JEREMIA 2 - BIBEL JAMITA NA DENGGAN

Holong ni roha ni Tuhan tu Israel

¹ Songon on do ninna Tuhan tu au:

² Kehe ma ho paboahon barita on tu sude halak na adong di Jerusalem, “O ale Israel, Huingot do holongmu, taran di haposoonmu; godang ni holong ni rohamu di na dompak boru ho. Diihutkon ho do Au tu halongonan mangolu sian luat na so marsuan-suanan.

³ Hatiha i badia do Israel di Tuhan, songon parbatu patumonaan sian suha ni tanoNa. Sude halak na mangankon i gabe marsala, hona parmaraan ma halahi, songon i ma hata ni Tuhan.”

Dosa ni ompu ni bangso Israel

⁴ Tangihon hamu ma Tuhan, o hamu pomparan ni si Jakob, ale angka marga ni Israel!

⁵ Didok Tuhan, “Hasalaan dia do na dumpang ompumunu di Au, umbaen pola mandao halahi sian Au? Disomba halahi do patung na so marguna na mambaen halahi gabe so marguna?

⁶ Nada diantoi halahi Au; Au do nian na dung manogu halahi di dalan, jana na maroban halahi ruar sian Mesir, manyalpui parhorsihan; tano gariang na margaba-gobi, boti na harsang gok parmaraan padang na so diingani jana nada adong mamolus sian i!

⁷ Tu tano napu Hutaruhon halahi laho mandai sude suha ni tano i. Hape dipahodar halahi do tanongKi disi diparsayang halahi do sinadonganKi.

⁸ Angka malim nada adong be na marsapa sanga di dia Au, Tuhanna. Angka na pajongjong uhum pe nada mamboto sanga ise Au. Angka na markuaso mangalo do tu Au. Mangasahon goar ni Baal mandok hata angka panurirang, jana marsomba gana-ganaan na so marguna i.”

Tuhas-tuhas ni Tuhan maradopkon bangsoNa

⁹ Didok Tuhan, “Saonnari parkarohononKu ma bangsongKu mangulahi, jana pomparanna Huadili.

¹⁰ Manopi-nopi ma hamu di Siprus sabola Hasundutan, suru hamu ma halak tu Habincaran tu tano Kedar, tangkas ma pareso hamu disi, sanga unjung do masa pangalaho sisongon i?

¹¹ Nada jungada sada bangso manggonti debatana haru pe i nian nada Debata na satutuna. Hape anggo bangsongKu ditulak do Au jana marsomba tu na so margogo mambaen bagi aha.

¹² Jadi hara ni i, ale langit humutur ma ho! Homang jana humitir ma ho!

¹³ Harana madung dua noli bangsongKu mambaen na jat: Ditadingkon halahi do Au, aek hangoluan, jana dihuar halahi tobat na lilis na so bisa manahan aek.”

Pangkorhon ni na so adong pangoloion ni Israel

¹⁴ “Nada hatoban Israel, nada muse pomparan ni hatoban. Tapi biasi sai diayak-ayak alona ia?

¹⁵ Marngaur musuna i songon singa, gariang jana rumar tanona i dibaensa, angka kotana abis hona surbu, dipadiar mamolngit jana gabe lobu.

¹⁶ O ale Israel, hona gusting do obuk ni ulumu dibaen halak Memphis dohot Tahpanhes.

¹⁷ Ho sandiri do mangalapi sude na tarjadi tu ho sandiri, angke dompak Hutogu ho di pardalanan, dihudukkon ho do Au, Tuhan Debatamu.

¹⁸ Na mahua ma ho tu Mesir? Na giot manginum aek ni Batang aek Nil? Na giot mahua ma ho tu Asur? Na giot manginum aek ni Batang aek Efrat?

¹⁹ Hajahatanmu sandiri do manguhumi dirimu; hona parkancitan ho hara ni na ditulakmu Au. Saonnari taonkon ma paetna dohot paniakna muda dihudukkon jana nada dipasangap ho Au. Au, Tuhan Debatamu madung mandok songon i; Au ma da Tuhan Debata Na Markuaso jana Na Gumogo.”

