JEREMIA 25 - BIBEL JAMITA NA DENGGAN

Tarbuang bangso Juda tu Babel pitu pulu taon honokna

¹ Di taon paopatkon dung gabe raja ni Juda si Joyakim anak ni si Josia, dapot au ma tona sian Tuhan taringot tu sude bangso Juda. Taon parjolo ma hatiha i dung gabe raja si Nebukadnesar di Babel.

² Hudok ma tu sude bangso Juda dohot halak na maringanan di Jerusalem,

³ “Mamungka sian taon patolu bolaskon dung mamarenta si Josia anak ni si Amon, raja di Juda, lopus tu sadari on, jadi madung dua pulu tolu taon honokna, hata ni Debata dipalalu tu au, jana nada unjung lupa au palaluhon hata i tu hamu, tapi nada ra hamu manangihonsa.

⁴ Nada ra hamu manangihon sanga mamparrohahon, haru pe nian marpupu disuru Tuhan tu hamu angka panurirang, angka naposoNia.

⁵ Disuru halahi do hamu manadingkon parngoluonmunu na jahat i dohot angka parbuatanmunu na gok dosa i anso tarbaen hamu hot maringanan di tano pusako na nilehen ni Tuhan tu hamu dohot tu angka ompumunu songon tano pusako.

⁶ Diorai angka panurirang do hamu mamele dohot mangoloi tu angka debata. Diorai halahi do hamu marsomba gana-ganaan na nibaenmunu sandiri, angke na songoni do mambaen muruk Tuhan. Sugari diihutkon hamu parenta ni Tuhan i, nada hona uhumNia hamu.

⁷ Hape Tuhan i sandiri mandok na so ditangihon hamu do Ia. Mur dialap-alapi hamu muse do anso gilap murukNia hara ni angka gana-ganaanmunu i. Hamu sandiri do mangalap-alapi uhuman tu hamu.

⁸ Hara ni na so ra hamu manangihon hata na nidokNia, gabe didok Tuhan Na Markuaso i ma,

⁹ ‘PiohononKu ma sude bangso na sian Utara, songon i muse naposongKu si Nebukadnesar raja ni Babel. ArahononKu ma halahi marporang mangalo Juda dohot halakna i sude dohot bangso na humaliangsa. PatimpasonKu sude bangso on rap dohot angka bangso hombarna jana padiaronKu malala sapanjangna. Tarsonggot ma halak na midasa jana panyogiton. Au Tuhan, madung mandok songon i.

¹⁰ AntahonKu ma sian halahi sora na marriang-riang jana na marmoga-moga di pesta parbagason, sora ni batu panggilingan dohot torang ni lampu.

¹¹ PadiaronKu do sude luat on sego jana gabe lobu; mangoloi tu raja Babel ma angka bangso na humaliang pitu pulu taon honokna.

¹² Dung i uhumanKu ma bangso Babel dohot rajana i hara ni dosa ni halahi. RumpakkononKu ma luat i jana padiaronKu sego sapanjangna.

¹³ Giot uhumanKu Babel marhite sudena parmaraan na dung Husangkaphon maradopkon angka bangso di na mangkobari Au dohot si Jeremia – i ma sandok sangkap na tarsurat di bagasan buku on.

¹⁴ BalosonKu do angka parbuatan ni halak Babel i; parhatobanon ni angka raja-raja na godang ma halahi dohot angka bangso na bahat.’ ”

Tona ni Debata maradopkon angka bangso-bangso

¹⁵ Didok Tuhan, Debata ni Israel ma tu au, “Buat ma galas ni anggur on na dung Hugohi dohot hamumurukKu. Oban ma i tu sude bangso sanga na tu dia ho Husuru. Suru inum ma anggur on tu halahi;

¹⁶ muda diinum halahi anggur i, lenong ma halahi jana nada torang be rohana hara ni porang na Huparo tu halahi.”

¹⁷ Jadi hujagit ma piala ni anggur i sian tangan ni Tuhan, jana kehe ma au tu sandok bangso na nisuru ni Tuhan au tusi, lalu hupaksa halahi manginum.

