JEHESKIEL 16 - BIBEL JAMITA NA DENGGAN

Jerusalem na so setia

¹ Dung i ro ma muse hata ni Tuhan tu au:

² “Ale jolma parsantongkinan, patuduhon ma tu Jerusalem angka parbuatan na jorbut na nipambaenan ni halahi i.”

³ Disuru Tuhan Debata i ma au palaluhon tona on tu Jerusalem: “Ale Jerusalem, di tano Kanaan do ho sorang. Halak Amori do amangmu jana inangmu boru Het.

⁴ Hatiha parsorangmu, nada adong halak na mamonggol tali ni pusotmu, sanga mandidi ho, sanga mandaiskon sira tu ho, sanga mangulosi ho dohot abit.

⁵ Sahalak pe nada adong na maribo ni roha tu ho na mambaen angka na songon i tu ho. Di na sorang ho, nada adong na marholong ni roha tu ho, diambungkon do ho tehe di ladang hara ni gigina mida hosamu.

⁶ Dung i mamolus ma Au jana Huida ho marngeati di tonga-tonga ni mudarmu, tapi Hudok ma: Angkon mangolu do ho,

⁷ jana simbur magodang songon suan-suanan di ladang. Tibu do ho magodang jana tuk umurmu, hatiha haposoonmu pe madung salpu. Jadi tolmok ma adopmu, tubu ma obukmu, tapi salangsalang do ho.

⁸ Dung i mamolus ma Au sian i jana Huida ma ho, tutu, madung hatihana ho marhaposoon. Hupahembang ma abitKu tu ho laho mangulosi ho. Hubaen ma parjanjian dohot ho, songon i ma pandok ni Tuhan Debata, jana marhite na songon i Au ma nampuna ho.

⁹ Hubasu do ho dohot aek laho paiaskon mudar sian pamatangmu jana Hupasupasu ho dohot miak.

¹⁰ Dung i Hupapakehon ma tu ho baju gaun na marsulam, sipatu kulit na jumeges, panambat ni ulu sian abit linen dohot juba sutera.

¹¹ Hupajogi ho dohot simata intan, borgok dohot angka golang.

¹² Hulehen tu ho tintin ni igung, antinganting dohot jarunjung na jeges.

¹³ Songon i ma ho mamake barang sere dohot perak, pakeanmu pe na nibaen sian abit linen do dohot sutera na marsulam. Panganonmu pe roti na nibaen sian topung na dumenggan mardongan aer ni loba dohot miak zetun. Na santak ma jogi ni rupamu jana gabe ratu do ho.

¹⁴ Jadi tarbarita ma goarmu di sandok bangso hara ni hajogionmu na sanggam i, jana Au ma da na mambaen ho songon i jengkarna. Au Tuhan Debata madung mandok songon i.

¹⁵ Hape diparsayang ho hajogian ni rupami dohot hahuskuson ni goarmi. Modom do ho dohot halaklahi pamolus sanga na bia pe i.

¹⁶ Deba sian parabitonmi dipake ho do pajagarkon inganan parsombaan ni gana-ganaan. Gabe siboru jalang ho jana dipasahat ho pamatangmu tu ganop halaklahi.

¹⁷ Sian angka barang sere dohot perak na Hulehen i di ho, dibaen ho angka patung ni halaklahi, lalu markamainan ma ho dohot patung i.

¹⁸ Dipapakehon ho tu angka patung i pakean na marsulam na Hulehen i di ho. Dipelehon ho tu halahi miak zetun dohot dupangKu na Hulehen i tu ho.

¹⁹ Hulehen di ho sipanganon sian topung tarigu na dumenggan, aer ni loba dohot miak zetun na umpolin. Hape dipelehon ho do sudena i tu angka gana-ganaan i laho pasonangkon roha ni halahi. Au Tuhan Debata madung mandok songon i.

²⁰ Dung salpu i dipelehon ho muse ma angka dakdanakmu, halaklahi dohot dadaboru na ditubuhonmu di Au gabe haul tu angka gana-ganaan. Na diambang ho do parkaro na menek dope parkarosuanmon?

²¹ Madung disamboli ho huhut angka anakKu jana dilehen ho halahi gabe haul situtungon tu angka gana-ganaan i.

²² Di sude parkarejoanmu si hagigian i, songon anak boru na so hasaya, saotik pe nada di ingot ho be hatiha hamenehanmu, taran mansaemara ho jana marngeati di tonga-tonga ni mudarmu sandiri.”

