JEHESKIEL 27 - BIBEL JAMITA NA DENGGAN

Ende andung-andung maradopkon Tirus

^1-3 Didok Tuhan Debata i ma tu au, “Ale anak ni jolma parsantongkinan, endehon ma sada andung taringot tu Tirus, na maringanan di labuan, jana na marboniaga dohot angka bangso di topi ni laut: Songon on ma hata ni Tuhan Debata, ‘Ale Tirus didok ho: Au ma kapal na sun jeges.’

⁴ Songon bagas do di ho anggo laut i. Dipajongjong ho songon kapal na jogi.

⁵ Dindingmu hayu ares sian Dolok Hermon tiang layarmu hayu sampinur sian Libanon.

⁶ Angka dayungmu dibaen halahi sian angka hayu na godang di Basan do i. Inganan ni juguhanmu dibaen sian tusam sian pulo Siprus do i asalna, na nipajagar dohot gading na arga.

⁷ Layar na gabe tandamu sian abit linen na ditonun di Mesir, na disulam marrupa-rupa. Halus ma tutu abit ni angka tandamu, tonunan Siprus na rara ungu.

⁸ Sian Sidon dohot Arwad do pandayungmu angka parlaut na malo-malo do anak buamu.

⁹ Angka tukang hayu na markarejo di kapal i ma angka na pande sian Gabal. Sian ganop luat marroan angka kapal laho marsambung di na marjagal.

¹⁰ Angka tentara sian Persia, Lidia dohot Libia masuk tu tentaramu. Dipargantungkon halahi parince dohot kupia baja ni halahi di angka tembok ni hutamu. Madung diurupi halahi pataluhon angka musu lalu manamba habonggalanmu.

¹¹ Angka tentara na sian Arwad manjagoi di tembok-tembokmu; angka palas-palasmu dikawal angka halak na sian Gamad. Margantungan angka parince ni halahi marderet-deret di tembokmu. Halahi ma patamba hajegesanmu.

¹² Digadisi ho ma angka barang-barang boniagamu na marlobi-lobi i, jana gararna dijagiti ho ma perak, bosi, simbora na bontar dohot na lomlom.

¹³ Marboniaga ho di Junani, di Tubal dohot di Mesekh jana gararna dijagit ho ma sian halahi angka hatoban dohot barang-barang na sian tumbaga.

¹⁴ Disambari ho ma angka barang-barangmu dohot kudo ni kareta, kudo tunggang dohot bagal na sian Bet-Togarma.

¹⁵ Halak na maringanan di Rodus pe marboniaga do dohot ho jana halak na maringanan di pasisir manobusi barang-barang jagalanmu marhite gading dohot hayu na lomlom.

¹⁶ Angka parboniaga sian Siria manobusi angka barang-barang boniagamu dohot angka suhamu na bahat i. Digarari halahi ma i dohot simata na sian batu zamrud, abit na rara bunga torung, abit na marsulam, linen na halus, simata na sian batu koral dohot batu na rara dalimo.

¹⁷ Juda dohot Israel manukar barang jagalanmu dohot gandum, aer ni loba, miak zetun dohot angka parmasak.

¹⁸ Halak Damaskus marboniaga dohot ho hara ni bahatna suhamu, hara niragam ni angka barangmu na bahat i. Anggur na sian Helbon, imbulu ni biri-biri sian Sahar.

¹⁹ Jana ditukarkon halahi do anggur gonti ni angka barangmu, bosi na dung ditopa sian usal, hayu dohot tobu pe adong do di barang jagalanmu.

²⁰ Halak Dedan manggarar barang-barangmu dohot abit-abit ni palano.

²¹ Halak Arab dohot na mangarajai tano Kedar, ditobusi do barang-barangmu dohot anak ni biri-biri, biri-biri jantan dohot hambeng.

²² Laho manobusi angka barang-barangmi diobani angka parboniaga na sian Seba dohot Raema do angka parhiasan, sere dohot parmasak na dumenggan.

²³ Kota Haran pe, Kane, Eden angka parboniaga na sian Seba, angka kota ni Asur dohot Kilmad, marboniaga do i sude dohot ho.

²⁴ Digadisi halahi do tu ho angka pakean sigodang arga, abit na rara bunga torung, abit na marsulam, angka parmadani na marrupa-rupa tompana, dohot angka ragam ni tali na togu.

²⁵ Marbaris-baris do kapal maroban barang-barang boniagamu. Songon kapal do ho na sorat marmuat, kapal na mamolusi laut na sun bolak.

²⁶ Dioban angka pandayung ma i tu laut na so marbatas. Ditondong alogo Habincaran na manggosa-gosa.

²⁷ Sude barang boniaga muatanmi, sandok parlaut songon i anak buami, sude tukang hayu dohot saudagarmi, ganop tentara na di kapal i, halahi sudena mago bonom, di hatihamu harom.

²⁸ Umbege sora angguk-angguk ni angka parlautmi, humutur ma angka tano na ditopi ni laut i.

²⁹ Saonnari tading ma kapal i mandarat sude parlautmi.

³⁰ Ditangisi halahi bagianmi humolos jana lungun mangandungi. Disampakkon halahi abu tu uluna jana margiling di abuan tanda ni arsakna.

³¹ Hara ni ho dicukur halahi uluna mamake abit goni hara ni gok ni arsakna. Lungun noma partangis ni halahi jana diandungi halahi bagianmi.

³² Dung i diandungkon halahi ma songon on mangandungi ho: Ise ma na songon Tirus, na dung diagohon di tonga ni laut?

³³ Taran diadangi ho angka laut mardongan muatan na gok, digohi ho do haporluan ni angka bangso; angka raja pe dibaen ho do makayo hara ni bahat ni barang-barangmu.

³⁴ Saonnari na dung bonom do ho, magopu di tandolan ni laut ho. Sude paranganmu maradu dohot muatanmu mago rap dohot ho di tonga-tonga laut.

³⁵ Sude halak na maringanan ditopi ni laut humitir umbege bagianmi. Angka raja ni halahi pe sun biarna; tarida di bohi ni halahi langan hara ni biarna.

³⁶ Limpot noma ho sapanjangna. Angka parboniaga di sandok tano on gabe tarsonggot hara ni biarna betak sai ro bagian sisongon i, tung na dangol do ujungmu mago ma ho salolot-lolotna.”