JEHESKIEL 39 - BIBEL JAMITA NA DENGGAN

Hataluan ni si Gog

¹ Didok Tuhan Debata i ma, “Ale jolma parsantongkinan, gorahon ma si Gog, raja godang na sian Luat Mesekh dohot Tubal, jana paboa ma tusia, musunia do Au.

² PaegolonKu ma ia, jana saratonKu haruar sian luat sihadaoan na di Utara, lalu obanonKu tu angka dolok ni Israel.

³ Disi ma lipatonKu siornia i lopus madabu sian tangan siambirangnia i, jana dabuhononKu angka anak ni panania i sian tangan siamunnia.

⁴ Mate ma si Gog rap dohot angka tentara maradu sude na mandongani ia di ginjang ni angka dolok ni Israel, jana lehenonKu ma angka bangke ni halahi i tu sandok unggas dohot binatang panyoro anso dipapangani.

⁵ Martinggangan ma angka parajurit i jana marmatean di ladang-ladang i. Au Tuhan Debata madung mandok songon i.

⁶ PamasaonKu ma api di tano Magog dohot di angka topi ni laut, na niinganan ni halak di bagasan sonang. Jadi botoon ni halahi sude ma Au do Tuhan.

⁷ Tapi anggo di tonga-tonga ni halak Israel, patangkasonKu ma na badia goarKu, jana nada pahodaron be goarKi. Jadi, gabe botoon ni angka bangso ma Au do Tuhan, Debata na badia ni Israel.”

⁸ Didok Tuhan Debata i ma, “Satutuna do, na giot ro ma ari na Hudokkon i.

⁹ Mudur-udur ma halak na maringanan di angka kota ni Israel haruar laho palagutkon angka sinjata na martinggalan, i ma angka parince dohot podang, sior dohot anak ni pana dohot tungkot, potuk-potuk. Gabe soban ma i sudena dibaen halahi, salolot pitu taon.

¹⁰ Jadi nada pola be mambuat soban halahi di ladang sanga martaba hayu di harangan, dibaen tuk do bahat ni angka sinjata i pakeon baen soban. Pambuatan jana rampasan ni halahi ma arta ni angka halak na dung mambuati dohot mangarampas arta ni halahi. Au Tuhan Debata madung mandok songon i.”

Dikubur si Gog

¹¹ Didok Tuhan ma: “Muda tarjadi sudena i, lehenonKu ma tano kuburan tu si Gog di tano Israel. Di Rura Panariparan na di Habincaran ni Laut Mate. Disi ma kuburkonon si Gog dohot angka tentarana i, jana baenon ma goar ni rura i, ‘Rura Ni Parangan ni si Gog.’

¹² Pitu bulan honokna marloja-loja angka halak Israel manguburkon sude bangke i anso ulang sai ramun be tano i.

¹³ Sude do halak na di luat i dohot mangurupi laho pasidungkon panguburan i; jana domu tusi jagiton ni halahi ma tanda ni hadengganan di ari ni hamonanganKu. Au Tuhan Debata madung mandok songon i.

¹⁴ Dung salpu na pitu bulan i, suruon ma piga-piga halak mangadangi luat i laho manjalahi angka bangke na payak di tano i, jana muda adong dope antong anso lalu dikuburkon halahi sudena i laho paiaskon luat i sian na hodar.

¹⁵ Di pardalanan i, ganop marsuo halahi dohot holi-holi ni jolma dibaen halahi ma tandana di lambungna i, anso diida angka tukang kubur tanda i jana dikuburkon halahi ma i di Rura Ni Parangan ni si Gog.

¹⁶ Songon i ma dalanna laho paiaskon tano i sian na hodar. (Di pudi ni ari, adong muse ma sada kota na sarupa goarna dohot parangan ni si Gog.)”

¹⁷ Didok Tuhan Debata i ma tu au, “Ale jolma parsantongkinan, piohon ma sude unggas dohot angka binatang na asing i anso marroan sanga sian dia laho mangankon haul na Hupasingkop di halahi. Giot baenonKu horja godang di ginjang ni angka dolok ni Israel, disi ma panganon ni halahi juhut jana inumon ni halahi mudar.

¹⁸ Bolas ma panganon ni halahi angka bangke ni ulubalang, jana inumon ni halahi mudar ni angka parkuaso ni tano on. Na giot bunuon do angka ulubalang dohot parkuaso i songon angka hambeng jantan sanga anak ni hambeng, sanga banteng na mokmok sian Basan.

¹⁹ Butongan ma hamu mangankon tabo-tabo jana minum mudar lopus mabuk di pesta haul na Huparade di hamu.

²⁰ Butongan ma hamu di pestangKi, mangankon kudo dohot na manenggetsa, angka na gogo dohot halak parporang. Songon i ma didok Tuhan Debata.”

Dipasuang mangulahi Israel

²¹ Didok Tuhan ma, “PataridahononKu ma hamuliaanKu tu angka bangso. Idaon ni halahi sude ma sanga songon dia pamakengKu di kuasongKu laho mandalankon angka haputusan na tigor.

²² Botoon ni halak Israel ma mamungka sian hatiha i, Au do Tuhan Debata ni halahi.

²³ Jana torang botoon ni sandok bangso, nitongos pe halak Israel tu habuangan hara ni dosa ni halahi do maradopkon Au. Na dung Hutadingkon do halahi jana Hupadiar talu dibaen musuna jana dibunui di bagasan parporangan.

²⁴ Hubaen tu halahi hombar tu hahodaran dohot hajahatan ni halahi, dung i Hutadingkon ma halahi.”

²⁵ Didok Tuhan Debata i ma, “Tapi anggo saonnari haholonganKu noma halak Israel pomparan ni si Jakob i, jana baenonKu halahi sonang mangulahi. Jadi songon i ma Hubaen manjago anso laing tongtong dipasangap goarKu.

²⁶ Jadi muda mangulahi sonang halahi maringanan di tano ni halahi sandiri, jana nada adong be sahalak pe na mangondam halahi, gabe halupahonon ni halahi ma sanga songon dia hahaila na masa tu halahi hara ni na manghalupahon Au.

²⁷ ObanonKu ma halahi mulak mangulahi sian angka tano ni musu ni halahi, jana tangkas ma tarida haiasonKu tu sude bangso hara ni pambaenanKi.

²⁸ Jadi gabe botoon ni bangsongKi ma Au do Tuhan Debata ni halahi. Angke Au do na manongos halahi tu habuangan tapi laing Au muse do na maroban halahi mulak mangulahi tu tano ni halahi sandiri, jana nada adong sahalak pe sian halahi na tading disi.

²⁹ UsehononKu ma tondingKu tu bangso Israel jana nada be tadingkononKu halahi. Au Tuhan Debata madung mandok songon i.”