JEREMIA 24 - BIBEL JAMITA NA DENGGAN

Dua karanjang batu ni hayu Ara

¹ Sanoli dung dioban si Nebukadnesar raja ni Babel i si Joyakin anak ni si Joyakim raja ni Juda rap dohot angka pamimpin ni Juda, angka tukang na malo dohot angka parkarejo na pande jana dioban gabe taban sian Jerusalem tu Babel, dilehen Tuhan ma tu au sada parnidaan. Huida ma dua karanjang na marisi batu ni ara payak di jolo ni Bagas Ni Debata.

² Karanjang na sada marisi batu ni ara na jeges-jeges, songon patumonaan ni batu ni ara, tapi anggo karanjang na sada nari marisi batu ni ara na busuk-busuk do, gabe nada tarpangan.

³ Dung i didok Tuhan ma tu au, “Ale Jeremia, aha do diida ho?” “Batu ni ara do Tuhan,” ningku mangalusi. “Na jeges-jeges i, biama na lobi jeges, jana na busuk-busuk i bia ma na santak busuk gabe nada be tarpangan.”

⁴ Jadi gabe didok Tuhan ma,

⁵ “Angka halak na dung dioban i tu Babel Huetong do i songon batu ni ara na jeges-jeges on; jadi hara ni i, Au Tuhan, Debata ni Israel, giot denggan do baenonKu tu halahi.

⁶ JagohononKu do halahi jana obanonKu mangulahi tu luat on. BangunonKu do halahi, nada rumpakononKu; na manyuan do Au, nada mangumpat halahi.

⁷ LehenonKu ma tu halahi por ni roha laho mamboto bahaso Au do Tuhan. Jadi gabe bangsongKu ma halahi, jana Au gabe Debata ni halahi, angke mulak do halahi tu Au sian sandok rohana.

⁸ Tapi anggo si Zedekia raja ni Juda dohot angka bagian na mora-mora na rap dohot ia, dohot halak Jerusalem na teba na maringanan hot di luat on dohot na bungkas tu Mesir, baenonKu ma halahi songon batu ni ara na busuk-busuk on, na so tarpangan be. Au Tuhan madung mandok songon i.

⁹ Giot baenonKu ma halahi gabe marjaya, lopus gabe mabiar sandok bangso na adong di tano on. Sanga na di dia angkon Hupaserak halahi, siincak-incahan halahi, sipartataan jana sipargonjak-gonjakkonon. Songon hata bura do goar ni halahi.

¹⁰ ParoonKu tu halahi parporangan, tangkuraparon, dohot nyae masa lopus marmatean halahi sude jana umpe sada na tading di luat na dung Hulehen on tu halahi dohot ompu ni halahi.”