¹⁸ Jerusalem dohot sude kota na di Juda, rap dohot raja-raja maradu angka pamimpinna, hupaksa inumonna anggur i, lopus gabe songon padang na harsang halahi jana songon parbeguan. Lalu tu sadari on dipake do goar ni halahi songon hata bura.

^19-26 Angka on ma goar-goar ni halak na deba nari na angkon minum sian piala ni anggur ni Tuhan i: raja ni Mesir rap dohot angka pagawe maradu angka pamimpinna; sude halak Mesir dohot halak sileban na adong di Mesir; sude raja na di tano Us; sude raja ni angka kota Pilistin di Askelon, Gasa, Ekron; sude halak na laing mangolu di Asdod; sude halak Edom, Moab dohot Amon; sude raja na di Tirus dohot Sidon; sude raja na di topi ni Laut Tonga; angka kota Dedan, Tema dohot Bus; sude halak na marpangkas pendek; sude raja ni Arab; sude raja ni angka marga na di padang halongonan; sude raja na di Zimri, Elam dohot Madai; sude raja na di Utara, na dao dohot na donok, pasada-sada. Sandok bangso na satano on angkon inumonna anggur i. Jana na parpudi situtu manginum anggur i, i ma raja ni Babel.

²⁷ Dung i didok Tuhan ma tu au, “Dokkon ma tu angka jolma i, bahaso Au Tuhan Na Markuaso, Debata ni Israel, marsuru halahi minum lopus mabuk jana muta-uta. Hubaen halahi tinggang jana nada lobassa be jongjong hara ni parporangan na Huparo tu halahi.

²⁸ Jana muda nada ra halahi manjagit piala i sian tanganmu laho manginum anggur i, dokkon ma na dung diparentahon ni Tuhan Na Markuaso i do songon i.

²⁹ PungkaonKu ma na mangaroncohon i sian kotangKi sandiri. Ulang jabat diambang halahi na so hona uhum be halahi. Angkon hona halahi, angke pamasaonKu ma porang tu sude bangso na adong di sandok portibi on. Au Tuhan, madung mandok songon i.”

³⁰ “Sude na Hupardokkoni i tu ho ale Jeremia, angkon palaluonmu do i. Dokkon tu halahi: ‘Mangaronggur do sora ni Tuhan sian banua ginjang; matuoror do Ia tu bangsoNia na mangalo i. Dibege halak na satano on do Ia manyonggak songon parkarejo na mamoro anggur di pangilangan.

³¹ Lalu tu ujung ni tano on marsaringar soraNia; dibaen Tuhan parkaro maradopkon angka bangso. Adilan noma sandok jolma jana halak na jahat niuhum mate noma.’ ”

³² Didok Tuhan Na Markuaso i ma, “Sian angka ujung ni tano on marngius-ngius alogo na gogo; pasada-sada hona bencana angka bangso.”

³³ Anggo di ari i marpayahan ma angka bangke ni jolma na nimatehon ni Tuhan di sude sisik ni tano on. Nada nitangisan halahi, nada dioban muse laho mananomsa, tapi dipadiar do i di tano i sajo songon parpunguan ni rompak.

³⁴ Hamu angka pamimpin, dohot angka parmahan ni bangso ni Tuhan! Pagogo hamu ma partangismunu! Margiling-giling ma hamu di abu, dibaen madung dapot hatihana bunuon hamu; sambolon ma hamu songon biri-biri na dibante.

³⁵ Jadi nada adong be haluan di angka parmahan, laing songon i muse do bope di angka pamimpin ni angka habanan.

^36-37 Humolos jana tangis hamu hara ni marsakna dibaen madung diabisi Tuhan bangsomunu jana dironcohon tanomunu na aman i.

³⁸ Madung ditadingkon Tuhan bangsoNia songon panadingkon ni singa di asarna. Madung muba luat on gabe halongonan dibaen hakejamon ni porang dohot hamuruhan ni Tuhan.