HARURUAR 32 - BIBEL JAMITA NA DENGGAN

Anak ni lombu sere

¹ Dung diida bangso i laing na so manuat si Musa sian dolok i, gabe marlagut ma halahi mangarongomi si Harun jana didok halahi ma tusia, “Nada hami paboto-boto be da na masa tu si Musa i na manogu hita ruar sian Mesir; saonnari baen ma di hami debata laho mangiring hami.”

² Dialusi si Harun ma tu halahi, “Buat hamu ma anting-anting na di pinggol ni angka dadaborumunu, dakdanakmunu dohot anting-anting ni borumunu jana obani hamu ma tu au.”

³ Jana marsibuka anting-antingna be ma bangso i jana dioban halahi ma tu si Harun.

⁴ Dijagiti ia ma i sudena sian tangan ni halahi; dipadomu ia ma i jana dibaen ia ma sian i anak ni lombu na nituang. Dung i didok halahi ma, “Hamu halak Israel, on ma debatanta na maroban hita ruar sian Mesir!”

⁵ Dung diida si Harun lombu sere i, dipajongjong ia ma langgatan di jolona i. Didok si Harun ma, “Ancogot ari pesta do di Tuhan!”

⁶ Jana ancogotna i sogot dope dipelehon halahi ma haul situtungon dohot haul pardamean; jadi juguk ma bangso i mangan dohot minum, dung i jongjong ma halahi manortori.

⁷ Didok Tuhan ma tu si Musa, “Kehe ma ho manuat, harana ma gabe marrorang bangsomi na niobanmu ruar sian Mesir.

⁸ Manigor manyimbil do halahi antong sian dalan na Huparentahon tu halahi; dibaen halahi do anak ni lombu sian sere na nituang jana tusi ma halahi marsomba dohot mamelehon haul, didok halahi ma: Hamu ale halak Israel, on ma debatamunu na dung manogu hamu ruar sian tano Mesir.”

⁹ Didok hata ni Tuhan dope tu si Musa, “Madung Huida bangso on, jana satutuna do bangso na jogal rungkung halahi.

¹⁰ Jadi padiar ma anso marpiar-piar murukKu tu halahi anso Hupasude halahi; tapi anggo ho Hubaen pe gabe bangso na godang.”

¹¹ Tapi dielek-elek si Musa do anso mombun roha ni Tuhan, Debatania i, didok ia ma, “Biasi ma he jabat songon i murukMu tu bangsoMu na dung diobanMi ruar sian Mesir mardongan hagogoon na tarlobi rap dohot tangan na gogo situtu?

¹² Biasi ma he angkon dokkonon ni halak Mesir: Dioban Ia ma halahi ruar anso dipadondonkon Ia do bala tu halahi jana dibunu Ia halahi di dolok jana disudehon Ia halahi sian tano on? Palambok ma da rohaMu na marpiar-piar i jana marpangulahi ma rohaMu taringot tu hamamago na giot paroonMu tu bangso on.

¹³ Ingot ma si Abraham, si Ishak dohot si Israel naposoMi, angke madung marsumpa hian do Ho tu halahi mangasahon diriMu sandiri di na nidokMu tu halahi: BaenonKu ma pomparanMu sabahat ni bintang na di langit, jana sude tano na dung Hujanjihon on lehenonKu ma i tu pomparanmu, anso gabe halahi nampunasa salolot-lolotna.”

¹⁴ Jadi gabe marpangulahi ma roha ni Tuhan i jana nada tulus didalankon Ia na nitahi ni rohaNia maradopkon bangso i parohon hamamago.

¹⁵ Dung i manuat ma si Musa sian dolok i maroban batu si dua lambar uhum ni Debata na marsurat angkup be.

¹⁶ Na nikarejohon ni Debata sandiri do batu i jana suratan ni Debata do suratna i na digorgahon di batu i.

¹⁷ Di na nibege ni si Josua sora ni bangso i marsurak-surak, lalu didok ia ma tu si Musa, “Adong tarbege sora na gogo, surak-surak ni porang di parbandaran i.”