Ngolu ni Jerusalem songon parhamainan

²³ Didok Tuhan Debata ma, “Marjaya ma ho! Marjaya situtu! Hara ni hajahatanmu.

²⁴ Boti muse, di balerong dohot di topi ni ganop dalan dipajongjong ho do angka inganan parsombaan ni gana-ganaan jana marhamainan ho disi.

²⁵ Dipahodar ho do hajegesonmu. Ditare-tarehon ho do pamatangmu tu sude halaklahi na mamolus jana nada marnamantak ho marhamainan.

²⁶ Mesir hombar balokmu na gogo marhamainan i, madung didongani ho modom marhamainan. Disangajo ho do marhamainan mangalap-alapi anso muruk Au.

²⁷ Saonnari ligi ma, uhumanKu ma ho jana buatonKu pasupasu na dung Hulehen humani tu ho. Hupasahat ho tu halak Pilistin na manghosomi ho jana na magigi mida pangalahomu na jat i.

²⁸ Tapi laing na so sombu dope rohamu; gabe dikojar-kojar ho dope halak Asur. Gabe diangkupi halahi ho marhamainan, tapi sian halahi pe laing nada dapot ho sombu ni rohamu.

²⁹ Dung i gabe diangkupi halak Babel parboniaga i ma ho marhamainan. Tapi halahi pe nada tuk mangalehen sombu ni rohamu.”

³⁰ Didok Tuhan Debata i ma, “Madung dipambaeni ho sudena i songon dadaboru parhamainan na so umboto hahaila.

³¹ Di balerong ni pasar dohot di topi ni sandok dalan dipajongjong ho do angka inganan parsombaan ni gana-ganaan jana marmainan ho disi. Tapi nada songon siboru jalang na somal ho manghaporluhon hepeng.

³² Ale ina-ina na markarosuan, na manghaol halaklahi na asing gonti ni halaklahimu sandiri.

³³ Sai manjagit garar do anggo siboru jalang, tapi anggo ho balik ni i do, ho sandiri do na mangaleheni silua tu angka haholongan ni rohami, dielek-elek ho dope tehe halahi anso marroan sanga na sian dia anso rap modom dohot ho.

³⁴ Tutu ma siboru jalang na sumalin ho. Nada adong na mamaksa ho gabe siboru jalang. So dilehen gararna tu ho, mur ho muse do na manggarari. I ma parsuharna tu ho.”

Uhuman ni Debata tu Jerusalem

³⁵ Hara ni i, ale siboru jalang! Tangihon ma hata ni Tuhan.

³⁶ Songon on do hata ni Tuhan Debata, “Madung dibuka ho bajumu jana songon siboru jalang dilehen ho pamatangmu tu angka haholongan ni rohamu dohot tu angka gana-ganaanmu sihagigian i. Dibunu ho angka dakdanakmu jana dipelehon ho tu angka gana-ganaan i.

³⁷ Jadi hara ni i, palagutonKu ma sude angka haholongan ni rohami humani, hasudungan ni rohamu dohot goyak ni rohamu. Jongjong ma halahi manghuliangi ho jana talgangan ni halahi ma sude pakeanmu, jabat idaon ni mata ni halahi pamatangmu na marsaemara i.

³⁸ UhumanKu do ho hara ni parhamainan dohot pamunuon na nibaenmi. Mate ma ho uhumanKu di bagasan muruk dohot rimasKu.

³⁹ Pasahatonku ma ho tu angka haholongan ni rohami jana rumpakkonon ni halahi ma angka inganan panggampanganmi dohot parsombaan ni gana-ganaanmi. Rampason ni halahi sude parabiton dohot barang seremu lopus marsaemara ho.

⁴⁰ Suruon ni halahi ma halak na bahat mandangguri ho dohot batu, jana ponggol-ponggolan ni halahi ma pamatangmi dohot podang.

⁴¹ Surbuan ni halahi ma angka bagasmu jana suruonna angka dadaboru manyaksihon paruhumanmu. Songon i ma baenonKu mangantak parhamainonmi. Nada be ho marbagi-bagi silua tu angka haholongan ni rohamu.

⁴² Dung mardalan pe i anso mombun rimasKu, jana mulak ma tenang Au. Nada muruk be Au sanga mangiburu.

⁴³ Hara ni na so diingot ho be hatiha haposoonmu, gabe muruk Au, tutu, dabuonKu ma uhum tu ho hara ni hajahatonmu, songon i ma didok Tuhan Debata. Nada he na markarosuan do ho muse di balik ni nasa pambaenanmu na nihagigihon i?”

