JEHESKIEL 31 - BIBEL JAMITA NA DENGGAN

Digambarkon do Mesir songon sampinur Libanon

¹ Di tanggal sada bulan tolu di taon pasabolaskon hatiha habuangannami, didok Tuhan ma tu au,

² “Ale anak ni jolma parsantongkinan, palalu ma jolo tonangKon tu raja ni Mesir dohot tu sude bangsona i: Na lobi ma antong hagodanganmu! Nada adong be na gabe tudosanmu!

³ Songon sampinur Libanon do ho na jagar gok dangkana na rumbun boti na jeges. Bonana i tigor jana maningkos puncuna i jabat masuk ombun.

⁴ Magodang ia torus dibaen aek nada hurangan. Dilehen batang aek na di toru ni tano i do sipanganonnia, mandurusi sude uratna jana mangaehi angka hayu na asing-asingna.

⁵ Dibaen na so unjung hurang aekna simbur do tubu, ginjang dangkana. Sian sude hayu na adong di harangan i ma na gumincat tu ginjang an.

⁶ Marasari angka unggas na marrupa-rupa di rantingna. Binatang harangan mamopari di toruna. Sude bangso na godang na adong di portibi on marjugukan marsilaung di toruna.

⁷ Jeges do tatapon hayu i, bonana tigor, ginjang-ginjang dangkana i. Bagas uratna i masuk tu tano lalu tu mual ni aek di bagasan tano.

⁸ Angka hayu sampinur na di kobun ni Debata nada adong manandingisa, hayu haruaya pe nada bisa manyarupoi ranting-rantingna, sude hayu na di kobun ni Debata nada adong na manyarupoisa hara ni jegesna.

⁹ Au do mambaen ia songon i jogina dohot angka dangkana na ginjang i boti rumbunna. Sandok hayu na adong di kobun ni Debata mangiburu do rohana tusia.

¹⁰ Hara ni i, Au Tuhan Debata, pabotohon tu hamu sanga aha na giot masa tu hayu na lalu i puncuna tu ombun. Angke mur gincat ia, mur ginjang do rohania.

¹¹ Jadi na dung Hutulak do ia jana pasahatonKu ma ia tu halak na asing, na mambaen tusia hombar tu hajahatan na nibaennia.

¹² Tabaon ni tentara sileban na so umboto ampun ma ia lalu dipadiar sajo songon i. Madabu ma rantingna na mangkasopak i jana marrerak ma i di sude dolok dohot rura na saluat i. Sude bangso na maringanan di tanonia, markehean ma i manadingkon ia.

¹³ Marroan ma angka unggas jana songgop ma i di dangkana na marponggolan i, jana dege-degean ni angka binatang harangan ma angka dangkana i.

¹⁴ Tarjadi pe sudena i anso ulang marginjang ni roha do angka hayu na tubu di topi ni batang aek, ulang ma dipatimbo dirina lalu tu langit jana ulang ma sai marginjang ni roha. Angke sudena i madung dipasahat tu hamatean di toru ni tano rap dohot angka jolma na dung mate.”

¹⁵ Songon on do pandok ni Tuhan Debata i, “Muda dung manuat hayu i tu inganan ni halak na dung mate, suruonKu ma aek na di toru ni tano i mangalingkup ia tanda ni siluluton. TembohonKu pardalan ni batang aek jana sumpolonKu angka batang aek. Dibaen na dung mate do hayu i, paroonKu ma hagolapan tu ginjang ni angka Dolok Libanon jana malos baenonKu sude hayu na di harangan i.

¹⁶ Di hatiha Hupaijur hayu i tu inganan ni halak na mate, mangkutur do angka bangso baenon ni sora ni pardabuna i. Marjop ni roha ma sude hayu na adong di Eden dohot angka hayu pilian na di Libanon na dapotan aek marlobi-lobi, dohot angka na dung manuat tu toru ni tano, hara ni pardabu ni hayu i.

¹⁷ Udurhonon ni halahi ma i tu inganan ni halak na mate jana marlagut dohot halahi na dung parjolo madabu. Jana sudena na juguk najolo di toru ni hayu i, serakkonon noma i di tonga-tonga ni angka bangso.

¹⁸ Songon ise ma ho didok rohamu, marsangap dohot marhagodangan di tonga-tonga ni angka hayu di Eden? Hape ho noma tu banua toru rap dohot angka hayu di Eden, angkon payak ho di tonga-tonga ni halak pardosa rap dohot halak na mate dibaen podang. I ma pangalaho ni si Parao raja ni Mesir dohot sandok na nirajaanna. Songon i ma didok Tuhan Debata.”