JEREMIA 17 - BIBEL JAMITA NA DENGGAN

Dosa dohot uhuman tu Juda

¹ Didok Tuhan ma, “Madung tarsurat dosa ni Juda marhite pena bosi na marmata intan, taruhir di ateatemunu dohot di langgatan ni halahi.

² Marsomba angka halakmu di angka langgatan dohot angka tiang gana-ganaan na dipajongjong di Debata Boru-boru Asera, di sandok hayu na rumbun, di puncu ni angka dolok,

³ dohot di angka dolok di balian ni kota. Hara ni sandok dosa na dung dipambaeni hamu di luat on sudena, baenonKu ma anso diangkat angka musumunu i sude arta dohot sinadonganmunu.

⁴ Paksaonna ma hamu pasahatkon tano na dung Hupasahat i tu hamu, jana baenonKu ma hamu mangoloi tu musumunu di tano na so nitandamunu. Hara ni murukKu na marjimbur songon api na gara jana na so haintopan ma umbaen na songon i Hubaen sudena i.”

Pangajaran na marragam

⁵ Didok Tuhan do, “Muda ditadingkon halak Au, Tuhanna, jana marpos ni roha tu jolma jana marpangunsandean tu hagogoonna, jadi gabe uhumonKu ma ia.

⁶ Songon suan-suanan do i na tubu di padang-padang i di tano na gariang jana marsira na so jungada do i na denggan didaisa.

⁷ Tapi anggo halak na marpos ni roha tu Au sai na pasupasuonKu do i marpupu.

⁸ Songon hayu na di topi ni batang aek na nipangolu do halahi manjarar uratna lalu tu aek i. Nada mabiar ia logo ni ari sai rata do angka bulungna i. Haru pe nada ro udan, nada pola susa angke sai marparbatu do i.

⁹ Nada tardodo anggo roha ni jolma umbisuk do i sian sasudena jana sun antong jahatna.

¹⁰ Au do Tuhan na mandodo roha; Huuji do ate-ate ni jolma. BaloskononKu do tu ganop hombar tu pangalahona; jana Hubaen hombar tu pambaenanna.”

¹¹ Tudos tu unggas na mamodomi na so pirana; songon i ma halak na geduk maruli arta. Di na satonga umur tobangna agoan ma ia sude artania. Di ujung ni ngoluna tanda ma na santak do, otonia.

¹² Habangsa hamuliaan, sangap do sian mulana, inganan na badia di hita!

¹³ Tuhan, Ho do pos ni roha ni Israel bangsoMi, angkon gabe maila do sude na manadingkon Ho. Na giot kehe ma halahi tu inganan ni jolma na mate i; angke Ho do mual ni aek hangoluan madung ditadingkon halahi, ale Tuhan.

Si Jeremia mangido pangurupion ni Tuhan

¹⁴ Pamalum ma au Tuhan, anso gabe torkis au. Palua ma au, anso gabe malua au. Hum Ho do na hupasangap!

¹⁵ Didok halak do tu au, “Di dia do sude na niondamkon ni Tuhan i? Saonnari ma da i dipadalan!”

¹⁶ Tapi ale Tuhan, na so unjung do husosoi Ho parohon jaya tu halahi, nada muse por rohangku anso didondoni hasusaan. Diboto Ho do i ale Tuhan. Diboto Ho do sanga aha na hudok.

¹⁷ Ulang ma Ho gabe songon songgot-songgot na mambaen mabiar au. Ho do inganan haporusanku muda ro hasusaan.

¹⁸ Sai Ho ma pailahon dohot manggohi biar tu halak na manyompiti ngolungku. Tapi ulang baen tu au songon i ale Tuhan. Paro ma jaya hamagoan tu halahi lopus abis matimpas halahi.

Angkon parbadiaan Ari Sabat

¹⁹ “Disuru Tuhan ma au kehe tu Pintu Ni Horbangan Rayat, siboluson ni angka raja ni Juda muda laho masuk sanga haruar halahi sian kota. Laing disuru Ia muse au kehe tu sude horbangan na asing na di Jerusalem i.

²⁰ Palaluhon tonaNia tu angka raja-raja dohot sude halak Juda maradu sude halak na maringanan di Jerusalem na mamolus sian pintu i.

²¹ Songon on do ditonahon Tuhan: ‘Muda nada giot hamu mate, ulang ma maroban barang hamu di Ari Sabat, sanga marobansa mamolus sian angka pintu horbangan ni Jerusalem.

²² Nada tola muse hamu markarejo sanga maroban barang sanga aha pe haruar sian bagasmu anggo di Ari Sabat. Angkon parbadiaanmunu do ari i songon sada ari hapunjungan hombar tu na Huparentahon tu ompumunu.

²³ Hape nada ra ompumunu i manangihon sanga mamparrohahon sanga aha na Hudok. Jogal do roha ni halahi jana nada ra mangoloi, boti na so targorahon.

²⁴ Oloi hamu ma sude na Huparentahon. Ulang oban hamu sanga na barang aha pe mamolus sian pintu ni horbangan ni kota on anggo di Ari Sabat. Parbadiai ma Ari Sabat i songon ari na marhasurungan. Anggo di na sadari i na so tola karejohononmunu sanga na aha pe.

²⁵ Anggo disitutui hamu do mandalankon angka na Huparentahon, gabe hot ma habangsa ni si Daud juguhan ni pomparanna. Jana manengget kareta ma halahi dohot kudo, halahi rap dohot angka na mora-mora, halak Juda dohot halak na maringanan di Jerusalem, jana kota Jerusalem pe tongtong noma ribur.

²⁶ Marroan ma angka jolma sian kota na di Juda dohot sian angka pagaran na humaliang Jerusalem; marroan ma halahi sian tano Benyamin, sian luat na di lereng ni dolok, sian luat pardolok dohot sian Juda na di Selatan. Obanon ni halahi ma tu Bagas Ni Tuhan angka haul situtungon, na giot situtungon dohot na so situtungon, songon i muse gandum sihaulkonon dohot hamonyan, maradu haul hatarimakasion.

²⁷ Tarjadi ma sudena i muda dung marpangoloion hamu tu Au jana diparbadia i hamu Ari Sabat i songon ari na mardohonan. Ulang maroban barang bagi aha pe hamu mamolus sian angka horbangan ni Jerusalem anggo di ari i. Muda dilanggar hamu do angka na Huparentahon i, tutungonKu abis angka horbangan ni Jerusalem i dohot angka bagas godang na disi jana nada haintopan api i.’ ”