HARURUAR 36 - BIBEL JAMITA NA DENGGAN

¹ Songon i ma sikarejohonon ni si Besaleel dohot si Aholiab bope sude halak na malo-malo na dung dipasingkop Tuhan hamaloanna dohot pangastuionna, anso laing malo patuluskon sude ragam ni karejo laho pajongjongkon Inganan Na Badia, anso sarupa tu na niparentahon ni Tuhan.”

Diparobani bangso i ma angka silehen-lehenna be

² Jadi dipio si Musa ma si Besaleel, si Aholiab dohot sude tukang na asing na dung disuan Tuhan tu rohana hamaloan, dohot halak na nionjar ni rohana mangurupi, lalu disuru mamungka karejo i.

³ Dijagit halahi ma sian si Musa sandok na nipasahat ni halak Israel laho pajongjongkon Bandar Na Badia i. Hape laing marroan dope halak Israel i marobani silehen-lehenna be tu si Musa ganop manyogot.

⁴ Jana marroan be ma angka na malo-malo na mangkarejohon sude karejo na paulihon inganan na badia i sian parkarejoanna be,

⁵ mandok tu si Musa, “Lobi do sian na nihaporluhon na niparobani ni angka jolma i, sipakeon laho mangkarejohon na niparentahon ni Tuhan.”

⁶ Dung i diparentahon si Musa ma anso dipalalu boa-boa di sude parbandaran i songon on, “Nada pola be baenon ni halaklahi sanga dadaboru haul hapunjungan na giot tu Inganan Na Badia i.” Songon i noma dibaen laho mangantahi rayat i.

⁷ Harana madung cukup antong sipakeon laho patuluskon sude karejo i, gari ada lobi dope tehe.

Pature Bandar Na Badia

⁸ Jadi dipature halahi sude angka na malo-malo i ma Bandar Na Badia na nibaen sian sampulu tire abit linen na lamot na nipuyu bonangna dohot sian abit na bunga torung, na rata langit dohot sian abit na rara; adong muse gombaran kerub na nibaen ni partonun na malo do sudena i.

⁹ Ganop tire dua bolas meter ginjangna jana dua meter tohangna; sarupa do sude ukuran ni tirena i.

¹⁰ Lima sian tire i dipadomu do jana na lima nari dipadomu muse gabe sada.

¹¹ Di tire silima-lima na parjolo i, di topi ni abit i sian ruar ganop bagian na lima i dibaen halahi ma sangkotanna sian abit na rata langit.

¹² Di abit na parjolo i di bagian na parjolo dipasang halahi ma lima pulu sangkotanna, songon i muse di ujung ni abit bagian na sada nari, gabe tumbuk ma idaon sarongkap.

¹³ Dibaen halahi ma sangkotan sian sere lima pulu laho pasadahon na dua bagian i.

¹⁴ Dung i dibaen halahi ma tarup ni Bandar Na Badia sabolas potong abit sian imbulu ni hambeng.

¹⁵ Sarupa do sude ukuran ni abit i, tolu bolas meter ginjangna jana dua meter tohangna.

¹⁶ Rap dijait ma i lima potong gabe sada bagian, anggo na deba nari i onom potong nari ma i.

¹⁷ Dipasang halahi ma lima pulu sangkotan di topi ni abit na parpudi sian bagian na parjolo jana lima pulu sangkotan di topi ni bagian na paduahon.

¹⁸ Dung i dibaen halahi ma hait sian tumbaga lima pulu laho padomuhon na dua bagian i anso tumbuk gabe sada tarup.

¹⁹ Dibaen halahi muse ma dua nari tutup na asing, sada ma i sian bobak ni hambeng jantan na dirarai, jana na asing i sian bobak na halus baen panutup ni bagian parduru.

²⁰ Dung i dibaen halahi ma rusuk ni Bandar Na Badia sian hayu akasia na tigor parjongjongna.

²¹ Opat meter be ma ginjangna jana tohangna onom pulu onom sentimeter

²² dohot dua pasi sarongkap anso gabe tarpadomu angka tiang i. Rap adong do pasi na songon i di tiang i sudena.

²³ Dibaen halahi ma dua pulu tiang i sabola Selatan ni Bandar Na Badia,

²⁴ jana opat pulu ojahanna sian perak sipayakkonon di toru ni tiang i, dua ma ojahanna ganop tiang laho manahan pasina i.

²⁵ Dibaen halahi ma dua pulu tiang di bagian Utara ni Bandar Na Badia,

²⁶ rap dohot opat pulu ojahan perak, dua ojahan ganop tiang.

²⁷ Sabola sian pudi ni Bandar Na Badia ma sabola Hasundutan, dibaen halahi onom tiangna

²⁸ jana dua tiang ganop suhi.

²⁹ Dipadomu do tiang parsuhi i sian toru lalu tu ginjang. Songon i do dibaen tiang sidua-dua na gabe suhi-suhina i.

³⁰ Jadi adong do salapan tiang dohot onom bolas ojahan perak, dua be di toru ni sada tiang.

³¹ Dibaen halahi ma lima bolas balok na olat sian hayu akasia, lima ma i di tiang na sabariba,

³² lima sabariba nari, jana lima nari ma i di tiang na sabola Hasundutan, di pudi ni Bandar Na Badia.

³³ Balok na mamarat di na di tonga-tonga i satonga ni tiang i do pargincatna. Manggistang ma tiang i sian ujung ni Bandar Na Badia tu ujung na sabariba nari.

³⁴ Dilampis halahi do tiang i dohot sere, laing dipasang halahi ma angka golang-golang sian sere laho maniop angka balok na mamarat i, na nilampisan muse dohot sere.

³⁵ Dibaen halahi muse do tire sian abit linen na halus na ditonun mardongan wol na rata langit, na bunga torung dohot na rara, na marsulamkon kerub.

³⁶ Dibaen halahi muse tiang sian hayu akasia baen gantungan ni tire i. Dilampis dohot sere do tiang na opat i, jana dipadomu dohot haitan sere. Dibaen halahi muse ma opat ojahan sian perak laho manahan angka tiang i.

³⁷ Na gabe pintu ni Bandar Na Badia dibaen halahi ma tire sada sian abit linen na halus na ditonun mardongan wol na rata langit, na bunga torung dohot na rara lalu dibunga-bungai dohot sulaman.

³⁸ Dibaen halahi ma lima tiang tu tire i na dipadomu dohot hait-kait. Angka ujung dohot pardomuan ni tiang na lima i dilampis do i dohot sere, jana ojahanna na lima i sian tumbaga do dibaen.