HARURUAR 38 - BIBEL JAMITA NA DENGGAN

Pauli langgatan ni haul situtungon

¹ Dipauli si Besaleel ma langgatan ni haul situtungon sian hayu akasia. Maropat sogi do i dibaen, ginjangna dohot bidangna sarupa 2,2 meter, jana gincatna 1,3 meter.

² Di ginjang ni suhi-suhina na opat i dibaen ia opat tanduk gabe songon na sada do i dohot langgatan i. Marlampis tumbaga do i sudena.

³ Dibaen ia muse do sude parkokas sipakeon di langgatan, angka huali, sodok, angka mangkuk, garpu-garpu dohot tataringna. Sian tumbaga do sudena i dibaen.

⁴ Dibaen ia ma sada jala sian tumbaga dililitkon humaliang langgatan sian toru, satonga.

⁵ Dibaen muse ma opat golang-golang parobananna di toru ni suhina na opat i.

⁶ Porsan-porsanna pe dibaen do sian hayu akasia na nilampis dohot tumbaga.

⁷ Jadi disurukkon ma porsan-porsanna i tu bagasan golang-golangna na di lambung ni langgatan i. Sian papan do dibaen langgatan i jana rumar do i di bagasan.

Pauli bak tumbaga

⁸ Dibaen si Besaleel ma bak, sian tumbaga jana ojahanna pe laing tumbaga muse. Sian angka sormin ni angka dadaboru do dibuat tumbaga i, i ma angka dadaboru na markobas na di Pintu ni Bandar Parmianan Ni Tuhan.

Alaman ni Bandar Parmianan Ni Tuhan

⁹ Dihandang si Besaleel ma alaman ni Bandar Parmianan Ni Tuhan dohot tire sian abit linen na halus. Sabola Selatan 44 meter ginjang ni tire i,

¹⁰ na nitungkol ni dua pulu tiang sian tumbaga na marojahan tumbaga ganop be, na marsangkotan dohot parsambunganna na sian perak.

¹¹ Songon i muse ma sabola Utara.

¹² Sabola Hasundutan dibaen tire 22 meter ginjangna jana sampulu tiang na dipajongjong di ojahanna. Sangkotanna dohot parsambunganna sian perak.

¹³ Sabola Habincaran i ma na marpintu, laing 22 meter do ginjang ni handangna i.

^14-15 Di siamun siambirang ni pintu i adong do tirena 6,6 meter bidangna, martiang tolu di ginjang ni ojahanna.

¹⁶ Sude tire na humaliang alaman i sian abit linen na halus do i dibaen.

¹⁷ Sian tumbaga do dibaen ojahan ni angka tiangna i, tapi anggo sangkotan, parsambungan dohot ujung ni tiang i sian perak do dibaen. Dibaen do sambungan ni tiang na humaliang alaman i sudena, sada tu na asing dohot sambungan na sian perak.

¹⁸ Tire na di pintu ni alaman i sian abit linen na halus do dibaen, na nitonun dohot wol na rata langit, na bunga torung dohot na rara jana na nipajeges dohot sulam-sulaman. 9 Meter ginjangna jana bidangna 2 meter, sarupa do i dohot tire ni alaman i.

¹⁹ Opat tiang panahan ni tire i na jongjong di ojahanna sada be. Sangkotan, tutup ni ujungna dohot parsambunganna i sian perak do dibaen.

²⁰ Sude pasi ni Bandar Parmianan dohot handang na humaliang alaman i sian tumbaga do dibaen.

Logam na dipake di bagasan Bandar Parmianan Ni Tuhan

²¹ Songon on ma bahat ni logam na dipake di bagasan Bandar Parmianan Ni Tuhan, inganan panyimpanan ni batu na dua lembar panyuratan ni Parenta Na Sampulu i. Na ditonahon ni si Musa do anso disuratkon angka halak Levi na niuluhon ni si Itamar anak ni si Harun.

²² Dibaen si Besaleel (anak ni si Uri jana pahompu ni si Hur sian Marga Juda) ma sude na niparentahon ni Tuhan.

²³ Si Aholiab anak ni si Ahisamak na sian Marga Dan dongan pangurupinia na markarejo i na malo do manggorga, mambaen rangrangan jana partonun abit linen na halus dohot wol na rata langit, na bunga torung dohot na rara.

²⁴ Sere na dihaulkon baen tu Bandar Na Badia pungu ma sude saribu kilo, na ditimbang mangihutkon timbangan na rasmi.

²⁵ Perak na dapot mangihutkon sensus ni bangso Israel adong do 3.430 kilo bahatna na ditimbang mangihutkon timbangan na rasmi.

²⁶ Sai ma bahat ni panggararan ni halak Israel, sude na tarsurat di sensus i. Ganop halak manggarar ma hombar tu na ditontuhon, ditimbang do i mangihutkon timbangan na rasmi. Di sensus i tarsurat ma 603.550 bahat ni halaklahi na marumur dua pulu taon tu ginjang.

²⁷ Dipake ma sian perak i 3.400 kilo gabe ojahan ni angka tiang ni Bandar Na Badia i dohot tiang ni tire; saratus bahat ni ojahan i. Ganop ojahan 34 kilo boratna.

²⁸ Perak na deba nari i, i ma na 30 kilo dibaen si Besaleel ma i gabe panyambung, sangkotan ni angka tiangna i dohot panutup ni ujung ni angka tiang i.

²⁹ Tumbaga na dihaulkon tu Tuhan adong ma 2.425 kilo bahatna.

³⁰ Tumbaga i ma dipake gabe ojahan ni pintu ni Bandar Parmianan Ni Tuhan, langgatan rap dohot jalana, sude parkobas ni langgatan i,

³¹ ojahan ni handang na humaliang alaman dohot pintu ni alaman i, sude pasi ni Bandar Parmianan dohot tire ni handang i.