JEHESKIEL 5 - BIBEL JAMITA NA DENGGAN

Marcukur obuk si Jeheskiel

¹ Didok Tuhan ma, “Ale jolma parsantongkinan, buat ma podang na tajom jana pake ma i laho mancukur sude janggut dohot obukmu. Dung i timbang ma obuk i di kiloan jana bagi tolu ma i.

² Sapartolu angkon tutungonmu ma i di tonga-tonga ni kota i dung sidung hona hobuk. Sapartolu nari angkon jaljalanmu do i dohot podangmi lalu mardalan ho manghuliangi kota i. Jana na sapartolu nari i angkon sampakkononmu do i tu awang-awang i, jana buruonKu ma i dohot podangKu.

³ Tadingkon ma saotik obuk i, jana saputi ma i di pangalompitan ni baju jubami.

⁴ Dung i buat ma saotik nari obuk i, ambungkon ma i tu bagasan api jana padiar ma mosok. Sian i ma api mangararati tu sude bangso Israel.”

⁵ Didok Tuhan Debata ma, “Ligi da, on ma Jerusalem. Hubaen do kota on di tonga-tonga ni angka bangso parbegu jana angka luat ni halahi mangkuliangisa.

⁶ Tapi madung ditulak Jerusalem na Huparentahon jana madung tangkas jumahat do ia sian angka bangso na asing, jana tumangkang dope ulang pado angka bangso na humaliang ia. Dilaosi Jerusalem do angka parentangKu jana nada ra mangoloi angka aturanKu.”

⁷ Dibaen i songon on do hata ni Tuhan Debata, “Harana jumahat do hamu sian halak parbegu angka na manghaliangi hamu, nada diparangehon hamu angka parentangKu, jana nada diradoti hamu angka uhumKu, tona ni angka parbegu na di humaliangmunu noma diihutkon hamu.

⁸ Jadi, Au Tuhan Debata mandok, bahaso musumu do Au. UhumanKu ma ho di adopan ni angka bangso.

⁹ Hara ni sude pangalaho na jat i, angkon Hubaen tu hamu angka na so jungada Hubaen, jana nada be baenonKu songon i.

¹⁰ Panganon ni ama-ama ma dakdanakna sandiri jana dakdanak mangankon simatobangna. Songon i ma uhumanKu halahi, jana na tinggal i paserahonKu sun tu dia.

¹¹ Dibaen i, songon sintongna mangolu Au, ninna Tuhan Debata: Hara ni na dung dipahodar ho inganan na badiangKu marhite sude pambaenanmu na jahat jana sihagigian i, roncohononKu ma ho nada adong ampunna.

¹² Sapartolu sian jolma na mangingani ho, mate ma i hara ni nyae masa dohot baenon ni haleon potir na masa di kota i. Sapartolu hona sambol baenon ni podang humaliangmu, jana sapartolu nari sarsarkononKu sun tu dia jana paihut-ihuton ni podang sian pudi baenonKu.

¹³ Hilalaonmu ma jorbut ni hamuruhonKu, dohot pangamukKu lopus sombu rohangKu. Dung tulus sudena i, disi pe anso tangkas botoonmu paboa na dung mangkuling Au tu ho, Au Tuhan mangkuling hara ni murukKu marnida na so setia ho.

¹⁴ Incahan ni angka bangso na humaliangmu ma ho, jana mandao ma sian ho sanga ise halak na mamolus.

¹⁵ Anso sai gabe siincahan jana sipalayason dohot siparjoraan dohot habiaran di halak parbegu angka na humaliang ho, muda muruk Au jana marrimas jana Huuhumi ho di bagasan muruk marhite pincang-pincang ni harimason.

¹⁶ Abis baenonKu simpanan ni balanjomu jana padiaronKu tangkuraparon halakmu. Hilalaon ni halahi ma paniak ni na malean, songon anak ni pana na tajom na manombuk jana mamatehon ho.

¹⁷ Tamba ni haleon potir paroonKu muse dope nyae, na kejam dohot porang laho mamunu halakmu, dohot angka binatang panyoro laho mamatehon angka dakdanakmu. Au Tuhan, madung mandok songon i.”