¹⁸ Didok si Musa ma, “Nanggo sora ni na mangendehon hamonangan, nada muse sora ni na mangendehon hataluan; sora ni na marende marsialus-alusan do i hubege.”

¹⁹ Jana dung donok ia tu parbandaran i, diida ia ma anak ni lombu i dohot halak na manortori, gabe muruk sajo ma si Musa; didanggurkon ia ma batu si dua lambar i sian tangannia jana ditaporkon ia ma tu pat ni dolok i.

²⁰ Dung i dibuat ia ma anak ni lombu na nipature ni halahi i, ditutung ia ma tu api diduda ia ma lopus lamot, diduruskon ia ma tu aek jana disuru ia ma halak Israel manginumsa.

²¹ Didok ia ma tu si Harun, “Aha do dibaen bangso on tu ho, umbaen na gabe diparo ho dosa na songon i godang tu halahi?”

²² Dialusi si Harun ma, “Ulang ma da antong tu au ho muruk; diboto ho do tangkas sanga na songon dia jahat ni bangso on.

²³ Na didok ni halahi do tu au, ‘Nada hami paboto-boto be sanga aha na masa tu bayo i, si Musa na maroban hita ruar sian tano Mesir; jadi tabaen ma di hita sada debata na manguluhon hita.’

²⁴ Jadi hudok ma tu halahi anso dibukai halahi serena be. Dileheni halahi ma i tu au jana huambungkon ma tu bagasan api jana ruar ma anak ni lombu on!”

²⁵ Diida si Musa ma, madung songon kudo na malua sian tambatan bangso i – patunda ni na nipalua ni si Harun lopus gabe siincahan ni angka musuna.

²⁶ Gabe jongjong ma si Musa di pintu ni horbangan ni parbandaran i mandok hata ma ia, “Sanga ise na mamihak tu Tuhan ro ma tuson!” Jadi marlagut ma tu jolonia sude Marga Levi.

²⁷ Didok ia ma tu halahi, “Pandok ni Tuhan, Debata ni Israel, parbobatkon hamu ma podangmunu jana mardalani ma hamu pahae pahulu mamolus parbandaran i sian horbangan na sada tu horbangan na sada nari, jana bunu ma ganop halak, angka kahanggimunu, ale-alemunu dohot tetanggamunu.”

²⁸ Dibaen halak Levi ma songon na nidok ni si Musa, jana mate ma di na sadari i hira-hira tolu ribu halak.

²⁹ Dung i didok si Musa ma, “Pasahat hamu ma dirimunu mamungka sadari on tu Tuhan, marsigararkon hosa ni anakna dohot kahanggina ma hamu anso maruli pasupasu hamu.”

³⁰ Ancogotna i mandok hata ma si Musa tu bangso i, “Madung mardosa godang hamu, tapi saonnari manangkok ma au mangadop tu Tuhan, betak na tarpatupa dope hadamean patunda ni dosamunu i.”

³¹ Jadi diulahi si Musa ma mangadop tu Tuhan ning ia ma, “Iale, madung mardosa godang bangso on, harana madung dibaen halahi debata sere di halahi jana disomba.

³² Tapi saonnari sugari diampuni Ho ma dosa ni halahi i; anggo inda, sesa ma goarku sian buku na nisuratMi.”

³³ Tapi dialusi Tuhan i ma, “Sanga ise na mardosa tu Au, goar ni i do na Husesa sian bukungKu.

³⁴ Tapi anggo ho kehe ma saonnari manogu-nogu bangso i tu inganan na dung Hupaboa tu ho; mardalan do surusuruanKu di jolomu; tapi di ari pamalosonKi baloskononKu ma tu bangso i dosa ni halahi i.”

³⁵ Songon i ma dipamasa Tuhan nyae tu halahi patunda ni na nipaksa ni halahi si Harun mambaen anak ni lombu sian sere.