JEHESKIEL 34 - BIBEL JAMITA NA DENGGAN

Angka parmahan ni Israel

¹ Didok Tuhan ma tu au,

² “Ale anak ni jolma, gorahon ma parmahan ni Israel, jana palalu ma sanga aha na Hudok, Au Tuhan Debata mandok tu halahi, ‘Marjaya ma hamu angka parmahan ni Israel. Hum haporluanmunu sajo do disarihon hamu, nada haporluan ni angka biri-birimu.

³ Susuna i diinum hamu, imbuluna i dibaen hamu gabe pakean, jana biri-biri na mokmokna i disambol jana dipangan hamu. Nada jungada dipature hamu angka biri-birimunu i.

⁴ Angka biri-biri na gale so jungada dipature hamu, na lilu dohot na mago nada dijalahi hamu anso dioban mangulahi. Mur jingar do pambaenmunu tu biri-birimunu i sudena.

⁵ Hara ni na so marparmahan, marserak ma angka biri-biri i jana gabe sisoroon ni binatang panyoro.

⁶ Gabe mampar ma angka biri-biringKi di angka tor na gincat dohot di angka dolok. Marserak ma halahi tu sude sisik ni portibi on, sahalak pe nada adong na manyarihon sanga na manjalahi halahi.

⁷ Antong hamu angka parmahan, tangihon hamu ma sanga aha na Hudok, Au Tuhan Debata mandok tu hamu:

⁸ Mangasahon Au Na Mangolu, ninna Tuhan Debata, parrohahon hamu ma. Disoro binatang jana dipangan binatang panyoro do angka biri-biringKi hara ni na so adong parmahan ni halahi. Hamu angka parmahanKu nada kehe hamu manjalahi angka biri-biringKu. Hum dirimunu sandiri do disarihon hamu, nada diparate-atehon halahi hamu biri-biringKu.

⁹ Jadi tangihon hamu ma ale angka parmahan,

¹⁰ Au Tuhan Debata mandok tu hamu, musumunu do anggo Au. BuatonKu ma mangulahi angka biri-biringKi sian hamu nada Hupatola be hamu mamikirkon haporluanmunu sandiri. PaluaonKu ma angka biri-biringKi sian hamu, anso ulang be gabe panganonmunu halahi.’ ”

Parmahan na denggan

¹¹ Didok Tuhan Debata i ma, “Au sandiri noma manjalahi angka biri-biringKi jana pature-ture halahi,

¹² songon panjalahi ni sada parmahan jana na palagutkon angka biri-birina na marserak i lalu dipature-ture ia. ObanonKu ma halahi mulak sian sude inganan parserahan ni halahi di ari na golap jana na sial i.

¹³ ParuaronKu ma halahi sian tonga-tonga ni angka bangso dohot angka luat na asing jana palagutonKu lalu Huoban tu tano ni halahi sandiri. ParmahananKu ma halahi di angka dolok dohot angka batang aek ni Israel jana Hutogu halahi tu angka padang ruput na rata.

¹⁴ Satutuna do, Au paradehon di halahi angka padang ruput na napu di partoran dohot di angka rura ni tano Israel. Disi ma halahi maradian jana manjampali di bagasan sonang.

¹⁵ Au sandiri noma marmahani angka biri-biringKi, paradehon inganan paradianan ni halahi; Au Tuhan Debata madung mandok songon i.

¹⁶ JalahanKu ma na mago i, obanonKu mulak na lilu i, na margasa balutonKu, na marnyae ubatanKu; tapi anggo na mokmok dohot na gogo i abiskononKu, angke parmahan na mambaen na denggan do Au.

¹⁷ Tangihon hamu ma, ale angka biri-biringKu! Au Tuhan Debata mandok tu hamu, na giot uhumanKu hamu ganop be jana sirangonKu ma na burju sian na jahat, angka biri-biri sian hambeng.

¹⁸ Adong do sian tonga-tongamunu na so dabu rohana muda hum mangabiskon jampalan na jumeges, tapi dohot do muse mandegei ruput na so giot panganon ni halahi! Diinum halahi aek na lan, dung i dihorui halahi aek na so giot inumon ni halahi be!

¹⁹ Angkon ruput na didegean i noma jampalon ni biri-biringKu na asing i jana inumonna pe aek na horu i noma.

²⁰ Hara ni i, Au Tuhan Debata mandok tu hamu, ale angka biri-biri na mokmok, na giot ro ma Au manguhumi di tonga-tonga ni biri-biri na gogo dohot biri-biri na gale.

²¹ Manyosak-nyosak do hamu dohot manombengi tu biri-biri na marnyae, gabe morot halahi sian punguan ni biri-biri i.

²² Tapi Au sandiri paluahon biri-biringKi anso ulang dibaen be tu halahi hajingaron. UhumanKu ma angka biri-biringKi pasada-sada jana sirangonKu na burju sian na jahat.

²³ AngkatonKu ma parmahan laho marmahani halahi, i ma naposongKu si Daud, jana parmahanonnia ma halahi.

²⁴ Au Tuhan, gabe Debata ni halahi, jana raja na tudos tu si Daud i ma na gabe pangarajai ni halahi. Au Tuhan, madung mandok songon i.

²⁵ BaenonKu ma parjanjian dohot halahi na manjamin aman halahi. PaorotonKu ma sude binatang panyoro sian luat i sude, lopus aman angka biri-biringKi tinggal di padang-padang i dohot modom di harangan-harangan i.

²⁶ PasupasuonKu ma halahi jana paloasonKu maringanan humaliang dolokKu Na Badia i. LehenonKu ma di halahi udan muda dung porlu di halahi; i ma udan na parohon pasupasu tu halahi.

²⁷ Marbatui ma angka suan-suanan, marsuha ma angka ladang, jana sonang be ma ganop halak mangingani tanona sandiri. Muda dung Hugotap rante na manambat bangsongKi jana Hupalua halahi sian angka jolma na marhatobankon halahi, botoon ni halahi ma Au do Tuhan.

²⁸ Nada samunon ni angka bangso na so mananda Au be halahi, sanga dijomak angka binatang panyoro. Di bagasan sonang noma halahi mangolu, jana sada halak pe nada adong be na mambaen mabiar halahi.

²⁹ PanapuonKu angka ladang ni halahi anso ulang masa be haleon di luat i. Nada marlayas be halahi baenon ni angka bangso na asing.

³⁰ Jadi gabe botoon ni sude jolma ma, bangsongKu do hape Israel jana Au mangondihon halahi, Au Tuhan Debata madung mandok songon i.

³¹ Tutu ma, hamu do punguan ni biri-biringKu na Hubalanjoi. BangsongKu noma hamu, jana Au Debatamunu. Au Tuhan Debata madung mandok songon i.”