JEREMIA 22 - BIBEL JAMITA NA DENGGAN

Sipaingot ni si Jeremia tu isi ni bagas ni raja Juda

¹ Songon on ma didok Tuhan, “Kehe ma ho tu bagas godang ni raja Juda jana palaluma hata on!

² Dokkon ma: Tangihon ma hata ni Tuhan ale raja ni Juda na juguk di habangsa ni si Daud, ho dohot angka pagawemu dohot rayatmu na masuk tu pintu harbangan on!”

³ “Tigor jana jujur ma pambaenanmunu! Palua ma halak na hona incop sian tangan ni halak na mangincopsa. Ulang ma manjahati sanga manyosak hamu tu halak na leban, dakdanak na so marama so marina, sanga na mabalu. Ulang ma bunu hamu halak na so marsala di inganan on, ninna Tuhan.

⁴ Muda disitutui hamu do mandalankon angka na Huparentahon on, gabe hot do habangsa ni si Daud juguhan ni pomparanna. Jana tarbaen halahi ma rap dohot angka pagawena maradu rayat mamolus angka horbangan ni bagas godang on manaek tu kareta dohot kudo.

⁵ Tapi muda nada dioloi hamu angka na Huparentahon, jadi marsumpa do Au bahaso bagas godang on angkon gabe mangkatapor. Au Tuhan, madung mandok songon i.

⁶ Anggo di Au santak do jeges ni bagas godang ni raja Juda on, songon jeges ni tano Gilead dohot angka Dolok Libanon, tapi baenonKu ma inganan i gabe songon padang halongonan na so niinganan ni halak.

⁷ Giot tongosonKu halak mangaroncohonsa. Maroban pato ma halahi jana parunggalkononna ma angka tiangna na jeges-jeges i na nibaen sian hayu sampinur Libanon. Dung i sampakkonon ni halahi ma i tu api.

⁸ Dung salpu i bahat ma halak sileban na giot mamolus sian i jana sapa-sapa ma halahi na sada tu donganna sanga hara ni aha umbaen na Au Tuhan mambaen songon i maradopkon kota na jeges i.

⁹ Dung i alusan ni halak ma, umbaen na tarjadi pe sudena i hara ni na dung manyimbil hamu sian parjanjianmunu dohot Au Debatamunu, jana marsomba hamu lalu mangoloi tu angka debata.”

Barita sian si Jeremia taringot tu si Joahas

¹⁰ Hamu halak Juda, ulang ma hamu marsak hara ni parmonding ni Raja Josia. Si Joahas anakna i ma tangisi hamu angke madung hona oban ia jana nada mulak be. Nada idaonna be tano hatubuanna.

¹¹ Taringot tu si Joahas, anak ni si Josia na gabe raja di Juda manggontihon amangna, didok Tuhan songon on, “Madung kehe ia sian on jana nada mulak be ia.

¹² Marujung di habuangan do ngolunia jana nada idaonnia be luat on.”

Barita ni si Jeremia taringot tu si Joyakim

¹³ Marjaya ma halak na pajongjong bagasna marhite hageduhan, jana na pabidangkonsa marhite panipuan. Marjaya ma sanga ise na marsuru halak markarejo hape nada marupa.

¹⁴ Marjaya muse ma halak na mandok, “Giot pajongjongonku ma bagas godang na godang, marbilik-bilik na godang di tingkat parginjang.” Dung i dibaen ia ma di bagas godang i jandela na marbingke hayu sampinur Libanon, jana dicet na rara.

^15-16 Muda dipajongjong ho bagas godang mamake hayu sampinur Libanon na jumegesna, i ma he tandana paboa ho ma raja na dumenggan sian angka raja na asing? Ingot ma jolo tu amangmu. Didai ia do ngolu na sonang jana mardohar do ia di sude karejonia, angke tigor jana lidang do ia tongtong jana tigor do dibaen ia parkaro ni halak na pogos.

¹⁷ Hape asing do anggo ho; hum untungmu sajo do na nijalahanmu. Dibunu ho do halak na so marsala, jana kejam do dibaen ho mamisat rayatmu.

¹⁸ Hara ni i, taringot tu si Joyakim raja ni Juda anak ni si Josia, didok Tuhan songon on, “Nada tangisan ni halak hamamatenia, nada adong na mandok, ‘Iale, dongan iale.’ Nada adong na marhabot ni roha sanga na pio-pio, ‘Ibo roha mida raja i atehe!’

¹⁹ Saraton ma si Joyakim jana sampakkononna tu balian ni pintu horbangan ni Jerusalem songon na nibaen ni halak tu bangke ni halode.”

Barita taringot tu bagian ni Jerusalem

²⁰ “Manangkok ma hamu tu Dolok Libanon dohot tu Basan jana marsurak ma hamu disi. Surakkon hamu ma sian partoran Abarim na dung ditaluhon sude donganmunu.

²¹ Madung Hudok hata tu ho taran denggan dope pangalaho na masa tu hamu, hape nada ra hamu manangihon. Songon i hian do antong pangalahomu sian najolo lopus saonnari; nada jungada ra hamu mangoloi Au.

²² Hara ni i, gabe mago boti noma angka pamimpinmunu songon na niombus ni alogo. Angkaton ma angka donganmunu i songon taban, jana kotamunu dipabile hara ni sandok hajahatanmunu i.

²³ Sonang hamu tinggal dihaliangi angka tiang sampinur Libanon, tapi sanoli on muda ro na hancit tu hamu, mangae ma hamu songon ina na manubuhon dakdanak.”

Uhuman ni Debata tu si Joyakin

²⁴ Didok Tuhan ma tu Raja Joyakin, anak ni si Joyakim raja ni Juda, “Mangasahon Au Debata na mangolu, Huondolkon ma, haru pe di Au tudos tu tintin sitempel ho di tangan siamunKu, angkon buatonKu do ho

²⁵ jana pasahatonKu tu angka jolma na nihabiaranmu jana na marpor ni roha mamunu ho. PasahatonKu ma ho tu si Nebukadnesar raja ni Babel rap dohot paranganna.

²⁶ UsironKu ma ho dohot inangmu jana buangonKu tu luat na so hatubuanmu jana disi ma marujung ngolumunu.

²⁷ Sun ma lungun ni rohamunu tu luat on, tapi nada mulak be hamu tuson.”

²⁸ “Adong he na dung gabe songon hudon tano na matapor do Raja Joyakin, na niambungkon jana na so tarpake be? Hara ni i dehe umbaen na dipaorot jana dibuang ia dohot dakdanaknia tu luat na so nitanda ni halahi?”

²⁹ O ale luatku, tangihon ma sanga aha na nidok ni Tuhan,

³⁰ “Na dung ditontuhon do jolma i agoan angka dakdanakna jana sai lus di bagasan ngoluna. Sian pomparanna nada adong na marhasil mamarenta di Juda songon raja sian pomparan ni si Daud. Au Tuhan, madung mandok songon i.”