JEREMIA 30 - BIBEL JAMITA NA DENGGAN

Janji ni Tuhan tu bangsoNia

¹ Hata ni Tuhan na ro tu si Jeremia.

² Songon on ma didok Tuhan, Debata ni Israel, “Suratkon ma sude hata na dung Hudokkon i tu ho, tu bagasan buku.

³ Angke dapot do muse hatihana pasuangonKu mangulahi bangsongKu Israel dohot Juda; obanonKu do halahi mangulahi mulak tu tano na dung Hulehen tu ompu ni halahi. Halahi noma nampuna tano i mangulahi. Au Tuhan, madung mandok songon i.”

⁴ Didok Tuhan do tu halak Israel dohot Juda,

⁵ “Madung Hubege parngair ni halak na humitir, angka sora ni halak na mabiar jana nada adong dame taringot tu hadamean.

⁶ Uji hamu ma jolo mamikiri dohot pamanatkon! Tarbaen ma he halaklahi manubuhon dakdanak? Antong anggo songon i, biasi Huida ganop halaklahi marbohi na langan boti jana maniop butuhana dohot tanganna songon dadaboru na giot manubuhon anakna?

⁷ Madung dapot ari na jorbut, ari na so adong tudosanna. Anggo di bangsongKi ari i ma na mambaen sak ni roha; tapi paluaonKu do halahi.”

⁸ Didok Tuhan Na Markuaso i do, “Muda dung dapot ari i, tipulkononKu ma auga na dibaen tu tangkuhuk ni halahi i jana rante ni halahi Hutalduskon. Nada be gabe hatoban ni halak na asing halahi.

⁹ Mangoloi noma halahi tu Au Tuhan Debata ni halahi, dohot tu sada halak sian pomparan ni si Daud na giot angkatonKu gabe raja.

¹⁰ O hamu bangsongKu, ulang be mabiar hamu! halak Israel, ulang humitir hamu! PaluaonKu ma hamu sian tano na dao, inganan pambuanganmunu. Mulak noma hamu jana di bagasan dame mangolu. Aman noma ngolumunu nada adong be sihabiaranmunu.

¹¹ Angke dongananKu do ho ninna Tuhan, anso Hupalua ho: PangabisonKu ma angka bangso inganan parserahanmunui, tapi anggo ho nada pangabisonKu. AjaranKu ma ho di bagasan uhum; jana nada dohononKu ho na so marsala.”

¹² Satutuna, songon on do didok Tuhan: “Santak do hancit ni nyaemu, nada tarpamalum bugangmu.

¹³ Sahalak pe nada adong na ra pature ho nada adong ubat ni angka baromu nada adong be arop ni roha hamamalummu.

¹⁴ Sude haholonganmu, madung lupa tu ho; nada ra be halahi mamikirkon ho. Songon musu, Au giot mangaroro jana manguhumi hamu maradu gogo hara ni bahat ni dosamu jana godang hasalaanmu.

¹⁵ Ulang be humolos hara ni angka bugangmu angke na so siaropon ni roha be ho malum. Songon i ma baenonKu hona uhum hamu hara ni bahat ni dosamu dohot godang hasalaanmu.

¹⁶ Tapi saonnari, hona bondut ma sude na mamondut hamu jana obanon ma tu habuangan sude musumunu. TindosanKu ma na manindos ho samunonKu ma na manyamun ho.

¹⁷ Haru pe didok musumu, ‘Madung tarbuang Sion, jana nada adong na marnidasa,’ baenonKu horas hamu mangulahi, jana angka bugangmu Huubati.”

¹⁸ Songon on ma hata ni Tuhan, “Satutuna, mulak ma obanonKu angka na tarbuang sian parbandaran ni si Jakob. Jana marpangulahi rohangKu mida angka ingananna; jana angkon paulion mangulahi kota i di gincat ni roncoanna hian, jana bagas godang i angkon jongjong di ingananna hian.

¹⁹ Pujion ni halak na disi ma Au marhite ende marsurak-surak ma halahi marriang-riang be. Martamba ma bahat ni halahi hara ni pasupasungKu marsangap ma halahi hara ni pangalehenKu.

²⁰ Angka anak ni halahi angkon songon di mulana, jana parlagutan ni halahi angkon marbungaran salolot ni lolotna di jolongKu. UhumonKu ma sude halak na mamparhanciti halahi.

^21-22 Raja na marasal sian hamu mamarenta di tonga-tongamunu. Roha-rohania do mandonohi Au muda Hupio ia mangadop tu Au. Angke ise ma he na puluk ro mangadop tu Au sian roha-rohana sajo? Gabe bangsongKu ma hamu jana Au gabe Debatamunu. Au do Tuhan, na mandokkon songon i.”

^23-24 Tudos tu bade do muruk ni Tuhan, songon halingsungsung na mangamuk mangalapat ulu ni angka jolma parjahat, jana nada mombun painte so tulus sude sangkapNia. Di pudi ni ari pe anso botoon ni bangsoNia na songon i.