JEHESKIEL 6 - BIBEL JAMITA NA DENGGAN

Diburai Tuhan panyombaan tu gana-ganaanna

¹ Dung i ro ma hata ni Tuhan tu au songon on,

² “Ale jolma parsantongkinan, tatap ma tu angka dolok ni Israel, jana palalu ma tonangKu taringot tu uhuman sibaenonKu tu halahi.”

³ Jana dohononmu ma: Hamu ale angka dolok ni Israel, tangihon hamu ma tona ni Tuhan Debata! Songon on do hata ni Tuhan Debata tu angka dolok, angka holbung, angka tor, angka rura, “Ligi ma Au parohon tu hamu porang anso mago angka inganan panyombaan ni gana-ganaanmunu.

⁴ Parrumpakkonon ma angka langgatanna i jana partaporan angka pardupaanna. Bunuon ma sude jolma na disi di jolo ni gana-ganaanna i.

⁵ BaenonKu ma marragean angka bangke ni halak Israel, di jolo ni angka gana-ganaan ni halahi jana marrerakan baenonKu holiholimunu humaliang angka langgatanmunu.

⁶ Tung di sude ingananmunu angkon sursarkonon ma sude angka kota ni Israel, jana lungun baenon angka dolok-dolok, anso marampar jana marumpak angka langgatanmunu, marponggolan jana mago angka gana-ganaanmunu, jana maropuk angka tiang panyombaan, jana diagohon ma bagi aha na dibaen ni halahi.

⁷ Sanga na di dia adong halak na hona bunu, jana sanga ise na malua botoonna ma Au do hape Tuhan.

⁸ Adong do saotik sian halahi sipaluaonKu sian panyambolan i, tapi paserahon do halahi di tonga-tonga ni angka bangso.

⁹ Disi, di tonga-tonga ni angka bangso, tu dia halahi na tartaban i dioban, angka halak na malua sian tonga-tongamunu angkon mangingot Au. PaulakonKu do muse roha ni halahi na markarosuan i, na dung mandao sian Au jana manundali halahi, na tongtong markarosuan mangihutkon gana-ganaan ni halahi, dung i gabe goyak ma roha ni halahi mida dirina sandiri hara ni sude hajahatan dohot hajorbutan ni halahi.

¹⁰ Jana botoon ni halahi ma, bahato Au do Tuhan jana nada hata gabus, muda Hudok giot mandabu uhum tu halahi.”

¹¹ Didok Tuhan Debata i ma, “Marsak ma da hamu! Mangandungi ma! Tangis ma hamu mangalungun hara ni sandok hajahatan i dohot hagigian na nibaen ni bangso Israel. Marmatean ma halahi hara ni porang, haleon dohot nyae masa.

¹² Hilalaon ni halahi sude ma panyuraka ni murukKu. Angka jolma na dao di habuangan marnyae i ma lalu mate; na donok mate ma baenon ni porang, jana na deba nari i mate tangkuraparon.

¹³ Marragean ma angka bangso di antara ni angka gana-ganaan i dohot humaliang ni angka langgatan i, marserak di ganop dolok na gincat dohot di puncu ni ganop dolok, di toru ni ganop hayu na rumbun dohot di ganop bona ni hayu na godang; pendekna, sanga di dia halahi manutung haul tu gana-ganaan ni halahi. Jadi botoon ni ganop jolma ma, Au do Tuhan.

¹⁴ Olo antong, pahortangonKu ma tanganKu jana ropuhonKu luat ni halahi i lopus gabe mamolngit mamungka sian halongonan na di Selatan lopus tu kota Ribla di Utara. Sian angka inganan ni halak Israel, sahalak pe nada adong na giot paluaonKu. Jadi gabe botoon ni halak ma, Au do Tuhan.”