HOSEA 10 - BIBEL JAMITA NA DENGGAN

¹ Tudos tu bona ni anggur na ramos marbatu do Israel. Mur martamba-tamba sinadonganna, mur bahat angka langgatan na nibaenna. Mur tamba denggan tano i, mur jeges muse dibaensa angka tugu ni gana-ganaan na nisombana i.

² Angka jolma parroha na geduk i, angkon taononna ma saonnari panginona i ni dosana i. Roncohonon ni Debata ma langgatan ni halahi i, jana rumpakkonon ma angka tugu ni gana-ganaan ni halahi.

³ Nada sadia honok nari dokkonon ni halahi ma, “Nada adong be rajanta harana nada mabiar hita mida Tuhan. Aha muse be guna ni raja di hita?”

⁴ Margabusi ma halahi jana mambaen parjanjian na so tutu lalu mamudun parjanjian na so marguna. Dipasuhar ma uhum, gabe mur manjadi-jadi ma hageduhan songon latong na tubu di ladang na dung nipangkuran.

⁵ Mabiar ma halak Samaria; marsak jana tangis ma halahi dohot angka malim na mangkobasi lombu sere na di Bet-Awen i hara ni parmago ni hajagaron ni gana-ganaan ni halahi.

⁶ Obanon ma gana-ganaan i tu Asur anso dilehen gabe silua di raja godang i. Maila ma Israel jana marlayas hara ni na dohot mangihutkon gana-ganaan i.

⁷ Obanon ma rajana i songon santuho hayu na niayup ni aek.

⁸ Angka bagas pamelean na di angka tor Awen inganan pamelean ni halak Israel, roncohonon noma i. Martubuan ma duhut dohot duri di langgatan ni halahi i. Dung i marsurak ma halahi pio-pio tu angka dolok, “Ondingi ma hami!” dohot tu angka tor, “Dondoni ma hami!”

Uhuman ni Tuhan maradopkon Efraim

⁹ Didok Tuhan ma, “Mamungka sian na masa di Gibea, laing na so mantak dope halak Israel mambaen dosa mangalo Au. Jadi di Gibea pe lingkupon ni porang ma halahi.

¹⁰ PoranganKu ma angka jolma na mardosa i jana uhumanKu halahi. Marsaroha ma angka bangso laho mangalo halahi, jana hona uhum ma halahi hara ni dosa ni halahi na bahat i.

¹¹ Najolo songon lombu jara-jara na niajar do Efraim jana na ringgas mardege gandum. Nada pola porlu baenonKu auga tu tangkuhukna na jeges i. Tapi anggo saonnari tarpaksa noma baenonKu halahi markarejo na borat. Husuru Juda mamangkur, jana Israel Husuru manyisir.

¹² Hudok ma, ‘Ale Israel! Buka ma ladang na imbaru di ho, sabur ma tusi same hatigoran, jana buat ma suha ni situtu ni rohamu mangkaholongi Au. Dibaen madung dapot hatihana mulak jana jalahanmu Au, Tuhanmu. Anso ro noma Au jana duruskononKu songon udan tu ho angka pasupasungKu.’

¹³ Hape suhar-suhar ni i do dipambaeni ho; same hajahatan do disabur ho, jana sabionmu ma hageduhan. Madung dipapangani ho angka parbatu ni gabusmu.” Didok Tuhan muse dope, “Ale bangso Israel, dibaen dipangasahon ho do angka kareta porangmi dohot bahat ni angka tentarami,

¹⁴ gabe lingkupon ni porang ma rayatmi, jana sarsarkononna sude bentengmi. Tudos ma i songon na masa di ari parabis ni kota Bet-Arbel di parporangan na nibaen ni Raja Salman jana hona giling angka ina-ina rap dohot dakdanakna.

¹⁵ Songon i ma na giot masa tu hamu, ale halak Bet-Awen, hara ni na nibaenmunu hajahatan na godang. Disi mamungka parporangan i, manigor mate ma rajamunu i.”