JEHESKIEL 25 - BIBEL JAMITA NA DENGGAN

Hasurirangon taringot tu uhum maradopkon Amon

¹ Didok Tuhan ma tu au,

² “Ale anak ni jolma parsantongkinan, paadop ma bohimu tu halak Amon, jana manyurirangi ma ho mangalo halahi!

³ Suru ma bangso i manangihon sanga aha na Hudok, Au Tuhan Debata mandok tu halahi, ‘Sonang do rohamunu paida-ida inganan na badiangKu dipahodar dohot tano Israel disegohon jana halak Jahudi dioban tu habuangan.

⁴ Hara ni i, padiaronKu ma hamu ditaluhon angka marga-marga ni bangso na sian halongonan Habincaran. Pajongjongon ni halahi ma angka undung-undung di tanomunu lalu tinggal disi maringanan. Papanganan ni halahi ma angka parbatu ni suan-suananmunu jana inumonna susu ni pahan-pahananmunu.

⁵ PaubaonKu ma kota Raba gabe parmahanan ni unto, jana tano Amon sudena Hubaen gabe inganan parmahanan ni biri-biri. Jadi gabe botoonmunu ma Au do Tuhan.’ ”

⁶ Mangkuling ma Tuhan Debata i, “Martopapi hamu marjop ni roha. Layas diida hamu tano Israel i.

⁷ Jadi hara ni i, pasahatonKu ma hamu tu bahat bangso na giot manyamun dohot mangarampasi sude sinadonganmunu. Jorbut baenonKu mangabisi hamu, lopus nada be sada bangso hamu jana nada be adong tanomunu sandiri. Jadi gabe botoonmunu ma Au do Tuhan.”

Hasurirangon taringot tu uhuman maradopkon Moab

⁸ Didok Tuhan Debata i ma, “Pandok ni Moab sarupa tu angka bangso na asing do anggo Juda i.

⁹ Jadi hara ni i anggo angka kota na mampartahankon angka parbalohan na tu Luat Moab padiaronKu do porangan ni musu maradu angka kota na jumeges pe, i ma: Bet-Jesimot; Baal-Meon dohot Kiryataim.

¹⁰ PadiaronKu ma angka marga ni bangso na sian Habincaran manaluhon Moab dohot Amon, lopus nada be marrumang sada bangso Moab.

¹¹ Hona uhum baenonKu Moab, gabe botoon ni halahi ma bahaso Au do Tuhan.”

Hasurirangon taringot tu uhuman maradopkon Edom

¹² Didok Tuhan Debata i ma, “Mambaen hasalaan godang do Edom hara ni kejamna pambaen ni halahi maradopkon Juda, di na palalu hosom halahi.

¹³ Hara ni i Hubaen boa-boa na giot uhumanKu Edom jana bunuonKu ganop jolma dohot sandok pahan-pahanan na adong disi. Mamolngit baenonKu sude tano i, sian kota Teman lopus tu kota Dedan; marmatean ma halahi hara ni podang.

¹⁴ PakeonKu Israel laho palalu hosom maradopkon Edom, jana pamasaon ma tu Edom hombar tu parpiar ni murukKu. Botoon ni Edom ma sanga songon dia daina na gabe hahonaan ni murukKu. Au Tuhan Debata madung mandok songon i.”

Hasurirangon taringot tu uhuman maradopkon Pilistin

¹⁵ Didok Tuhan Debata i ma, “Dibaen halak Pilistin do pamaloson na jorbut tu musuna na dung marsundut-sundut jana marjop ni roha halahi marnida hamamago ni halak Israel.

¹⁶ Hara ni i pabotohononKu ma paboa na giot serangonKu noma angka halak Pilistin jana abiskononKu halahi. BunuonKu sandok jolma na maringanan di luat na di topi ni laut di tano Pilistin.

¹⁷ UhumanKu ma halahi dokdok sajo jana palaluonKu hosomKu lopus dabu rohangKu. Muda dirasoi halahi rimasKu, botoon ni halahi ma bahaso Au do Tuhan.”