HARURUAR 35 - BIBEL JAMITA NA DENGGAN

Aturan di Ari Sabat

¹ Dung i disuru si Musa ma marlagut sandok bangso Israel jana mandok hata ma ia tu halahi songon on, “On ma parenta ni Tuhan tu hamu:

² Onom ari lolotna tola mambaen karejo, tapi anggo ari papituhon angkon adong do ari adian na badia di hamu, i ma Sabat, Ari Paradianan na gok di Tuhan; sanga ise na markarejo di ari i, angkon mate niuhuman.

³ Salang pagara api pe di bagas nada tola anggo di Ari Sabat i.”

Haul tu Bandar Na Badia

⁴ Mandok hata ma si Musa tu sandok bangso Israel, ning ia ma, “On ma hata na niparentahon ni Tuhan,

⁵ ‘Baen hamu ma sian barang sinadonganmunu haul tu hapunjungan di Tuhan; ganop halak na nionjar ni rohana, angkon obanonna do haul hapunjungan tu Tuhan:

⁶ sere, perak, tumbaga, abit na bunga torung, abit na rata langit, abit na rara, linen na lamot, imbulu ni hambeng;

⁷ bobak ni biri-biri jantan na niraraan, bobak ni lamun-lamun, hayu tamariska,

⁸ miak lampu, parmasak baen pulungan ni miak sipakeon di pamiahion.

⁹ Batu intan krisopras dohot batu intan landus sipakeon di baju efod dohot tu tutup andora ni Malim Godang.’ ”

Angka panjamaan di Bandar Parmianan Ni Tuhan

¹⁰ “Sandok halak na malo sian hamu angkon ro do paulihon sasude na niparentahon ni Tuhan,

¹¹ i ma Bandar Na Badia, tarup ni Bandar Parmianan dohot emperna, sangkotanna dohot papanna, porenna, tiangna dohot ojahanna;

¹² Poti Parjanjian dohot hayu porsananna, tutup dohot tire panggupgupina;

¹³ meja dohot pamorsanna dohot sude parkokasna;

¹⁴ parlampuan panorangi dohot sude parkokasna, lampuna dohot miakna;

¹⁵ langgatan panutungan ni hamonyan dohot hayu pamorsananna, miak sipakeon di upacara pamiahion dohot parmasak sian angka na huskus, tire ni pintu ni Bandar Na Badia i;

¹⁶ langgatan ni haul situtungon dohot handang-handangna sian tumbaga, hayu pamorsanna dohot sude parkokasna, sambong parbasuan dohot payahanna.

¹⁷ Layar tu alaman, tiangna, ojahanna dohot tire ni pintu horbangan ni alamanna i;

¹⁸ patok ni Bandar Na Badia dohot patok ni alamanna dohot talina;

¹⁹ pakean tohonan ni angka malim laho mandalankon paribadatan di Inganan Na Badia dohot pakean dinas di si Harun, dohot pakean ni angka dakdanaknia di na maniop karejo hamalimon.”

Marsioban haulna ma bangso i

²⁰ Jadi kehe ma sandok bangso Israel i sian jolo ni si Musa.

²¹ Dung i marroan ma sanga ise na nionjar ni rohana, maroban haul na gabe hapunjungan ni Tuhan laho pasingkopkon Bandar Parmianan Ni Tuhan dohot tu sude na porlu sipakeon di hatiha maribadat di bagasan dohot bahan pakean ni malim.

²² Jadi marroan ma halahi, halaklahi dohot dadaboru sanga ise na taronjar rohana, marsioban anting-anting ni pinggol, tintin dohot borgokna sude ragam ni barang sere; songon i muse sanga ise na pasahatkon haul na sian sere tu Tuhan.

²³ Bope sanga ise na maniop abit na bunga torung, dohot na rata langit, abit na rara, linen na lamot, imbulu ni hambeng, bobak ni biri-biri jantan na niraraan dohot bobak ni lamun-lamun, marsioban ma.

²⁴ Sanga ise halak na giot pasahatkon haul hapunjungan na sian perak sanga tumbaga, dioban ma i tu Tuhan i, jana sanga ise nampuna hayu akasia laing dioban ma i baen pakeon laho pajongjongkonsa.

²⁵ Sandok dadaboru na malo martonun dohot tanganna sandiri jana dioban ma na nitonunna i, i ma angka abit na bunga torung, na rata langit, abit na rara dohot linen na lamot.

²⁶ Sandok dadaboru na taronjar rohana hara ni hamaloanna, martonun imbulu ni hambeng ma.

²⁷ Dioban angka pamimpin ma batu intan krisopras dohot batu intan landus sibaenon tu baju efod dohot tu tutup ni andora,

²⁸ parmasak dohot miak lampu, miak upacara dohot hamonyan na huskus.

²⁹ Marsioban sian na nionjar ni rohana be ma sude halak Israel baen haul ni halahi tu Tuhan, sipakeon tu parkarejoan na niparentahon ni Tuhan markite-hite si Musa.

Angka tukang na malo pauli Bandar Parmianan Ni Tuhan

³⁰ Dung i didok si Musa ma tu halak Israel, “Madung ditodo Tuhan si Besaleel anak ni si Uri, pahompu ni si Hur na sian Marga Juda.

³¹ Jana dipartondii Debata ma ia dohot hagogoonNa, mangalehen disia hamaloon, sinaloan dohot parbinotoan salaho tu sude ragam ni partukangon

³² laho mangarangrangi potong na mamorluhon hamaloan, lalu mangkarejohonsa dohot sere, perak, dohot tumbaga;

³³ laho mangosos batu intan sipasangon; manggorga hayu bope laho mangkarejohon sude sibaenon na adong marguru tu rangranganna.

³⁴ Jana disuankon Tuhan ma tu rohania dohot tu roha ni si Aholiab anak ni si Ahisamakh na sian Marga Dan, hamaloan laho mangajari.

³⁵ Madung digohi Tondi i halahi dohot hamaloan laho mambaen sude angka ragam ni karejo hatukangon, parkarejoan ni sada halak na sun malo, karejo ni na martonun marrupa-rupa sian abit na bunga torung, na rata langit, abit na rara dohot linen na lamot dohot parkarejoan ni tukang tonun, i ma angka na mangkarejohon sude ragam ni parkarejoan dohot na mambaen rangrangan ni sasude.