JEHESKIEL 30 - BIBEL JAMITA NA DENGGAN

Mesir giot hona uhum ni Tuhan

¹ Mangkuling muse ma Tuhan, ning Ia ma:

² “Ale anak ni jolma, manyurirangi ma ho jana dokkon ma, “Songon on ma hata ni Tuhan Debata, mangandung ma ho: I ale! Madung ro arina.

³ Madung donok ari ni Tuhan, ari na golap, hatihana ma di angka bangso manjagit uhuman.

⁴ Ro ma arsak godang mandondoni Etiopia. Di Mesir giot masa ma parporangan. Maragean ma angka haul; sude luat i dirampas jana dibaen marsegoan.

⁵ Hona bunu muse ma di parporangan i angka tentara na niongkosan sian Etiopia, Lidia, Libia, Arab, Kub dohot angka jolma sian luat na gabe dongan ni halahi.”

⁶ Didok Tuhan Debata i ma, “Sian Migdol di Utara lalu tu Siene di Selatan, marmatean ma sude dongan ni Mesir di parporangan. Au Tuhan Debata i madung mandok songon i.

⁷ Gabe luat na mamolngit ma luat i di tonga-tonga ni angka luat na asing na mamolngit i, jana angka kotana pe gabe lobu noma.

⁸ Jadi muda Husurbu Mesir jana Hubunu sude donganna i, botoon ni halahi ma bahaso Au do Tuhan.”

⁹ “Muda dung dapot ari i, jana madung maronco Mesir, tongosonku ma angka utusan marhite angka kapal laho manyonggot halak Etiopia na topet lalap i, jadi gabe bajoaraon ma halahi. Ligi da, tutu do angkon ro ari i!”

¹⁰ Didok Tuhan Debata i ma, “PakeonKu ma Raja Nebukadnesar sian Babel laho mangaroncohon sandok sinadongan ni Mesir.

¹¹ Ro ma si Nebukadnesar rap dohot tentarana na jingar i jana roncohononna ma tano i. Pajoloon ni halahi ma mamorangi Mesir dohot podang, jana marragean ma angka bangke di luat i.

¹² PahiangonKu ma Batang aek Nil jana pasahatonKu ma Mesir sudena tu angka halak parjahat. SuruhononKu ma angka halak sileban mangabisi sude luat i. Au Tuhan, madung mandok songon i.”

¹³ Didok Tuhan Debata i ma, “Giot ropukanKu angka gana-ganaan dohot angka debata na di Mempis. Nada adong be tu joloan on raja di Mesir. Mabiar baenonKu sude halak na maringanan disi.

¹⁴ Sude Mesir; Patros sabola Selatan giot baenonKu mangalungun jana kota Soan na di Utara giot surbuonKu. Tebe kota sabungan i giot uhumanKu,

¹⁵ jana hamoraonna i abiskononKu. PalaluonKu ma hosomKu tu Sin, kota na gabe benteng ni Mesir i.

¹⁶ ParoonKu ma api di Mesir, humitir ma Sin jana hona rampas ma Tebe jana angka tembokna pe angkon martolbakan.

¹⁷ Marmatean ma panganon ni porang angka doli-doli ni kota Heliopolis dohot Bubastis, jana tangkuponna ma angka dadaboru.

¹⁸ Di ari i, di na Hupaujung sahala ni Mesir jana Hubuat kuasonia na nihagodangkonnia i, manggolap ma Tahpanhes jana tangkuponna ma angka dadaboruna.

¹⁹ Songon i ma baenonKu manguhumi Mesir, jadi gabe botoon ni halahi ma Au do Tuhan.”

Marujung ma sahala ni Mesir

²⁰ Di tanggal pitu bulan sada di taon pasabolaskon hatiha habuangannami, didok Tuhan ma tu au,

²¹ “Ale jolma parsantongkinan, madung Hutipulkon tangan ni raja ni Mesir, jana nada adong na mambalut tanganna i sanga mangarutsa anso malum jana sumuang margogo laho maniop podang mangulahi.

²² Au Tuhan Debata mandok: Musu ni raja ni Mesir do Au, jana tanganna na dua i giot tipulkononKu, na margogo i bope na dung maponggol i. Jadi gabe madabu ma podang i sian tanganna i.

²³ PaserahonKu ma halak Mesir tu sude portibi on.

²⁴ Jadi pargogoanKu ma tangan ni raja ni Babel, jana Hubaen podangKu di tangannia i. Tapi anggo tangan ni raja ni Mesir i tipulkononKu ma i lopus mangarar ia jana mate di adopan ni raja ni Babel, musuna i.

²⁵ Satutuna do giot pagaleonKu raja ni Mesir, tapi anggo raja ni Babel giot pargogoanKu. Muda jabat Hulehen podangKu tusia, jana ditampulkon ia podang i adop Mesir, gabe botoon ni halahi ma Au do Tuhan.

²⁶ PaserahonKu ma halak Mesir tu sandok portibi on. Jadi gabe botoon ni halahi ma, Au do Tuhan.”