JEREMIA 20 - BIBEL JAMITA NA DENGGAN

Bura tu si Pashur harana dipahurungkon ia si Jeremia

¹ Malim Pashur anak ni si Imer do kapala ni panjago ni Bagas Ni Tuhan. Di na nibegenia au pabotohon sude pangalaho i,

² diparentahon ia ma anso dipotuk au jana dibayangkon di Pintu Horbangan Benyamin, horbangan parginjang di Bagas Ni Tuhan.

³ Ancogotna i dung dipalua si Pashur au sian bayangan i, hudok ma tusia, “Nada si Pashur goar na nilehen ni Tuhan tu ho, tapi ‘Gaor di sasude’, do.

⁴ Tuhan sandiri mandok, ‘BaenonKu ma ho gaor di bagasan dirimu sandiri dohot di angka donganmu. Idaon ni matamu ma halahi bunuon ni musu ni halahi. PadiaronKu ma sude halak Juda patunduhon ni Babel; haldungonna deba sian halahi gabe taban tu Babel jana tebana i mate niuhuman.

⁵ PadiaronKu muse musu ni halahi i mangarampas sandok sinadongan ni kota i jana mambuat sude hartona, maradu sude angka barang pusako ni raja-raja ni Juda; dioban ma sudena i tu Babel.

⁶ Jana ho ale Pashur rap dohot isi ni bagasmu laing tangkuponna ma ho jana obanonna tu Babel. Disi ma ho mate jana ditanom; laing songon i ma sude donganmu na manangihon angka gabus na nipardokkonanmi.’ ”

Humolos si Jeremia tu Tuhan

⁷ O Tuhan, Ho do mangelek au jana madung hona elekMu au. Gumogo do Ho sian au jana madung dipatunduk Ho au. Dipacia-cia sude halak au, dipalayas sian manyogot lalu tu potang ari.

⁸ Ganop mangkuling au, marsurak au sagogongku, “Hakejamon! Parmaraan!” Dipacia-cia jana dipalayas do au, Tuhan, ari-ari, hara ni na palaluhon tonaMi.

⁹ Tapi muda hudok di bagasan rohangku “Halupahon ma Ia, nada ra be au mangkuling mangasahon goarNia,” jadi gabe songon api ma tonaMi manggara-gara di ate-atengki. Huuji do nian manahansa hape nada tolap iba.

¹⁰ Tarbege ma halak marhusipi di sude inganan, “Biar noma na marroha-roha! Beta ma hita aduhon ia tu raja!” Salangkan angka ale-alengku sudena paintehon hadadabungku noma. Didok halahi, “Aropku marhite elek-elek, tartaluhon hita do i, anso tarbaen hita palalu hosom tusia.”

¹¹ Tapi Ho do ale Tuhan donganku; na sun gogo do Ho boti barani. Muli madabu jana abis gogo do halahi angka na manyompiti ngolungku. Maila ma halahi sapanjangna sundat ma sude sangkapna. Paingot-ingoton ma samatua habileon ni halahi sudena.

¹² Tapi ale Tuhan Na Markuaso, tigor do pangujiMu di sude jolma; diboto Ho do roha dohot pikiranna. Hara ni i paloas ma jolo au marnida Ho mamalos hajahatan ni musu angke tu Ho do hupasahat parkarongku.

¹³ Marende ma di Tuhan jana puji ma goarNia angke dipalua Ia do halak na targogot sian kuaso ni halak na jahat.

¹⁴ Sai hona bura ma ari hatutubungku! Halupahon ma hatiha, disi ditubuhon dainang au.

¹⁵ Hona bura muse ma sioban barita na mambaen damang marjop ni roha, di na dibaritahon tusia, “Madung adong anakmu sada!”

¹⁶ Padiar ma sioban barita i tudos tu angka kota na nironcohon ni Tuhan so maribo ni roha. Padiar ma dibege ia angguk ni na hancitan manyogot ni ari, dohot panggora ni parporangan di tonga ari.

¹⁷ Angke nada dibunu ia au dompak di bagasan bortian dope au, anso nian bortian ni dainang i gabe songon kuburan di au.

¹⁸ Biasi he angkon sai tubu au? Hum anso marhancit dehe jana hasusaan? Dohot anso ngolungku marsalpuan hum di bagasan hahaila?