JEHESKIEL 29 - BIBEL JAMITA NA DENGGAN

Uhuman tu Mesir

¹ Di tanggal dua bolas bulan sampulu, di taon pasampuluhon hatiha habuangannami, didok Tuhan ma tu au:

² “Ale anak ni jolma, gorahon ma raja ni Mesir. Dokkon ma tusia na uhumanKu ia dohot sude tano Mesir.”

³ Jana dohononmu ma: Songon on do hata ni Tuhan Debata, “Ligi ma, musumu do Au ale Raja Parao, raja ni Mesir, buaya na godang i na manggompang di tonga-tonga ni batang aek, na mandok: Au do nampuna Batang aek Nil jana au do mambaen i.

⁴ BaenonKu ma harihir di isang-isangmi jana lohotkononku angka ihan di sisikmi. Dung i Hutarik ma ho haruar sian Batang aek Nil dohot sude ihan na lohot di sisikmi.

⁵ Dung i Hudanggurkon ma ho dohot ihan i sude tu parhorsihan. Ompas ma pamatangmi tu tano jana gampalang ma ho disi. Sahalak pe nada adong na manguburkon ho. LehenonKu ma pamatangmi di angka unggas dohot binatang na asing anso dipapangani.

⁶ Jadi gabe botoon ni rayat ni Mesir ma sude, Au do Tuhan.” Didok Tuhan ma, “Ale bangso Mesir! Diarop roha ni halak Israel do pangurupimu hape hum songon tungkot na gale sajo do ho.

⁷ Taran marpangunsadean halahi tu ho maponggol do ho lalu masuk tu gidik-gidik ni halahi, gabe tarsilpok tanggurung ni halahi.

⁸ Hara ni i, Au Tuhan Debata mandok tu ho, tongosonKu ma tentara na giot mamorangi ho dohot podang, jana bunuonna ma halakmu dohot pahan-pahananmu.

⁹ Gabe tano na mamolngit noma Mesir. Jadi gabe botoonmunu ma Au do Tuhan.” Didok Tuhan ma, “Ale raja ni Mesir! Hara ni na nidokmu ho nampuna Batang aek Nil jana didok ho, ho do na mambaen batang aek i

¹⁰ gabe musumu ma Au, dohot musu ni Batang aek Nilmi. BaenonKu ma sude Mesir gabe tano na lungun mamungka sian Migdol di Utara lalu tu Siene di Selatan, saginjang ni angka batas tu parbalokan ni tano Etiopia.

¹¹ Nada adong jolma dohot binatang mamolussa. Opat pulu taon honokna nada adong jolma na maringanan disi.

¹² BaenonKu ma Mesir mamolngit lopus gabe Mesir ma na lumungun sian sude luat na lungun. Opat pulu taon honokna gabe buang angka kota ni Mesir, jumatjat sian sego-sego ni kota sanga na dia pe. BaenonKu ma bangso Mesir gabe angka pangungsi. Marsurak noma halahi tu sude luat jana maringanan di tonga-tonga ni bangso na asing.”

¹³ Didok Tuhan Debata i ma, “Ale bangso Mesir, dung abis siopat pulu taon i, obanonKu ma hamu mangulahi sian angka luat inganan na Hubaen parserahanmunu.

¹⁴ PasuangonKu hamu mangulahi jana suruonku maringanan di Mesir, i ma Patros sabola Selatan, tano asalmu. Pajongjong harajaan na gale ma hamu disi,

¹⁵ harajaan na gumale sian sandok tano on. BaenonKu ma hamu sun galena lopus nada tarbaen hamu be mamarenta angka bangso na asing.

¹⁶ Nada be mangido pangurupion Israel tu hamu. Taringot ma Israel paida-ida bagianmu, ale bangso Mesir, sanga songon dia liluna mangasahon Mesir, songon na dung unjung dibaensa. Jadi gabe botoon ni Israel ma, Au do Tuhan Debata.”

Giot taluhonon ni Raja Nebukadnesar ma Mesir

¹⁷ Di tanggal sada bulan sada di taon padua pulu pituhon hatiha ni habuangannami, didok Tuhan ma tu au,

¹⁸ “Ale jolma parsantongkinan, ro do Raja Nebukadnesar sian Babel mamungka porang tu Tirus. Disuru ia, angka parajurit mamorsan boban na lobi dokdok, jabat gabe palpalon ulu ni halahi jana helpat abara ni halahi, hape umpe bagia aha dapot raja i bope tentarania i sian haloloja na songon i.

¹⁹ Hara ni i, Au Tuhan Debata mandok: LehenonKu ma tano Mesir tu Raja Nebukadnesar. Samunon jana rampasonnia ma lalu obanonna sude sinadongan ni Mesir baen upa ni tentarania i.

²⁰ Hulehen tano Mesir tusia songon garar ni angka pambaenannia, dibaen madung karejo tentarania i tu haporluanKu. Au Tuhan Debata madung mandok songon i.

²¹ Muda tarjadi na songon i, baenonKu ma Israel margogo, jana bahenonKu ma ho mulak muse mangkobari di tonga-tonga ni halahi. Jadi gabe botoon ni halahi ma Au do Tuhan.”