JEHESKIEL 13 - BIBEL JAMITA NA DENGGAN

Alatan taringot tu angka panurirang pargabus

¹ Didok Tuhan ma tu au,

² “Ale anak ni jolma, gorahon ma angka panurirang ni Israel na mandok alatan sian tubu-tubu ni rohana sandiri. Tangihon ma hata ni Tuhan.”

³ Didok Tuhan Debata i ma, “Marjaya ma angka panurirang na oto i! Sian tubu-tubu ni rohana sandiri do dapotsa na niidana jana pargabus do parnidaanna i.

⁴ Ale Israel, nada marguna angka panurirangmunu i, tudos do i tu angka sorigala na mangolu di tonga-tonga ni halongonan.

⁵ Nada dijagohon halahi angka inganan ni tembok na marsegoan jana nada dipauli halahi muse angka tembok i. Jadi nada tarpartahankon anggo Israel, muda ro Tuhan di arina manguhumi.

⁶ Angka na so tutu do parnidaan ni halahi jana angka alatan ni halahi pe gabus sajo do. Pandok ni halahi tona sian Tuhan do na nioban ni halahi, hape Tuhan sandiri so jungada manyuru halahi. Bia ma he parjadina arop roha ni halahi tarjadi alatan ni halahi?

^7-8 Au Tuhan Debata mandok tu halahi, ‘Na pargabus do angka parnidaanmunu i jana gabus do angka alatanmunu. Didok hamu, tona sian Au do sudena i, hape so jungada Au mangkuling tu hamu! Hara ni i, gabe alomunu noma Au.

⁹ UhumanKu ma hamu, ale angka panurirang na pajojorkon alatan gabus dohot na marnipihon angka parnidaan! Na so tola be hamu dohot mambaen haputusan di bagasan angka sidang ni bangsongKu, sesaon noma angka goarmunu sian rayat ni Israel, jana nada mulak be hamu tu bona bulumunu. Jadi gabe botoonmunu ma bahaso Au do Tuhan Debata.’

¹⁰ Hamu angka panurirang pargabus! Madung dipalilu hamu bangsongKu marhite hata na nidokmunu, aman jana beres do sude. Hape saotik pe nada tutu songon i! Dipajongjong bangsongKi do tembok jana di baen halahi hapurna.

¹¹ Ale angka panurirang pargabus, matorgan do tembokmunu i. ParoonKu ma udan potir. Tondongan ni halingsungsung ma tembok i jana tinggangan ni ambolas

¹² lopus unggal, jana ganop halak sapa-sapa ma sanga aha gunana kapuron tembok i.”

¹³ Didok Tuhan Debata i ma, “Di bagasan rimasKu, paroonKu ma halingsungsung, udan potir dohot ambolas laho mangaloha tembok i.

¹⁴ Madung marniet Au laho mangarumpakkon tembok na nikapurmunu i, giot sarsarkononKu i lopus tinggal ojahanna i sajo. Dondonan ni tembok i ma hamu jana i noma mambaen mate hamu sudena. Jadi gabe botoonmunu ma bahaso Au do Tuhan.

¹⁵ Hilalaon ni tembok i ma dohot hamu na mangkapuri tembok i sanga songon dia gilap ni murukKu, sego ma tembok i jana mago ma na mangkapuri. Dung i paboaonKu ma tu hamu na dung sarsar tembok i laing songon hamu na mangkapuri i,

¹⁶ i ma angka panurirang na mandok taringot tu Jerusalem jana madung adong disia alatan taringot tu dame, hape nada adong dame.” Songon i ma pandok ni Tuhan Debata.

Alatan tu angka panurirang dadaboru pargabus

¹⁷ Didok Tuhan, “Saonnari, ale jolma parsantongkinan, parrohahon ma angka dadaboru paralatan di tonga-tonga ni bangsomu. Gorahon ma halahi,

¹⁸ jana palalu ma sanga aha na Hudok, Au Tuhan Debata mandok tu halahi: ‘Marjaya ma hamu ale angka dadaboru paralatan! Dipambaeni hamu di jolma sudena angka golang-golang ajimet dohot angka basaen sipatunduk anso tarrajai na mamakena i ngolu ni halak na asing. Sai giot markuaso do hamu di ngolu dohot hamamate ni bangsongKu jana mangahut tu diri do dipake hamu kuaso i.

¹⁹ Dipalayas hamu do Au di adopan ni bangsongKu hum anso dapotan hamu sanjomput bajaure dohot roti piga-piga ponggol. Angka halak na so marsala dibunui hamu, hape anggo halak na patut mate, dipadiar hamu mangolu. Anso tarbaen hamu na songon i, digabusi hamu ma bangsongKi jana porsaya ma halahi tu hamu.’ ”

²⁰ Mandok hata ma Tuhan Debata i tu angka dadaboru paralatan i, “Magigi Au paida-ida angka golang-golang ajimet na nipakemunu i laho mangarajai ngolu ni bangsongKi. RampasonKu ma angka golang i sian tanganmunu, jana paluaonKu ma angka na nipatundukmunu i.

²¹ Hurampas noma angka basaen sipatundukmunu i jana paluaonKu ma bangsongKi sian gogo ni hajahatanmunu salolot-lolotna. Jadi gabe botoonmunu ma bahaso Au do Tuhan.

²² Angka halak na burju na so adong Huhahua, dipahancit hamu ma roha ni halahi marhite pargabusonmunu i. Angka halak na jahat dipagodang hamu rohana anso tongtong mardosa boti anso ulang dipalua.

²³ Anggo saonnari marujung noma angka parnidaan gabus dohot angka alatanmunu na so tutu i. PaluaonKu ma bangsongKi sian gogo ni hajahatanmunu. Jadi gabe botoonmunu ma bahaso Au do Tuhan.”