JEHESKIEL 17 - BIBEL JAMITA NA DENGGAN

Umpama taringot tu bona ni anggur dohot angka unggas rajawali

¹ Didok Tuhan ma tu au, “Ale jolma parsantongkinan caritohon ma tu halak Israel parumpamaan.

² Ale anak ni jolma parsantongkinan, hatahon ma sada umpama tu Israel.

³ Anso diboto halahi na hudok: Adong ma sada unggas rajawali na godang, na jeges imbuluna, jana habongna i ginjang boti gogo. Habang ma ia tu Dolok Libanon, jana ditipulkon ia ma sada pusuk ni sada sampinur,

⁴ lalu dioban ia ma i jana dipayakkon ia di kota parboniagaan na ribur.

⁵ Dung i dibuat ia ma sada bona ni suan-suanan na poso sian tano Israel jana disuan ia ma i di tano na napu na so unjung hurang aekna.

⁶ Jadi gabe bona ni anggur ma suan-suanan i na toruk partubuna jana sarmak panjururna. Adop rajawali i do angka dangkana i jana uratna i togu do masuk tu bagasan tano i. Sarmak sajo do bona ni anggur i.

⁷ Dung i adong muse ma rajawali na asing; ginjang habongna jana hapal imbuluna. Dung i, dipaadop bona ni anggur i ma angka uratna i dohot angka dangkana i tu unggas rajawali na baru ro i mardongan arop ni roha anso ra nian unggas i mangalehen tusia aek na umbahat sian na adong di ladang i.

⁸ Hape nian tarsuan di tano na napu do anggur i mardongan aek na marsonang-sonang gabe tarbaen ia marbulung na sarmak, ramos marbatu jana gabe bona ni anggur na denggan.

⁹ Jadi gabe marsapa ma au tu Tuhan Debata songon on: Tarbaen dehe mangolu jana manjarampak bona ni anggur i? Nada he umpaton ni unggas rajawali na parjolo i angka uratna i, rurusonna batuna i, rampingkononna angka dangkana jana padiaronna i malos? So pola porlu bahat gogo sanga bangso na gogo laho mangumpat bonana i lopus tu angka uratna i.

¹⁰ Madung nian togu panyuanna, tapi tarbaen ma he torus tubu anggur i jana manjarampak? Nada he malos i muda dung mangombus alogo sian Habincaran? Nada he malos di inganan panyuananna i do anggur i?”

Hatorangan ni umpama i

¹¹ Didok Tuhan ma tu au,

¹² “Sapai ma tu angka pangalo i sanga na diastui halahi do umpama i. Palalu tu halahi bahaso na dung ro raja ni Babel tu Jerusalem, jana dioban ia raja ni Juda maradu angka halak na godang sian kota i tu Babel baen donganna.

¹³ Dung i dipili ia ma sada halak sian kahanggi ni raja ni Juda i mambaen parjanjian dohot ia jana marsumpa paboa na setia tusia. Ditaban raja ni Babel i ma angka halak na markuaso,

¹⁴ anso ulang bangkit be bangso Juda i boti laho manjamin paboa na dioloi halahi janji i.

¹⁵ Tapi manggagai do raja ni Juda i lalu ditongos ia utusan tu Mesir laho manjagit kudo dohot tentara na bahat. Manjadi ma he karejonia i? Padiaronna ma he ia malua? Nada tarbaen na mansoadahon parjanjian malua sian uhuman!

¹⁶ Hara ni Au na mangolu, ninna Tuhan Debata, mate di Babel noma raja ni Juda i, dibaen disoadahon ia do sumpania jana dilaosi ia parjanjiannia dohot raja ni Babel na mamili ia gabe raja.

¹⁷ Salang parangan ni tentara Mesir na sumurung i pe, nada tolapsa mangurupi ia sian pangaroro ni angka halak Babel na mambaeni tano timbunan dohot na mangkali bondar laho mambunu bahat halak.

¹⁸ Hara ni na mangalaosi ia di sumpa dohot janjinia, pola do sampe marsijalangan, gabe nada tarbahen ia be paluahon dirina.

¹⁹ Hara ni Au na mangolu, ninna Tuhan Debata: UhumanKu ma raja ni Juda hara ni na dung mangalaosi parjanjianna dohot raja ni Babel, hape na dung disumpahon ia do mangasahon goarKu paboa na oloannia i.

²⁰ SampakkononKu ma jala laho manangkup ia. ObanonKu ma ia tu Babel jana hona uhum disi baenonKu hara ni na so setia ia tu Au.

²¹ Tentarania na dumenggan i pe marmatean ma di parporangan, jana angka na tarbaensa malua paserakonKu noma i tu sude luat. Jadi gabe botoon ni bangsongKi ma, bahaso Au Tuhan madung mandok songon i.”

Dijanjihon Debata siaropon ni roha

²² On ma na nidok ni Tuhan Debata i: “Sian bona ni sampinur na gincat, talpohonKu pusukna, jana ponggolkononKu sada dangkana na haposoanna; Husuan dangkana i di dolok na gincatna i lalu tu ombun an.

²³ Di dolok na gumincat Hupayakkon ia. Martunas ma ia disi jana marbatu, gabe bona ni sampinur na jagar. Sude ragam ni unggas disi mambaen asar, jana marsilaung di toru ni linggomna.

²⁴ Botoon ni sude bona ni hayu na di luat i ma bahaso Au do Tuhan. Hayu na gincat Hutaba hayu na toruk Hubaen tubu gumincat. Hayu na rata Hubaen maradu hiang; jana hayu na mahiang Hulehen tunas dohot bungana. Au Tuhan, madung mandok hata, sude na Hudok i angkon tarlaksana.”