JEREMIA 13 - BIBEL JAMITA NA DENGGAN

Bobat na dung lapuhon

¹ Disuru Tuhan ma au manobusi bobat abit sian linen jana anso hupake i; tapi nada tola sornomkononku i tu aek.

² Jadi kehe ma au manobusi bobat abit i lalu hupake.

³ Dung i mangkuling muse ma Tuhan tu au, ning Ia ma,

⁴ “Kehe ma ho tu Batang aek Efrat, jana bunihon ma bobat abit i di holang-kolang ni batu.”

⁵ Jadi hombar tu na diparentahon ni Tuhan i, kehe ma au jana hubunihon ma bobat abit i di lambung ni Batang aek Efrat.

⁶ Dung adong sadia honok, disuru Tuhan ma au mangulahi tu Batang aek Efrat laho mambuat bobat abit i.

⁷ Jadi kehe ma au, jana huparuar ma bobat abit i sian inganan panabunianna. Hape madung mumut abit i jana nada adong be gunana.

⁸ Dung i didok Tuhan muse ma tu au, ning Ia,

⁹ “Songon i ma na giot baenonKu maradopkon halak Juda dohot tu halak Jerusalem. RopuhonKu ma haginjangon ni roha ni halahi na lobi i.

¹⁰ Na jogal do roha ni bangso na jahat on jana na so ra do halahi mangoloi Au. Marsomba jana mangoloi angka debata na asing do halahi. Hara ni i ma halahi gabe songon bobat abit na so marguna i.

¹¹ Songon bobat abit na dialitkon gomos di gonting ni na mamakesa, songon i ma Hubaen pangalitkon ni halak Israel dohot Juda tu Au. Songon i ma dalanna halahi gabe bangsongKu na mambaen tarpuji jana marsangap goarKu. Hape nada ra halahi mangoloi Au.”

Gunci inganan ni anggur na ditaporkon

¹² Didok Tuhan Debata ma tu au, “O Jeremia, palalu ma jolo tonangkon tu halak Israel, na paboahon angkon ganop gunci inganan ni anggur angkon diisi bubung dohot anggur. Alusan ni halahi ma, ‘Pola ma he na so hami boto angkon nigohan ganop gunci dohot anggur?’

¹³ Jadi dokkon ma tu halahi na giot gohanKu dohot anggur lopus mabuk angka jolma na adong di luat on, angka raja-raja pomparan ni si Daud, angka malim, panurirang dohot sude halak na maringanan di Jerusalem.

¹⁴ Jana marsitomboman halahi baenonKu. Songon i ma baenonKu na matobang dohot na poso nada adong ampunanna. AbisanKu ma halahi nada mamake ibo ni roha dohot pangusayang. Au Tuhan, madung mandok songon i.”

Sipaingot ni si Jeremia taringot tu ginjang ni roha

¹⁵ Ale halak Israel, madung didok Tuhan, ulang ginjang rohamu, tangihon ma tuSia!

¹⁶ Angkon parsangaponmu do Tuhan Debatamu taran so diparo Ia hagolapan, taran so tartuktuk patmunu di angka dolok, jana na torang na niarop ni rohamu digonti Ia gabe hagolapan.

¹⁷ Muda nada ringkot rohamu manangihonsa, tangis ma au di sihabunian. Di bagasan pangkilalaan na hancit ginjang ni rohamu hutangisi. Marabur ma ilu ni matangku hara ni na hona taban bangso ni Tuhan gabe halak buangan.

¹⁸ Didok Tuhan tu au, “Suru ma raja i dohot namora i mijur sian habangsana i, angke madung madabu tukuna na jeges i sian ulunia.

¹⁹ Hona hobuk do angka kota ni Juda na di Selatan, jana nada adong na tarbaen luncat sian panghobuk ni musu i. Madung diayak sandok halak Juda tu habuangan.”

²⁰ Didok Tuhan ma tu halak na maringanan di Jerusalem, “Parrohahon hamu ma! Madung ro musumunu sian Utara! Di dia dehe angka jolma sihopkoponmunu i dohot na sai dipangasahon hamu?

²¹ Giot aha ma he dokkononmu anggo angka jolma na nietong ni rohamunu angka donganmunu, hape manaluhon dohot mangarajai hamu? Musti hancitan hamu songon dadaboru na giot manubuhon dakdanak.

²² Betak sapa-sapa hamu biasi ro i tu hamu, biasi disibakkon pakeanmunu jana dibaen tu hamu roha-rohana. Patut angkon botoonmunu, patunda ni na magodangtu do dosamunu umbaen na tarjadi sudena i.

²³ Bisa ma he digonti halak Etiopia kulitna sanga babiat pauba bolangna? Bisa ma he hamu mambaen na denggan, hamu angka na dung somal mangkarejohon hajahatan?

²⁴ SarsarkononKu ma hamu songon lapung na niombus ni alogo sian padang halongonan.

²⁵ I ma bagianmu na dung Hutontuhon hara ni na nihalupahonmu Au jana porsaya ho tu angka gabus.

²⁶ Au sandiri manyibakkon pakean sian pamatangmu anso marsaemara ho jana maila.

²⁷ Madung Huida hamu patupahon angka pangalaho na Huhagigihon. Huida do hamu markarosuan jana manggampang di angka dolok dohot di angka ladang. Marjaya ma hamu halak Jerusalem! Andigan pe hamu giot malua sian sandok hajahatan?”