HOSEA 3 - BIBEL JAMITA NA DENGGAN

Si Hosea dohot ripena na so tigor

¹ Didok Tuhan ma tu au, “Kehe ma ho mangulahi jana haholongi ma sada nari dadaboru panggampang. Haholongi ma i laing songon pangkaholongingKu di halak Israel haru pe ditadingkon halahi Au jana marsomba halahi tu angka debata boti sai dihaulkon halahi roti kismis tu gana-ganaan.”

² Jadi hutobusi ma ia di au, hulehen ma lima bolas hepeng perak songon tobusna dohot 150 kilogram bajaure.

³ Hudokkon ma tusia, “Lolot do ho tinggal rap dohot au nada manggampang be ho jana nada marhalaklahi; jana au on pe nada marhamainan dohot ho.”

⁴ Songon i muse ma pangalaho ni bangso Israel; lolot halahi mangolu tapi nada adong rajana, nada marpamimpin nada adong haul, nada adong gana-ganaan, jana nada adong efod dohot terafim.

⁵ Tapi ro do i hatihana mulak bangso Israel tu Tuhan Debata ni halahi dohot tu raja ni halahi na sian pomparan ni si Daud. Jadi gabe mabiar ma halahi jana marhabiaran tu Tuhan boti jagiton ni halahi ma angka pasupasuNa.