Nada ra Israel manyomba Tuhan

²⁰ Didok Tuhan, “Madung honok na so ra ho tunduk tu Au; nada ra ho mangoloi sanga marsomba tu Au. Di puncu ni ganop dolok na gincat, dohot di toru ni sandok hayu na rumbun disomba ho do angka debata ni hagabean.

²¹ Husuan ho songon bona ni anggur na Hutodo sian tampang na sumurung. Hape saonnari ho gabe muba, songon hayu na muab busuk, hayu anggur na riar.

²² Haru pe dipaias ho dirimu dohot aek abu, dohot sabun na marlobi-lobian, tapi hasalaanmi torus do i haidaan di Au, ninna Tuhan Debata.

²³ Pulukna i antong mandok na so jungada dipahodar ho dirimu, jana paboa na so unjung Baal diihutkon ho! Ligi ma sandok dosamu di rura; ingoti hajahatanmu jana akui ma! Sai songon unto boru-boru na gintal do ho, marlojong panyihal-nyihalon umpe tarpaso,

²⁴ na kehe jalang tu parhorsihan hara ni na giot marsonang-sonang. Muda ro napsuna ise he na bisa mangambatisa? Nada pola loja jantan manjalahi i; manigor dapot do i muda dumpang hatiha marjantan.

²⁵ Ale Israel, tongtong ma ho marsipatu jana ulang padiar manguas ho hara ni na parayakkon debata na asing. Tapi nimmu do, ‘Nada! Nada tarbaen au mulak. Madung huhaholongi debata na asing jana i noma ihutkononku.’ ”

Patut do hona uhum Israel

²⁶ Didok Tuhan, “Songon ila ni roha ni panangko di na tartangkup, songon i ma hamu sude maila, ale halak Israel, angka raja maradu angka na marpangkat, angka malim maradu angka panurirangmu!

²⁷ Pailaon do hamu, angke didok hamu do amangmunu samponggol hayu jana marpio inang hamu tu sada batu, lalu ditadingkon hamu Au. Hape muda ro hasusaan, dipangido hamu ma anso ro Au giot paluahon hamu.

²⁸ Di dia ma he angka debatamunu na nipaturemunu i? Muda masa hasusaan suruhon ma halahi paluahon hamu, anggo tarbaensa do! O ale Juda, bahat ni angka debatamu sabahat ni angka kotamu!

²⁹ Aha ma he salangKu umbaen na mungut-ungut hamu jana mangalo tu Au?

³⁰ Nada marguna hamu Hubaen hona uhum, angke na so targorahon do hamu. Songon singa na mangamuk, songon i ma hamu mamatehon angka panurirangmunu.

³¹ O hamu Israel, tangihon ma angka hatangKon. Unjung ma he Au songon padang halongonan maradopkon hamu, sanga songon tano na golap bulita jana na gok parmaraan? Hape biasi didok hamu sai na giot bebas hamu, jana nada ra be mulak mangulahi tu Au?

³² Adong ma he bujing-bujing na manghalupahon barang parhiasanna? Sanga boru na manghalupahon bayo na mambuatsa? Hape anggo Au madung dihalupahon hamu mamungka sian hatiha na so taretong be honokna.

³³ Na sun do antong malomunu mambaen dalan laho manarik roha ni angka haholongan ni rohamunu i. Salang boru panggampang na jumorbut i pe laing tarbaensa do marsiajar sian hamu.

³⁴ Hodar do pakeanmunu hara ni mudar ni halak na pogos dohot na so marsala, nada hara ni mudar ni panangko. Tapi haru songon i pe,

³⁵ laing didok hamu do na so marsala hamu, na so muruk be Au tu hamu. Tapi Au Tuhan, uhumanKu do hamu hara ni na so ra hamu mangakui na marsala hamu.

³⁶ Nayang na i didok rohamu laho paubahon parangemu! Jana angkon maila ma ho hara ni halak Mesir, songon na dung dipaila ni Asur i ho.

³⁷ Tarhirim ma hamu manadingkon Mesir hara ni ilana. Au Tuhan, madung manulakkon halahi na dipangasahonmunu i; indangkon na dapot hamu sanga na aha untung sian halahi.”