JEREMIA 23 - BIBEL JAMITA NA DENGGAN

Arop ni roha tu hatiha na ro

¹ Marmara ma baenon ni Debata angka pamimpin na mangago dohot na pasarsarkon bangsoNa.

² Songon on do pandok ni Tuhan, Debata ni Israel taringot tu angka pamimpin na paula-ula manjagohon bangsoNa, “Nada tutu dijagohon hamu bangsongKu, madung dipasarsar hamu halahi jana diayak-ayak hamu do halahini. UhumonKu ma hamunu saonnari hara ni pambaenanmunu na jahat i.

³ Tapi palagut-lagutonKu ma teba-teba ni bangsongKi sian angka luat inganan habuangan ni halahi. ObanonKu ma halahi mulak tu bona bulu ni halahi jana mur mabahat ma pomparan ni halahi.

⁴ AngkatonKu ma pamimpin na manyarihon halahi. Nada mabiar be bangsongKi sanga tarsonggot; sahalak pe nada tola mago sian halahi. Au Tuhan, madung mandok songon i.”

⁵ Didok Tuhan ma, “Dapot do i hatihana, patubuonKu ma di pomparan ni si Daud sada tunas na tigor. Marhite bisuk mamarenta raja i, jana patulusonna hatigoran dohot hatutuan di sandok luat.

⁶ Muda dung mamarenta ia, malua ma halak Juda jana Israel mangolu ma di bagasan sonang. Goaron ma raja i ‘Tuhan do hasintonganta.’

⁷ Harana songon on do didok Tuhan: Dapot do hatihana muse, nada be marsumpa halak marhite Au, Tuhan na mangolu na maroban halak Israel haruar sian Mesir,

⁸ tapi marsumpa ma halahi mangasahon Au, Tuhan na mangolu na maroban halak Israel ruar sian luat na di Utara, dohot sian sude luat na asing inganan na Hubaen paserakkon halahi. Maringanan di bona buluna sandiri noma halahi.”

Tona ni si Jeremia taringot tu angka panurirang

⁹ On ma tonangku taringot tu angka panurirang: Magopu ate-atengku jana humitir au, hara ni Tuhan dohot hataNa na badia i mambaen au gabe songon halak na mabuk na minum anggur mabahattu.

¹⁰ Gok luatta on dohot jolma na markarosuan. Jahat do parngoluon ni halahi jana disalagunahon halahi do jabatanna. Hara ni bura i gabe malos ma ruput na di padang-padang jana sude luat on marhamarsahan.

¹¹ Didok Tuhan, “Panurirang dohot malim nada ra mangoloi Au. Salang di bagasan bagasKu tardapot Au do halahi mambaen na jahat.

¹² Hara ni i, mangalandit jana manggolap noma dalan ni halahi lopus tartuktuk halahi jana tinggang. ParoonKu ma hamamago tu halahi, muda dung dapot hatihana laho manguhumi halahi. Au Tuhan, madung mandok songon i.

¹³ Madung Huida dosa ni angka panurirang ni Samaria. Mangasahon goar ni Baal do halahi mandok hata jana palilu-liluhon do tu bangsongKi.

¹⁴ Tapi madung Huida jumahat dope pangalaho ni angka panurirang di Jerusalem. Margabusi do halahi dohot marmainan jana diurupi halahi do halak na jahat, gabe umpe adong sahalak pe na ra pauba rohana. Anggo di Au mandosdos do halahi sudena rap parjahat songon halak Sodom dohot Gomora.”

¹⁵ Didok Tuhan Na Markuaso i ma, “Na giot lehenonKu ma tu halahi suan-suanan na paet sipanganonna dohot rasun siinumonna, angke patunda ni halahi ma umbaen na so dipasangap angka jolma na di luat on sudena Au.”

¹⁶ Tu halak Jerusalem, didok Tuhan Na Markuaso i ma, “Ulang patangi-tangi hamu hata na nidok ni angka panurirang na sai tongtong mangalehen arop ni roha na rumar. Tubu-tubu ni roha ni halahi sajo do na nipalalu ni halahi, nada tona sian Au.

¹⁷ Tu angka halak na so ra manangihon hata na Hudok sai didokkon halahi do, ‘Malua do hamu.’ Jana tu ganop halak sijogal roha, didok halahi do, ‘Nada pola marmara ho.’ ”

¹⁸ Au mandok, sahalak pe nada adong sian angka panurirang i na umboto sanga aha na adong di bagasan roha ni Tuhan. Nada adong sian halahi na unjung umbege dohot na umboto angka sangkap ni Tuhan; nada adong muse na mamparrohahon sanga manerge angka hata na nidokNia.

