JEREMIA 29 - BIBEL JAMITA NA DENGGAN

Surat ni si Jeremia tu halak Jahudi na di Babel

¹ Hubaen ma surat tu angka malim, angka panurirang, angka pamimpin ni rayat, dohot tu sude halak na asing na dioban ni si Nebukadnesar sian Jerusalem tu Babel.

² Hubaen surat i dung dioban tu habuangan Raja Joyakin, inangna, angka pagawe ni bagas godang, angka pamimpin ni Juda dohot Jerusalem, angka tukang na malo dohot angka parkarejo na pande.

³ Hupaobankon ma surat i tu si Elasa anak ni si Safan, dohot si Gemaria anak ni si Hilkia na nisuru ni si Zedekia raja ni Juda tu si Nebukadnesar raja ni Babel. Songon on ma hata ni surat i,

⁴ “Songon on do pandok ni Tuhan Na Markuaso i, Debata ni Israel tu sude halak na tarbuang sian Jerusalem tu Babel:

⁵ ‘Hot ma hamu maringanan disi. Pajongjong hamu ma angka bagasmunu, mambuka tano ma hamu jana dai hamu ma suhana.

⁶ Mambuat boru ma hamu, anso adong dakdanakmunu, jana angka dakdanakmunu pe padiar hamu ma marripe be anso adong muse dakdanak ni halahi. Angkon martamba do bilanganmunu, jana nada tola mur murak.

⁷ Markarejo ma hamu anso dumpang hasonangan di angka kota habuanganmunu. Tangiangkon hamu ma tu au salaho tu haporluan ni angka kota i, angke muda masonang kota i laing masonang muse do dohot hamu.

⁸ Au Tuhan Na Markuaso, Debata ni Israel, Hupaingot hamu anso ulang dipaoto-oto angka panurirang na maringanan di tonga-tongamunu i hamu, sanga ise pe tehe na mangoku bahaso na malo halahi mangalehen alatan taringot tu hatiha na giot ro. Ulang parrohahon hamu angka nipi ni halahi.

⁹ GoarKu pe dipake halahi do laho mancaritohon tu hamu angka pangalaho na so tutu. Nada Au marsuru halahi. Au Tuhan madung mandok songon i.’

¹⁰ Didok Tuhan muse, ‘Muda dung dapot hatihana sipitu pulu taon di Babel, parrohahononKu ma hamu mangulahi jana patulusonKu ma na Hujanjihon laho paulakkon hamu mangulahi tu inganan on.

¹¹ Nada he Au sandiri mamboto angka sangkapKu taringot tu hamu? Nada na giot mangago hamu angka sangkap i; tapi na giot tu hasonanganmunu do i dohot mangalehen tu hamu arop ni roha na denggan di hatiha na ro.

¹² Jadi mangido tolong ma hamu tu Au, jana alusanKu ma tangiangmunu.

¹³ Jalahanmunu ma Au, jana dumpang hamu, dibaen sian sude rohamunu noma jalahanmunu Au.

¹⁴ Tutu do, dumpang hamu ma Au. Palagut-lagutonKu ma hamu sian tonga-tonga ni sandok bangso sian ganop luat inganan parserahanmunu dohot habuanganmunu. ObanonKu ma hamu tu tano asalmunu on jana pasuangonKu pangalahomunu. Au Tuhan, madung mandok songon i.’

¹⁵ Mangihutkon pandokmunu, madung dilehen Tuhan tu hamu angka panurirang di Babel.

¹⁶ Tangihon hamu ma pandok ni Tuhan salaho tu raja pomparan ni si Daud, dohot taringot tu halak na maringanan di kota on, i ma angka koum sisolkotmunu na so dohot dioban tu habuangan rap dohot hamu.

¹⁷ Didok Tuhan Na Markuaso i do, ‘ParoonKu ma parporangan, tangkuraparon dohot nyae masa tu halahi; giot baenonKu halahi songon batu ni ara na santak busuk na so tarpangan.

