JEHESKIEL 3 - BIBEL JAMITA NA DENGGAN

¹ Didok Ia ma, “Ale jolma parsantongkinan, pangan ma balunan ni karotes i, kehe ma ho jana mangkuling ma ho tu angka halak Israel.”

² Dung i hupangangang ma pamanganku jana dilehen Debata ma balunan ni karotes i tu au anso hupangan.

³ Didok Ia ma, “Ale jolma parsantongkinan, pangan ma i! Pamasuk ma balunan ni karotes on tu butuhamu.” Jadi hupangan ma karotes i jana tonggi do daina songon aer ni loba.

⁴ Didok Ia ma mangulahi, “Ale jolma parsantongkinan, kehe ma ho mandapotkon angka halak Israel jana palalu ma sude na Hutonahon tu halahi.

⁵ Tu halahi do ho Husuru, nada tu bangso na maol hatana, tapi tu pinompar ni Israel do.

⁶ Nada tu angka bangso parhata na so ni astuan, sanga pardila na hallang na so niastuanmu angka hatana. Sugari tu halahi ho Husuru, anggo halahi tangihononna do ho.

⁷ Tapi anggo bangso Israel nada ra manangihon na nidokmu, salangkan Au so ditangihon halahi. Sijogal roha do halahi sude jana sai mangalo.

⁸ Hupatogu pe rohamu mangalo hajogalon ni roha ni halahi jana Hubahen pe ho songon bosibaja maradopkon hajogalon ni roha ni halahi.

⁹ BahenonKu ma ho pir songon togu ni batu mamak dohot songon batu intan, anso ulang mabiar ho mida angka hajogalon ni roha ni halahi.”

¹⁰ Didok Ia muse, “Ale jolma parsantongkinan, tangkas ma parrohahon jana ingot ma sudena na giot sidokkononKu tu ho.

¹¹ Kehe ma ho mandapotkon bangsomu na di habuangan i jana palalu ma sanga aha na Hudok tu halahi, Au Tuhan Debata do mandok, sanga na ra pe halahi manangihon sanga nada.”

¹² Dung i dioban Tondi Ni Debata ma au jana di pudingku hubege ma sora mangaronggur na mandok, “Puji ma hamuliaan ni Tuhan di banua ginjang!”

¹³ Hubege do sora ni habong ni angka mahluk i na padais-dais i, dohot sora na gumarutak sian angka roda i na tudos tu gogo ni sora ni lalo.

¹⁴ Sun ma gogona didapotkon kuaso ni Tuhan i au jana taran na diangkatNa i au lalu dioban tondiNa i, paet jana milas ma huhilala ate-atengku.

¹⁵ Jadi lalu ma au di inganan parpunguan ni angka halak buangan na di Tel-Abib na di topi ni Batang aek Kebar. Pitu ari honokna tinggal au disi; ngangang-ngangang noma au hara ni sude na baru hubege dohot na huida i.

Ditodo Tuhan si Jeheskiel gabe panjago ni Israel

¹⁶ Dung salpu pitu ari, didok Tuhan ma tu au,

¹⁷ “Ale jolma parsantongkinan, Huangkat ma ho gabe panjago ni Israel. Palalu ma tu halahi sipaingot on.

¹⁸ Muda Hupaboa tu ho, na giot mate sada halak parjahat, hape nada dipaingot ho ia anso dipauba ia pangalahona anso mangolu ia nian, mate ma ia tutu songon sada halak pardosa, tapi patunda ni hamamatenia i, sian ho do i tungguon.

¹⁹ Muda dipaingot ho halak na jahat i hape nada ra ia mantak mambaen na jahat, mate do ia nian songon halak pardosa, tapi anggo ho sandiri mangolu do.

²⁰ Muda dipungka sada halak na burju mambaen dosa, jana Hupaadop ia tu batu partuktuhan, mate ma ia. Hara ni na so dipaingot ho ia, mate ma ia di bagasan dosana, jana angka pangalahonia na denggan i nada ingotonKu be i. Tapi anggo patunda ni hamamatenia, sian ho do i tungguonKu.

²¹ Muda dipaingot ho halak na burju i anso ulang mambaen dosa jana diihutkon ia sipaingotmu, nada uhumanKu be ia jana mangolu ma dohot ho.”

Gabe ngungu ma si Jeheskiel

²² Songon i ma gogona huhilala haroro ni Tuhan jana hubege ma didok Ia tu au, “Jongjong ma ho jana kehe ma tu rura. Disi ma mangkobari Au dohot ho.”

²³ Jadi kehe ma au tu rura, jana huida ma disi sinondang na marsilo na patuduhon haroro ni Tuhan songon na huida di topi ni Batang aek Kebar. Dung i tungkap ma au tu tano,

²⁴ tapi masuk ma tu au Tondi i jana dipajongjong ma au. Didok Tuhan ma tu au, “Mulak ma ho jana manghurungi ma ho di bagas.

²⁵ Ale jolma parsantongkinan, tambaton noma ho dohot tali anso ulang tarbaen ho haruar jana anso ulang tarbaen ho marsuo dohot halak.

²⁶ BaenonKu ma jogal dilamu anso ulang tarbaen ho paingotkon bangso pangalo on.

²⁷ Sanoli on, muda manghobari Au mangulahi tu ho jana Hupasuang hamaloonmu manghobari, angkon palaluonmu do sanga aha na giot dokkononKu, Au Tuhan Debata giot mandok tu halahi. Tangihonon ni halahi do deba, tapi deba nari halahi nada manangihon, harana bia baenon bangso pangalo ma antong.”