel, giot pasahatonKu kota on tu raja ni Babel jana surbuonnia noma i lopus abis.

³ Nada tarbaen ho malua, tapi tartangkup ma ho jana pasahaton tusia. Marsuo ma ho tusia jana manghatai sandiri dohot ia, dung i kehe ma ho tu Babel.

⁴ Tapi tangihon ma hatangKon salaho tu ho, ale Zedekia! Nada mate ho di partempuran,

⁵ tapi sonang do parmatemu. Jana songon na somal ditutung rayat i hamonyan di na manguburkon angka ompumunu na mamarenta di jolomu, laing songon i ma baenon ni rayat i tutungonna hamonyan di ho. Marsiluluton ma halahi jana dokkononna, ‘Iale! Nada adong be hape rajanami!’ Au Tuhan, madung mandok songon i.”

⁶ Jadi hupalalu ma tona ni Tuhan i tu Raja Zedekia di Jerusalem

⁷ di na ro parangan ni raja Babel manyaroso kota i. Diserang halahi muse do kota Lakis dohot Aseka, angke i noma kota na laing marbenteng di Juda.

Pangalaho na so patut tu angka hatoban

⁸ Mambaen parjanjian ma Raja Zedekia dohot halak na maringanan di Jerusalem laho paluahon

⁹ angka hatoban halak Ibrani na adong di halahi, halaklahi sanga dadaboru anso ulang adong sahalak pe sian halak Israel na marhatobankon dongan sabangsona.

¹⁰ Sude rayat dohot angka pajabat ni pamarenta na dohot di parjanjian laho paluahon angka hatoban ni halahi jana nada be parhatobanon ni halahi mangulahi, paluaon ni halahi ma tutu situtu angka hatoban ni halahi i.

¹¹ Hape marbalik ma muse roha ni halahi, dibuati halahi mangulahi angka hatoban i jana dipaksa halahi gabe hatoban mangulahi.

¹² Jadi hara ni i ro ma Tuhan,

¹³ Debata ni Israel marsuru au mandok tu angka jolma songon on, “Di na Huoban ompungmunu haruar sian Mesir jana Hupalua sian parhatobanon, na dung Hubaen do parjanjian dohot halahi.

¹⁴ Hudok do disi, angkon paluaon do di taon papituhon sandok hatoban sian halak Ibrani na dung mangoloi gok onom taon. Tapi nada ra ompumunu i mamparrohahon sanga manangihon sanga aha na Hudokkon i.

¹⁵ Piga-piga ari na dung salpu dipauba hamu do pangalahomunu jana dibaen hamu jop ni rohangKu. Satuju do hamu sude laho paluahon angka hatoban sian donganmunu sabangso jana dibaen hamu do parjanjian i rap dohot Au di bagasan BagasKu.

¹⁶ Hape dung salpu i gabe muba rohamunu jana mangalayasi goarKu. Dibuat hamu jana dipaksa hamu gabe hatoban mangulahi angka hatoban na dung nipaluamunu hombar tu pangidoan ni roha ni halahi.

¹⁷ Hara ni i Au Tuhan mandok, anggo hamu madung mangalaosi tu parentangKu; nada dipalua hamu dongan sabangsomunu Israel. Antong saonnari Hulehen ma hamu bebas mamili: Bebas laho mate di partempuran, mate dibaen nyae masa, sanga mate tangkuraparon. Giot baenonKu mabiar bangso na satano on mida sipamasaonKu tu hamu.

^18-19 Madung mambaen parjanjian tu Au angka pangituai ni Juda dohot Jerusalem rap dohot angka pagawe ni bagas godang, angka malim dohot sandok pamimpinna. Disambol do lombu laho mangarasmihon parjanjian i, diponggol dua ma lombu i jana mamolus ma sian antara ni ponggolanna na dua i. Hape dilaosi halahi muse do parjanjian i jana nada digohi halahi angka saratna. Hara ni i baenonKu ma tu halahi songon na nibaen ni halahi tu lombu i.

²⁰ PasahatonKu ma halahi tu musu na giot mamatehon halahi. Papanganan ni unggas ma bangke ni halahi dohot angka binatang panyoro.

²¹ PasahatonKu ma si Zedekia raja ni Juda i dohot angka pagawena tu angka jolma na sai giot mamatehonsa. PasahatonKu ma halahi tu tentara ni Babel, na dung manadingkon hamu.

²² ParentahononKu ma anso mulak halahi tu kota on, jadi serangon ni halahi ma, masuhanna lalu surbuonna. Giot baenonKu angka kota ni Juda songon halongonan na so diingani ni jolma. Au Tuhan, madung mandok songon i.”