HOSEA 8 - BIBEL JAMITA NA DENGGAN

Diuhum Tuhan Israel hara ni na marsomba tu gana-ganaan

¹ Didok Tuhan ma, “Palu ma sarune, paboa na ro parmaraan! Tudos tu halihi na manangkup soroanna do musu ro mamorangi tanongKi! Dilaosi bangsongKi do parjanjianKu dohot halahi jana dialo angka pangajaranKu.

² Haru pe didok halahi Au Debata ni halahi jana didok bahaso halahi do bangsongKu na mananda Au,

³ laing na so ra do halak Israel manjagit na denggan. Jadi hara ni i angkon ayak-ayahon ni musuna ma halahi.

⁴ Dipili bangsongKu do raja so jolo marsapa tu Au. Diangkat halahi pamimpin so dohot parbinotoanKu. Dibuat halahi do sere dohot perak ni halahi lalu dibaen patung ni gana-ganaan na mangalapi hamamago ni halahi sandiri.

⁵ Goyak rohangKu paida-ida lombu sere na nipasomba-somba ni halak kota Samaria. Marpiar do murukKu tu halahi. Sadia honok nari sai sombaon ni halahi torus gana-ganaan i?

⁶ Lombu sere na di Samaria i karejo ni tangan ni angka na pande do i di Israel! Nada Debata na nisomba ni halahi i, jadi angkon taporhonon do i!

⁷ Alogo do disabur bangsongKi, jadi manyabi halingsungsung ma halahi! Nada manggorsing ladang ni gandum ni halahi, gabe nada adong be topung suhana baen sipanganon. Tapi muda laing manggorsing ladang i, gabe abiskonon ni angka bangso-bangso na asing do gandumna i.

⁸ Songon barang na so diparhagiot halak, nada marguna be Israel, angke madung marcampur dohot angka bangso na asing.

⁹ Songon halode riar na sai mangalo, songon i ma halak Israel na sai mangihutkon giot-giotna sandiri. Dijalahi halak Efraim do bantuan sian Asur, jana digarari halahi pardonganon sian angka bangso sileban.

¹⁰ Tapi saonnari palagutonKu noma halahi jana nada be angkaton ni halahi sandiri raja sanga angka pamimpin ni halahi. Nada sadia honok nari ganggu ma halahi hara ni na hancitan, muda jabat ro raja ni Asur mamisat halahi.

¹¹ Mur bahat langgatan dipajongjong halak Israel laho manyesa dosa, mur bahat muse do inganan ni halahi laho mambaen dosa!

¹² Bahat sajo do Husuratkon pangajaran di halahi, hape ditulak halahi do sudena i angke nada adong dietong halahi hadomuan ni i dohot halahi.

¹³ Dihaulkon halahi do haul tu Au, jana dipangan halahi haul i, hape Au Tuhan nada manghajopkon angka haul i. Saonnari ingotonKu ma dosa ni halahi i jana uhumanKu noma halahi hara ni angka dosa i; tongosonKu ma halahi mangulahi tu Mesir!

¹⁴ Dipajongjong halak Israel angka bagas godang hape lupa halahi tu Panompa ni halahi. Dibangun halak Juda angka kota na marbenteng, hape paijuronKu ma api laho manyurbu lopus abis angka bagas godang dohot angka kota ni halahi i.”