HOSEA 11 - BIBEL JAMITA NA DENGGAN

Dihaholongi Tuhan bangsoNia na jahat i

¹ Didok Tuhan ma, “Huhaholongi do Israel mamungka sian hamenehannia, Hupio anakKi ruar sian Mesir.

² Tapi mur Hupioi anakKi mur mandao do ia sian Au. Dioban ia haul jana ditutung ia dupa di Baal dohot di angka debata na asing.

³ Hape Au do mangajar si Jakob mardalan, jana Huhaol ia mardongan holong ni roha. Au do na pature-ture ia hape nada ra ia mangokuisa.

⁴ Mardongan ihot-ihot holong ni roha, Hutarik halahi tu Au. Songon na mangangkat auga do Au di halahi. Hupaunduk do tu halahi laho marmamasa.

⁵ Nada ra mulak angka halak Israel i tu Au, jadi hara ni i, angkon mulak tu Mesir halahi jana parentaon ni bangso Asur halahi.

⁶ Mangararati ma parporangan lopus tu angka kota ni halahi, bungkaron ma angka pintu horbangan jana abiskononna ma bangsongKi. Patunda ni na paihut-ihut giotna sandiri ma umbaen na tarjadi sudena i;

⁷ dohot hara ni jogal ni rohana laho manadingkon Au. Jadi gabe tarpisat ma halahi, tapi nada adong na paluahon haru pe marsurak halahi mangido tolong.”

⁸ Didok Tuhan ma, “Ale Israel nada padiaronKu ho sanga tadingkononKu. Tarbaen Au ma he tu ho songon parabis ni Adma? Sanga Hubaen ho songon Zeboim? Nada torus rohangKu mambaen songon i, hara ni godang ni holong ni rohangKu tu ho!

⁹ Nada uhumanKu ho di bagasan rimas ni rohangKu; nada ropukkononKu be Israel. Dibaen Debata do Au, nada jolma. Au Na Badia mandongani ho, jana nada muruhanKu be ho.”

¹⁰ Didok Tuhan ma, “Ihutkonon ni bangsongKu ma Au muda marngaur Au songon singa jana mambaen mabiar musu ni halahi. Manigor tibu do bangsongKi ro mandapotkon Au sian Hasundutan.

¹¹ Songon hipas ni unggas ro halahi sian Mesir, jana sian Asur songon hulanan ni darapati. Jadi obanonKu ma halahi mulak tu bagas ni halahi. Au, Tuhan do na mandok i.”