Songon i inangna, laing songon i do dakdanakna

⁴⁴ Didok Tuhan ma, “Ale Jerusalem, pakeon ni halak ma umpama on tu hamu, ‘Songon i inangna, songon i muse do dakdanakna.’

⁴⁵ Tutu ma boru ni inangna ho. Goyak do rohania di halaklahinia dohot tu angka dakdanakna sandiri. Suman do ho tu angka parebanmu na margoyak ni roha mida halaklahina muse dohot angka dakdanakna sandiri. Ho sandiri dohot angka parebanmi, i ma angka kota na humaliang ho na marinahon boru Het jana maramahon halak Amori.

⁴⁶ Samaria na di Utara ma angkangmu dohot sude pagaranna. Jana anggimu ma Sodom na di Selatan dohot sude huta pagaranna.

⁴⁷ Sombu dehe dihilala ho mangihutkon indege ni halahi dohot maniru parange ni halahi sihagigian i? Nada podo! Santongkin nari jumorbut muse dope ho sian halahi.

⁴⁸ Hara ni Au na mangolu, ninna Tuhan Debata, satutuna, Sodom dohot sude huta pagaranna na so unjung dope songon jahatmi.

⁴⁹ Ginjang pe roha ni Sodom dohot angka huta pagaranna hara ni bahatna do balanjo simpanan ni halahi boti tenang do tarbaen halahi mangolu jana dame. Tapi nada diparrohahon halahi halak na pogos dohot na dangol.

⁵⁰ Bulbul do halahi jana jogal rohana jana dibaen halahi do sogo ni rohangKu. Jadi gabe Hugopu halahi songon na niidamu.

⁵¹ Samaria pe tutu jahat do, tapi nada adong satonga ni angka dosamu dosa ni halahi, umbahat dope hagigian dibaen ho sian halahi na dua, hara ni sude hajahaton na nibahenmu gabe hira na so marsala idaon angka angkangmi.

⁵² Taon ma salamu, ale ho, na panayangkon uhuman tu angkangmu; hara ni angka dosamu na umjorbut sian halahi, tumigor do halahi sian hamu. Padiar ma maila ho jana taon ma salamu angke hara ni ho gabe songon na so marsala idaon angka angkangmu.”

Patureon do Sodom dohot Samaria mangulahi

⁵³ Didok Tuhan ma tu Jerusalem, “BaenonKu do sonang mangulahi Sodom dohot Samaria maradu angka huta pagaranna i. Dung pe i anso Hubaen muse ho maduma mangulahi.

⁵⁴ Angkon maila sandiri ho mida dirimu, jana habileanmi ma na patuduhon tu angka parebanmi sanga songon dia denggan ni rasoki ni halahi.

⁵⁵ Sonang ma halahi dohot angka huta ni halahi mangulahi, songon i muse ho dohot angka hutamu.

⁵⁶ Nada he unjung do dipartatai ho Sodom taran ginjang rohamu

⁵⁷ jana dompak so habotoan dope hajahatanmu? Anggo saonnari sarupa do ho dohot ia; sipartataan ni halak Edom noma ho, halak Pilistin dohot angka hombar balokmu na asing i na margoyak ni roha mida ho.

⁵⁸ Angkon taononmu karejomu na hodar jana sihagigian i. Au Tuhan madung mandok songon i.”

Parjanjian na hot

⁵⁹ Didok Tuhan Debata i ma, “BaenonKu ma tu ho hombar tu karejomu, dibaen madung disoadahon ho sumpamu boti dilaosi ho parjanjianKu dohot ho.

⁶⁰ Tapi ingotonKu do parjanjian na dung Hubaen dohot ho taran di haposoonmu dohot na mambaen parjanjian na hot dohot ho salolot-lolotna.

⁶¹ Ingotonmu ma angka pambaenanmu jana maila ma ho muda Hupaulak angka parebanmi tu ho. BaenonKu ma halahi songon angka dakdanakmu haru pe nada masuk hian na songon i di bagasan parjanjianKu dohot ho.

⁶² BaenonKu ma parjanjian na imbaru dohot ho. Jadi gabe botoonmu ma bahaso Au do Tuhan.

⁶³ SesaonKu ma sude hasalaanmu, tapi nada tarhalupahon ho i jana ila ma rohamu laho mandok sanga na aha. Au Tuhan Debata madung mandok songon i.”