¹⁹ Ligima, alogo na gogo ni Tuhan, i ma haririmas ni muruk, na mangalapat jana na mijur tu ulu ni halak parjahat.

²⁰ Nada ra mombun hamumurukNia i salolot so abis sude mardalan na disangkaphonNia. Di pudian ni ari muse botoon ni bangso ni Tuhan do torang taringot tusi.

²¹ “Na ringgas antong angka panurirang i, hape nada na Husuru halahi. Mangasahon goarKu dipalalu halahi barita, hape nada adong nian tona na Hupasahat tu halahi.

²² Sugari tutu nian adong diboto halahi na di bagasan rohangKu, tontu palaluon ni halahi do tu bangsongKu sandok hata na dung Hudokkon i. Gabe muba ma roha ni bangsongKi sian angka dosana dohot pangalahona na jahat i.

²³ Debata na adong di sude inganan do Au, nada hum di sada inganan sajo.

²⁴ Sahalak pe nada adong na tarbaen buni sian parnidaanKu. Angke di sude inganan do Au adong: Di banua ginjang sanga di tano on.

²⁵ Sasude na nidok ni angka panurirang i, madung Huboto i. Mangasahon goarKu margabus halahi mandok na nijagit ni halahi tona sian Au markite-hite nipi.

²⁶ Sadia honok nari angka panurirang i sai giot palilu-liluhon bangsongKi markite-hite barita na nikarang-karang ni halahi sandiri,

²⁷ na mambaen bangsongKu mangkalupahon Au, marhite nipi na dicaritohon sian na sada tu na asing, songon ompu ni halahi na manghalupahon goarKu hara ni Baal.

²⁸ Anggo panurirang na marnipi angkon dokkononna do nian, ‘Nipi do da on.’ Tapi anggo panurirang na manjagit tona sian Au angkon palaluonna do tona i satutuna. Nada tarpatudos gandum tu durame.

²⁹ Songon api do hatangKu jana songon toko na manapor batu!

³⁰ AloonKu do angka panurirang na palaluhon tona na sian donganna, jana didokkon na sian Au tona i.

³¹ AloonKu muse do angka panurirang na palaluhon hata-hatana sandiri jana didoksa na sian Au asal ni i.

³² Au Tuhan, giot aloonKu do angka panurirang i na palaluhon angka nipina na gok gabus. Dipalilu halahi do bangsongKu marhite gabus dohot buras ni halahi. Nada Au marsuru angka panurirang i. Nada marguna halahi saotik pe anggo di bangsongKu. Au Tuhan, madung mandok songon i.”

Boban na sian Tuhan

³³ Didok Tuhan ma, “Muda adong sahalak sian bangsongKu, sanga sada panurirang sanga malim na manyapai tu ho Jeremia, ‘Aha tona ni Tuhan?’ Angkon alusanmu do, ‘BobanNia do ho; jadi hara ni i giot buangonNa noma ho.’

³⁴ Betak sai adong dope sahalak sian bangsongKu sanga panurirang bope malim na laing manaringoti salaho tu ‘boban ni Tuhan’, jadi niuhuman ma ia dohot dongan sabagasna.

³⁵ Tapi suhar-suharna, sapatutna nian angkon sapaan ni halak do tu donganna dohot tu dongan sabagasna, ‘Aha do alus ni Tuhan?’ sanga ‘Aha do na nidok ni Tuhan?’

³⁶ Nada tola be pakeon ni halahi pandohan ‘boban ni Tuhan’. Muda adong dope na mamake hata i, angkon baenonKu tonangKi gabe boban na tutu tusia. Madung dipabalik-balik halak Israel hata na Hudok, Au Debata ni halahi, Debata na mangolu, Tuhan Na Markuaso.

³⁷ Sapai ma ale Jeremia tu angka panurirang, ‘Aha do alus ni Tuhan tu ho? Aha do didok Tuhan?’

³⁸ Jadi muda nada marpangoloion halahi tu parentangKu, jana sai dipake pandohan ‘boban ni Tuhan’, dokkon ma tu halahi

³⁹ na giot jomputonKu halahi, jana danggurkononKu dao-dao, halahi bope kota na dung Hulehen tu halahi dohot tu ompu ni halahi.

⁴⁰ Angkon maila halahi baenonKu jana marlayas sapanjangna jana halupahonon ni halak ma bagian ni halahi.”