HOSEA 5 - BIBEL JAMITA NA DENGGAN

¹ Didok Tuhan ma, “Tangihon hamu ma ale angka malim! Parrohahon ma ale halak Israel! Bege ma, ale hamu angka jolma pomparan ni raja! Madung didabu uhum tu hamu. Angke, sapatutna nian angkon tigor do hamu manguhumi, hape balikna i do gabe tudos tu jorgong do hamu di Mispa, songon jorat di Dolok Tabor,

² jana songon pilubang na bagas di kota Sitim. Hara ni i ma umbaen na giot uhumanKu hamu sudena!

³ Hutanda do ho, Efraim jana Huboto do sudena taringot tu ho, angke madung markarosuan ho, ale Israel; jana madung dipahodar ho dirimu.”

Sipaingot taringot tu na marsomba gana-ganaan

⁴ Patunda ni hajahatan na nibaen ni halak Israel, nada tarbaen halahi be mulak tu Debata ni halahi. Harana na marsomba gana-ganaan noma na manggohi roha ni halahi jana nada parduli be di Tuhan.

⁵ Torang do tarida bulbul ni bangso Israel jana i ma tanda ni hajahatan ni halahi. Dosa ni halahi do mambaen tartuktuk lalu tinggang Efraim, jana dohot do bangso Juda tinggang rap dohot halahi.

⁶ Haulkonon ni halahi ma biri-biri dohot lombu ni halahi baen haul di Tuhan, tapi nada marguna sudena i. Angke madung ditadingkon Tuhan halahi, jana nada tarbaen halahi be padumpang dohot ia.

⁷ Nada unduk halahi tu Tuhan, angke madung disorangkon halahi angka dakdanak gampang. Hara ni i, nada sadia honok nari abiskonon noma halahi dohot angka ladang ni halahi.

Porang antara ni Juda dohot Israel

⁸ Palu ma sarune di Gibea! Baen ma tanda ni pio-pio marporang di Rama! Surakkon ma surak-surak parporangan di Betel! Maju ma marporang, hamu halak Benyamin!

⁹ Abis ma Israel, angke madung dapot arina laho manguhum halahi. Tangihon hamu ma, rayat ni Israel, angkon tarjadi do na songon i.

¹⁰ Didok Tuhan ma, “Muruk do Au hara ni na diporangi ni angka pamimpin ni Juda jana dirampas halahi tano ni Israel. Hara ni i timpalkononKu ma uhuman tu halahi songon aek magodang.

¹¹ Marhancit do Efraim binaen ni uhuman, angke sai manggogo do ia mangihutkon na so marguna.

¹² I ma dalanna umbaen na giot roncohononKu bangso Israel jana abiskononKu halak Juda.

¹³ Torang do diboto bangso Israel dohot bangso Juda hajorbuton na masa di halahi, gabe kehe ma Israel tu Asur laho mangido bantuan sian raja bolon i. Hape nada haurupan raja i sanga tarpadenggan na masa tu halahi.

¹⁴ Songon singa na manyoro, songon i ma baenonKu marsurage Israel dohot Juda. Au sandiri do na giot manyibak-nyibak halahi lalu Hutadingkon. Muda Husarat halahi kehe, sada pe nada adong tarbaen palua halahi.

¹⁵ Angkon kehe do Au mulak tu ingananKu, lopus mangoku sala halahi jana manjalahi Au. Di bagasan pardangolan ni halahi gabe malungun halahi tu Au.”