¹⁸ Kojar-kojaronKu halahi marhite porang, tangkuraparon, dohot nyae masa lopus jorbut pangkilalaan ni sude bangso na satano on marnida na masa tu halahi. Siincak-incahan noma halahi jana goar ni halahi gabe songon bura.

¹⁹ Tarjadi pe sudena i tu halahi hara ni na so ra do halahi mangihutkon tonangKu na sai torus Hupalalu tu halahi marhite angka panurirang, i ma angka naposongKi. Nada ra halahi mamparrohahon tonangKi.

²⁰ Jana hamu sude na Hubuang tu Babel, tangihon hamu ma na Hudok, Au Tuhan na mandok.’

²¹ Madung didok Tuhan Na Markuaso i Debata ni Israel taringot tu si Ahab anak ni si Kolaya, dohot taringot tu si Zedekia anak ni si Maaseya na mamake goar ni Tuhan laho palaluhon tu hamu angka pangalaho na so tutu. Didok Tuhan do na giot pasahatonNia halahi tu toru ni kuaso ni si Nebukadnesar raja ni Babel, na giot mamunu halahi di jolo ni matamunu.

²² Jadi muda adong halak na dioban tu Babel na giot mamurai sada-sada halak, dokkonon ni halahi ma, ‘Sai dibaen Tuhan ma ho nian songon si Zedekia dohot si Ahab na nitutung ni raja Babel mangolu-olu.’

²³ Songon i ma bagian ni halahi hara ni na dung mambaen angka dosa na godang di Israel; marmainan halahi jana dipake halahi goar ni Tuhan laho mancaritohon angka pangalaho na so tutu. Maralo do na songon i tu hagiot ni Tuhan, diboto Ia do sanga aha na nibaen ni halahi, jana Ia sandiri saksina laho mangalo halahi. Madung didok Tuhan songon i.”

Surat tu si Semaya

^24-25 Tuhan Na Markuaso i, Debata ni Israel mangalehen tona sipasahatonku tu si Semaya halak Nehelam, hara ni na dung ditongos ia surat mamake goarnia sandiri tu sude halak na maringanan di Jerusalem, tu Malim Zepanya anak ni si Maaseya dohot tu angka malim na asing. Songon on dibaen si Semaya di bagasan surat i tu si Zepanya:

²⁶ “Madung diangkat Tuhan ho gabe malim manggontihon si Joyada, jana ho noma saonnari na gumincat pangkatna di Bagas Ni Tuhan. On do karejomu: Mamarentahon anso dibaen rante bosi tu rungkung ni sandok halak na rintik na mandok dirina panurirang.

²⁷ Hape biasi nada dibaen ho songon i tu si Jeremia halak Anatot i, na pamalo-malohon mambaen dirina songon panurirang di tonga-tonga ni bangsonta?

²⁸ Angkon sumpolon do pamangan ni bayo i, harana didokkon ia honok dope angka halak hita na adong di Babel maringanan disi. Jana hara ni i, pandoknia, angkon pajongjongon ni halahi dope bagas lalu mambuka ladang dohot mandai suhana.”

²⁹ Dipasisehon Malim Zepanya do surat i tu au.

³⁰ Jadi gabe disuru Tuhan au

^31-32 manongos barita taringot tu si Semaya tu sude halak na dibuang di Babel. Songon on ma barita i, “Au Tuhan, uhumonKu ma si Semaya dohot sude pomparanna. Nada Au marsuru ia, hape mandok hata ia tu hamu songon na tutu ia panurirang; jana dibaen ia hamu porsaya tu angka pangalaho na so tutu. Sahalak pe sian pomparannia nada tola be tinggal di tonga-tongamunu. Hara ni na disuru si Semaya hamu mangalo Au, jadi nada honok ia mangolu laho paida-ida angka na denggan na giot patupaonKu di sude bangsongKu. Au Tuhan, madung mandok songon i.”