JEHESKIEL 32 - BIBEL JAMITA NA DENGGAN

Digambarkon dohot buaya raja ni Mesir

¹ Di tanggal sada bulan dua bolas di taon padua bolaskon hatiha habuangannami, didok Tuhan ma tu au,

² “Ale anak ni jolma parsantongkinan, lehen ma hata na karas paingotkon raja ni Mesir. Palalu ma tonangKon tusia, ‘Dipasuman ho dirimu dohot singa jara-jara di tonga-tonga ni angka bangso, hape sumanan dope ho tu buaya na marrondam-rondam di bagasan aek. Dihorui jana dikotori patmi do sandok batang aek.

³ Taran marlagut angka bangso, tangkuponKu ma ho dohot jalangKi, jana padiaronKu ma ho saraton ni angka bangso-bangso i tu darat.

⁴ OmpaskononKu ma ho tu tano jana suruonKu ma sude unggas maradu angka binatang sian tano on sudena mamangani ho.

⁵ Dung i gohanKu ma angka dolok bope rura dohot bangkemu na maderder i.

⁶ DuruskononKu ma mudarmi lopus maraek angka dolok jana digohi angka batang aek.

⁷ Taran Huabisi ho, holipanKu ma langit jana angka bintang pe rambon baenonKu. Mataniari i Hubunihon di balik ni ombun jana bulan i pe nada marsinondang.

⁸ Sudena tehe na torang na di langit i intopanKu jana portibi on manggolap baenonKu. Au Tuhan Debata madung mandok songon i.

⁹ Di na Huparentahon barita taringot tu hasesegomu di angka luat na so nitandamu dope, bahat ma bangso gabe sak rohana.

¹⁰ Satutuna do, tampulkononKu ma podangKu jana taluhononKu ho. Idaon ni angka raja-raja dohot angka bangso ma na Hubaen i maradopkon ho. Humitir be ma halahi hara ni biarna jana mangundordor hara ni na mabiar mate.’ ”

¹¹ Didok Tuhan Debata i ma tu raja ni Mesir, “Tampulkonon ma podang ni raja ni Babel tu ho.

¹² Angka tentara sian angka bangso na jingar suruonKu ma manyintak podang ni halahi lalu mamunu sude rayatmu. Abis ma gabe sisoada rayatmi dohot sandok na nipangasahonmu.

¹³ BanteonKu ma sude pahan-pahananmu di angka batang aek parminuman ni halahi. Nada horuan ni jolma sanga binatang be batang aek tu pudi on.

¹⁴ Jadi lan ma baenonKu angka batang aek na adong di luatmu jana denggan baenonKu mardalan. Au Tuhan Debata madung mandok songon i.

¹⁵ Muda dung Hubaen Mesir gabe halongonan na lungun, jana Humatehon sude na adong disi botoon ni halahi ma Au do Tuhan.

¹⁶ Sipaingot na koras on ma gabe ende siluluton. Endehonon ni angka dadaboru na sian bangso na asing ma i, patandahon siluluton tu Mesir, dohot sude rayatna i. Au Tuhan Debata madung mandok songon i.”

Inganan ni halak na mate

¹⁷ Di tanggal lima bolas bulan sada taon padua bolaskon habuangannami, didok Tuhan ma tu au,

¹⁸ “Ale anak ni jolma, mangandung ma ho hara ni rayat na di Mesir. Tongoskon ma halahi tu inganan ni jolma na mate rap dohot angka luat na gogo-gogo na asing i.

¹⁹ Dokkon ma tu halahi, ‘Diambang hamu do lakna hamu ma na jumogi? Manuat ma hamu tu inganan ni jolma na mate, jana dipapodom di antara ni angka jolma na so mananda Debata.’

²⁰ Mate noma bangso Mesir rap dohot angka halak na mate di bagasan parporangan. Madung singkop sada podang laho mamatehon halahi sudena.

²¹ Mardongan jop ni roha sambuton ni angka ulubalang na barani dohot angka jolma na marporang mandongani halak Mesir ma haroro ni halak Mesir di inganan ni halak na mate. Marsurak ma halahi songon on, ‘Madung marmatean angka jolma na so mananda Debata i di bagasan parporangan. Saonnari ro do halahi tuson jana modom dison!’

²² Asur pe modom do disi dihuliangi angka parajuritna. Na mate di parporangan do halahi sudena.

²³ Kuburan ni halahi ma na umbagas di inganan ni jolma na mate. Anggo taran mangolu, bajoraon do sude portibi on dibaen halahi.

²⁴ Disi do Elam dohot sude rayat na bahat di humaliangna: Mate tarbunu do halahi sude, mate hara ni podang, i ma angka na so marsunat manuat tu banua toru, na mambaen sihabiaran di tano ni halakna mangolu. Rap manaon dosana be do halahi dohot angka halak na manuat tu tanoman.

²⁵ Di antara ni halak na mate tarbunu diparade do podoman di halahi bope di sude rayat na bahat i humaliang tanomanna; halak sude, mate tarbunu hara ni podang. Hara ni habiaran maradopkon halahi madung adong di tano ni halak na mangolu, jana ditaon halahi do dosana rap dohot halak na tuat tu tanoman; dibaen do halahi di tonga-tonga ni halak na mate tarbunu.

²⁶ Mesekh pe dohot Tubal disi do, dihuliangi kuburan ni angka parajurit ni halahi. Nada jolo marsunat, marmatean do halahi di bagasan parporangan. Taran mangolu, mabiar do halak di portibi on dibaen halahi.

²⁷ Nada maruli sangap halahi di na laho mangkubur i songon ulubalang narobi na manuat tu inganan ni jolma na mate na marsinjata singkop. Dikuburkon do angka ulubalang i mardongan podang di toru ni uluna dohot parince di ginjang ni andorana. Anggo taran mangolu sai mabiar do sude halak dibaen halahi.

²⁸ Laing songon i ma halak Mesir giot kuburkonon jana papodomon di tonga-tonga ni angka jolma na so marsunat jana na mate di bagasan parporangan.

²⁹ Edom pe disi do dohot sude raja maradu angka parkuasona. Anggo najolo angka parajurit na gogo do halahi, hape anggo saonnari modom do halahi di inganan ni jolma na mate rap dohot jolma na so mananda Debata dohot na mate di bagasan parporangan.

³⁰ Disi do sude angka anak raja na sian Utara, songon i muse angka halak Sidon. Anggo najolo mabiar do halak hara ni kuaso ni halahi, hape anggo saonnari dipaila do halahi jana nada jolo marsunat manuat ma halahi tu inganan ni jolma na mate rap dohot angka jolma na mate di bagasan parporangan. Disi ma halahi modom jana mananggung tihas rap dohot angka halak na manuat tu inganan ni jolma na mate.

³¹ Muda diida raja ni Mesir dohot tentarana i sude jolma na marmatean i di parporangan, tarapul ma roha ni halahi harana mate na dibunu ni podang do ia dohot tentarania ninna Tuhan Debata.

³² Au do na mambaen raja ni Mesir gabe patubu biar di angka halak na mangolu, hape anggo ia dohot tentarania i mate do i jana papodomon rap dohot sude halak na so marsunat dohot na mate di bagasan parporangan. Au Tuhan Debata madung mandok songon i.”