JEHESKIEL 18 - BIBEL JAMITA NA DENGGAN

¹ Didok Tuhan ma tu au,

² “Biasi laing torus dipardokkon-dokkon halak pandohan na songon on di Israel? ‘Amangna do mangankon batu na ancom, hape angka dakdanakna do ngiluan.’

³ Hara ni Au na mangolu, ninna Tuhan Debata nada be sidokkonon pandohan i di Israel.

⁴ Satutuna, Au do nampuna tondi ni sude! Tondi ni ama bope tondi ni anak Au do nampunasa! Jana halak na mardosa, i do na angkon mate.

⁵ Umpamana adong ma jolo halak na denggan, burju jana tigor.

⁶ Nada disomba ia gana-ganaan ni halak Israel sanga mangankon haul di angka inganan parsombaan tu debata. Nada jungada digoda ia dadaboru ni halak sanga modom rap dohot dadaboru na ro bulanna.

⁷ Nada jungada ia mangicu sanga manangko. Angka barang jaminan ni utang ni halak tusia sai dipaulak ia do. Halak na malean dilehen ia do mangan jana halak na so marpakean, dilehen ia do parabiton.

⁸ Nada jungada pasalihon ia mardongan bunga. Nada ra ia mambaen hajahatan, jana di bagasan sude parsalisian dibaen ia do haputusan na tigor.

⁹ Dioloi ia do na Huparentahon jana dipatulus ia do angka uhumKu. Jolma na songon i ma da na tigor jana na giot totop mangolu. Au Tuhan Debata madung mandok songon i.

¹⁰ Tapi umpamahon ma adong dakdanak ni bayo i na sai manangko, mambunu dohot mambaen hajahatan na asing na,

¹¹ so unjung dibaen amangna i. Dipangan ia pelean na disombahon di angka inganan parsombaan ni angka debata. Digoda jana diangkupi ia modom dadaboru ni halak.

¹² Giotnia ma mangicu halak na pogos, manangko, mambuat barang jaminan ni halak na marutang tusia. Kehe ia tu angka bagas pamelean ni halak na so mananda Tuhan jana disomba ia gana-ganaan sihagigian.

¹³ Painjamkon pe ia angkon marbunga. Mangolu ma he giot ni jolma na songon i? Nada! Dibaen ia do sude parbuatan hagigian i, jana na giot mate do i! Jana parbuatanna sandiri do mambaen hamateannia.

¹⁴ Umpamahon ma adong anak ni halak sibaen na jahat i, jana diida anaknia sude parbuatan ni amangnia tapi nada ditiru ia.

¹⁵ Nada ra anakna i manyomba gana-ganaan ni halak Israel sanga mangankon haul na dipelehon di angka inganan parsombaan ni angka debata. Nada jungada digoda ia dadaboru ni halak,

¹⁶ sanga manyosak sanga mangarampas sanga na ise pe. Angka barang ni halak na marutang tusia pe sai tongtong do dipaulak ia. Dilehen ia do mangan halak na malean jana halak na so marbaju dilehen ia pakean.

¹⁷ Na so jungada do dibaen ia na jahat sanga na painjamkon ia mardongan bunga. Burju do ia mandalankon angka tona na sian Au jana dioloi ia do na Huparentahon. Nada mate anakna i hara ni angka dosa ni amangna, tapi laing tongtong do mangolu.

¹⁸ Sabalikna amangna i na sai tagi mangicu, manangko dohot mambaen hajahatan na asing, mate ma i hara ni angka dosa na nibaenna sandiri.

¹⁹ Tapi ra adong do halak na marsapa biasi nada dohot anakna i mananggung panginona ni angka dosa ni amangna i. Anggo alus ni i, songon on do: Angke burju jana tigor do antong anaknia i. Burju do dioloi angka tona na sian Au jana torus do i didalankon ia, jadi gabe tongtong ma ia mangolu.

²⁰ Sanga ise na mambaen dosa, ia ma na giot mate. Nada angkon sai tanggungon ni anak panginona ni dosa ni amangna; sabalikna muse, ama pe nada angkon sai tanggungonna panginona ni angka dosa ni anakna. Sanga ise na burju jagitonna balos na denggan hara ni pambaenanna na denggan. Jana halak na jahat, jagitonna ma parkancitan patunda ni hajahatanna i.

²¹ Muda nada be mambaen dosa sada halak parjahat, jana dipungka ia ma mandalankon angka tona na sian Au, jana dipatupa ia pangalaho na denggan jana na tigor, nada mate be ia.

²² Diampuni ma sude dosania i; mangolu ma ia hara ni na mambaen na tigor.

²³ Adong he didok rohamu, Au Tuhan Debata marsonang ni roha muda mate halak na jahat i? Nada songon i! GiotKu nian ditadingkon ia ma angka dosania anso laing mangolu ia.

²⁴ Tapi muda adong sada halak na burju na so mambaen na denggan be, jana na mambaen hajahatan dohot sude pangalaho si hagigian na dihasomalkon ni halak na jahat, torus ma he ia mangolu? Nada! Sada pe sian angka pambaenannia na denggan i, nada adong be siingoton. Mate noma ia patunda ni na mambaen dosa dohot hara ni na so burju tu Au.

²⁵ Betak adong muse na mandok di bagasan rohana songon on, ‘Sala do na nibaen ni Tuhan i.’ Tangihon hamu ma ale halak Israel! Na sala dehe na Hubaen i? Hamu do na sala.

²⁶ Muda nada be mambaen na denggan halak na burju, jana mamungka ia mambaen na jahat, mate noma i, hara ni hajahatan na nibaennia i.

²⁷ Tapi muda halak na jahat nada be mambaen dosa, tapi dipungka ia mambaen pangalaho na tigor dohot na denggan, malua ma hosana.

²⁸ Madung diboto ia torang sude pangalahonia lalu mantak ia mambaen dosa. Jadi di na songon i nada mate be ia, tapi tongtong noma mangolu.

²⁹ Jana hamu pe ale halak Israel, didok hamu na sala do na nibaen ni Tuhan. Tutu dehe sala na Hubaen i, ale Israel? Nada! Hamu do na marampalan!”

³⁰ Didok Tuhan Debata, “Ale hamu halak Israel, uhumanKu do ganop halak hombar tu pambaenanna be. Pauba hamu ma rohamunu sian angka dosamunu. Ulang padiar disegohon dosami dirimu.

³¹ Antak hamu ma sude hajahatan na nibaenmunu jana paimbaru hamu ma roha dohot pikiranmunu. Biasi angkon gumonan hamu mate?

³² Nada sonang rohangKu muda adong mate halak. Tadingkon hamu ma angka dosamunu i anso tongtong hamu mangolu. Au Tuhan Debata na mandok songon i.”