JEHESKIEL 37 - BIBEL JAMITA NA DENGGAN

Holi-holi na mahiang di sada rura

¹ Taraso ma tu au hagogoon ni Tuhan, jana dioban tondiNia i ma au manuat tu sada rura na gok dohot holi-holi.

² Ditogu Tuhan ma au marhuliang-huliang di rura i, jana huida ma na marampar do hape di rura i sude angka holi-holi na lobi bahat jana na mahiang situtu.

³ Disapai Tuhan ma tu au, “Ale anak ni jolma, tarbaen dope angka holi-holi on mangolu mangulahi?” Hualusi ma, “Ale, Tuhan Debata, hum Ho do umbotosa.”

⁴ Dung i disuru ma au palalu tonaNia tu angka holi-holi na mahiang i,

⁵ ‘Au, Tuhan Debata mangombuskon hosa hangoluan tu bagasan dirimunu anso mangolu hamu mangulahi.

⁶ Hubaen urat dohot juhut tu hamu jana Hubalut hamu dohot huling-kuling. LehenonKu ma hosa tu hamu anso mangolu hamu. Jadi gabe botoonmunu ma Au do Tuhan.’

⁷ Dung i mangkuling ma au tu holiholi i hombar tu parenta ni Tuhan i. Jana taran manghobari au, hubege ma sora maturapak, harana mamungka ma angka holi-holi i mardomu na sada tu na asing.

⁸ Taran mangaligi-ligi dope au, mamungka ma marurat jana marjuhut angka holi-holi i, jana marhuling-kuling tapi nada markosa dope angka pamatang i.

⁹ Didok Debata ma tu au, “Ale anak ni jolma, mangkuling ma ho tu alogo i. Dokkon ma na Huparentahon, Au Tuhan Debata mamarentahon tu alogo i anso marroan sian sude panjuru, laho mangombuskon hosa tu bagasan ni angka pamatang na mate i anso mulak mangolu halahi.”

¹⁰ Jadi mangkuling ma au hombar tu parenta ni Tuhan i jana alogo i pe diombuskon ma hosa tu angka pamatang i jana mangolu ma halahi lalu jongjong. Bahat sajo do halahi, jabat do tuk laho mambaen hasadaon ni tentara sibahat-bahat.

¹¹ Didok Debata ma tu au, “Ale anak ni jolma, bangso Israel do na nigambarkon ni angka holi-holi on. Humolos do halahi hara ni na mahiang halahi, nada adong be arop ni roha jana nada adong be ari pangapudianna.

¹² Antong manyurirangi ma ho tu bangsongKu Israel i, Au Tuhan Debata giot mangungkap kuburan ni halahi. Hupangot ma halahi sian kuburan i jana paulahonKu halahi tu tano Israel.

¹³ Dung Hupatulus sudena i, botoon ni bangsongKi ma Au do Tuhan.

¹⁴ LehenonKu ma tondingKu tu bagasan diri ni halahi laho pangoluhon halahi, jana baenonKu halahi anso maringanan di luat ni halahi sandiri. Jadi botoon ni halahi ma bahaso Au do Tuhan, madung mandok songon i jana patulusonKu do songon i.”

Dipadomu ma muse harajaan Juda dohot Israel

¹⁵ Mangkuling ma Tuhan mangulahi tu au, didok Ia ma,

¹⁶ “Ale jolma parsantongkinan, buat ma sada tungkot jana suratkon ma tusi hata on, ‘Harajaan Juda’. Dung i buat ma sada nari tungkot jana suratkon disi: ‘Harajaan Israel’.

¹⁷ Dung i tiop ma gomos tungkot na dua i lopus mardomu angka ujungna i gabe sada tungkot.

¹⁸ Muda disapai bangsomi sanga aha arti ni i,

¹⁹ dokkon ma tu halahi na giot buatonKu, papan ni si Josep na ditangan ni si Efraim, Au Tuhan Debata giot mambuat tungkot na manggambarkon Israel i. Jana padomuonKu ma halahi gabe tungkot ni Juda gabe pasadaonKu ma halahi di tanganKu gabe sada papan.

²⁰ Tiop ma tungkot na dua i jana patidahon ma tu bangso i.

²¹ Lalu dokkon ma tu halahi na giot alaponKu, Au Tuhan Debata giot mangalap bangsongKu sudena sian angka luat hakehean ni halahi. PalagutonKu ma halahi jana obanonKu mangulahi tu luat ni halahi sandiri.

²² BaenonKu ma halahi gabe sada bangso di tano i, di dolok ni Israel. Sada raja ma mamarenta halahi jana nada be matapor halahi gabe dua bangso sanga harajaan.

²³ Nada be pahodaron ni halahi dirina dohot dosa dohot na manyomba angka gana-ganaan sihagigian. PaluaonKu ma halahi sian sude hahodaron na mambaen halahi marbalik tu Au. Ias ma baenonKu halahi; gabe bangsongKu ma halahi, jana Au Debata ni halahi.

²⁴ Jadi naposongKu si Daud ma gabe rajana jana sada ma na marmahani halahi. Mangolu ma halahi di bagasan pangoloionna tu angka uhumKu dohot mangkarejohon sude angka tonangKu.

²⁵ Maringanan ma halahi di tano na dung Hulehen tu naposongKu si Jakob jana na niinganan ni ompu ni halahi, olo, halahi; angka anak ni halahi bope pahompu ni halahi angkon tinggal disi salolot ni lolotna jana naposongKu si Daud ma raja ni halahi salolot ni lolotna.

²⁶ BaenonKu ma sada parjanjian dohot halahi na manjamin hasonangan ni halahi sapanjangna. PasupasuonKu, jana tambaanKu ma bilangan ni halahi. PajongjongonKu ma di tano ni halahi BagasKu na hot salolot-lolotna.

²⁷ Rap ma Au dohot halahi, Au noma gabe Debata ni halahi jana halahi gabe bangsongKu.

²⁸ Jadi muda dung ditonga-tonga ni halahi inganan na badiangKu salolot-lolotna, gabe botoon ni angka bangso na asing ma Au Tuhan, madung manodo Israel gabe bangsongKu sandiri.”