JEHESKIEL 14 - BIBEL JAMITA NA DENGGAN

Diuhumi Debata angka na marsomba gana-ganaan

¹ Ro ma tu au piga-piga halak angka pangitua ni bangso Israel laho manyapai sanga aha do lomo ni roha ni Tuhan.

² Dung i didok Tuhan ma tu au,

³ “Ale anak ni jolma, na dung dipasahat ni angka jolma on do ngoluna tu gana-ganaan gabe julung halahi tu bagasan dosa. Dia dope dalanna umbaen tu Au halahi marsapa?

⁴ Jadi hara ni i dokkon ma tu halahi bahaso Au Tuhan Debata martona songon on: ‘Sandok halak Israel na dung pasahat dirina tu gana-ganaan jana padiarkon dirina madabu tu bagasan dosa, dung i ro mangido sipaingot sian sada panurirang, alusanKu do i dohot alus na patut tu angka gana-ganaan na bahat i!

⁵ Sude gana-ganaan i padaohon bangsongKi do sian Au, tapi marhite alus i sai anggiat ma nian mulak bangsongKi tu Au.’

⁶ Laing paboa muse ma tu halak Israel bahaso Au Tuhan Debata mandok tu halahi, ‘Pauba ma rohamunu sian angka dosamunu jana tadingkon hamu ma angka gana-ganaanmunu sihagigian i.’

⁷ Sandok halak Israel dohot halak sileban na maringanan di tonga-tonga ni bangso Israel, na mandao sian Au jana kehe marsomba gana-ganaan, dung i ro muse mangido sipaingot tu sada panurirang, Au sandiri na mangalusisa.

⁸ Giot aloonKu halahi, jana baenonKu gabe sipatondit tu halak na asing. PaasingonKu i sian masarakat ni bangsongKu, jadi gabe botoon ni bangsongKi ma bahaso Au do Tuhan.

⁹ Muda adong sada panurirang hona tipu gabe dilehen ia alus na sala, Au Tuhan da na manipu ia. Au Tuhan giot paasingkon ia sian angka halak Israel jana agohononKu ia sian tonga-tonga ni bangsongKu Israel.

¹⁰ Sarupa do uhuman na giot jagiton ni panurirang i bope angka halak na manjagit sipaingotna.

¹¹ Hubaen pe sudena i, anso ulang mandao be nian halak Israel sian Au jana ulang be nian dipahodar halahi dirina markite-hite dosa. Jadi muda dung songon i, gabe bangsongKu ma halahi, jana Au gabe Debata ni halahi.” Au Tuhan Debata madung mandok songon i.

Si Noakh, si Daniel dohot si Job

¹² Didok Tuhan ma tu au: “Ale anak ni jolma,

¹³ muda mardosa sada luat nada setia tu Au, na giot uhumanKu do negara i. RoncohononKu ma bohal simpanan ni halahi, Huparo haleon potir jana Hubunu jolmana bope pahan-pahananna.

¹⁴ Haru pe maringanan disi si Noakh, si Daniel dohot si Job hum diri ni halahi sajo do tarpalua haburjuon ni halahi na tolu. Au Tuhan Debata madung mandok songon i.

¹⁵ Bolas do paroonKu angka binatang panyoro laho mamolgahi halak na adong di luat i, lopus gabe gok parmaraan luat i jana sahalak pe nada adong puluk mamolus.

¹⁶ Haru pe umpamana maringanan disi si Noakh, si Daniel dohot si Job, hara ni Au na mangolu, Tuhan Debata, nada tarbaen halahi paluahon sanga na ise pe, salang dakdanak ni halahi sandiri nada tarpaluasa. Hum halahi sajo ma i na malua, tapi anggo luat i angkon gabe halongonan noma.

¹⁷ Bolas jadi do Huparo porang tu luat i, lalu ningKu do, abisi ma tano i ho ale podang, gabe abis Hubaen sian i jolma dohot pahan-pahanan.

¹⁸ Jana haru pe maringanan disi sitolu halak nangkin, jadi hara ni Au na mangolu, Tuhan Debata, nada tarbaen halahi paluahon sanga na ise pe, salang anak ni halahi sandiri nada tarpaluasa. Hum halahi sajo ma i na malua.

¹⁹ Bolas jadi Huparo nyae masa tu luat i, jana palalu hosom au tu halahi lopus abis jolma sanga pahan-pahanan.

²⁰ Jana haru pe maringanan disi si Noakh, si Daniel dohot si Job, jadi hara ni Au na mangolu, Tuhan Debata, nada tarbaen halahi paluahon sanga na ise pe, salang anak ni halahi sandiri pe nada tarpaluasa halahi. Hum hosa ni halahi sajo do na malua hara ni haburjuon ni halahi.”

²¹ Didok Tuhan Debata i: “DabuhononKu ma uhuman na jumorbut tu kota Jerusalem laho mamusa jolma bope pahan-pahanan. Uhuman i, i ma: Porang, tangkuraparon, binatang panyoro dohot nyae.

²² Sugari rupani adong na luncat jana tarpaluasa angka dakdanakna, parrohahon hamu ma muda ro halahi tu hamu. Ligi hamu ma sanga na bia jahat ni halahi, jadi gabe botoon ni bangsongKi ma bahaso na tama do uhumanKu Jerusalem.

²³ Jadi apulon ni halahi ma hamu, harana ligionmunu ma dalan ni halahi dohot pambaenanna, anso ditanda hamu na adong do dalanna tu Jerusalem, ninna Tuhan Debata.”