HARURUAR 30 - BIBEL JAMITA NA DENGGAN

Langgatan panutungan ni haminjon

¹ “Baen ma sada langgatan sian hayu akasia, inganan panutungan ni haminjon.

² Sogi opat ma i baen, 45 sentimeter ginjangna jana 45 sentimeter bidangna, jana gincatna 90 sentimeter. Domu do tandukna na di suhi-suhi na opat i tu langgatan i.

³ Angkon lampisonmu do i dohot sere na polin, humaliang di ginjang dohot humaliangna na opat i dohot angka tandukna i. Angkon baenonmu do bingkena sian sere humaliang.

⁴ Angkon baenonmu do dua golang-golang ni langgatan i dua sian sere di toru ni bingkena i; angkon baenonmu do di rusukna na dua i golang-golangna i sabola lambungna na dua i, jana angkon tumbuk ma tu golang-golangna na dua i susukkonon hayu pamorsanna, anso songon i ma pambaenna laho maroban langgatan i.

⁵ Angkon sian hayu ingul do baenonmu hayu pamorsanna i jana lampisi ma i dohot sere.

⁶ Baen ma inganan ni langgatan on di ruar ni tire na di jolo ni Poti Parjanjian i. Disi ma Au giot marsuo dohot hamu.

⁷ Di ginjangna i ma si Harun manutung hamonyan dohot angka na huskus; ganop manyogot muda laho paiaskon angka lampu, angkon tutungonnia ma i.

⁸ Songon i muse muda laho manutung angka lampu i si Harun andospotang. Angkon laing tutungon do hamonyan i songon haul, torus ganop ari salolot-lolotna.

⁹ Nada tola haulkononmunu hamonyan na so tola haulkonon, sanga haul binatang, sanga haul eme di ginjang ni langgatan i; ulang diduruskon muse aek ni anggur di ginjangna i.

¹⁰ Sanoli sataon angkon baenon ni si Harun upacara pabadiahon langgatan i; dipispis ia ma tandukna na opat i dohot mudar ni binatang na dihaulkon i baen panyesa ni dosa. Angkon baenon do songon i ganop taon sapanjangna. Angkon badia do langgatan on sudena, dihaulkon tu Au Tuhan.”

Guguan tu Bandar Parmianan ni Tuhan

¹¹ Didok Tuhan ma tu si Musa,

¹² “Muda hatiha mangetong bahat ni halak Israel ho sanga sadia bahatna di na mandaftar halahi, angkon pasahaton ni halahi do haul tu Tuhan, i ma hepeng pandamei hara ni hosa ni halahi, di na nidaftarkon ni donganna halahi anso ulang adong na hona bala sian halahi di na mandaftar i.

¹³ Songon on ma haul ni halahi, tarmasuk ma disi angka halak na tardaftar i; satonga sikal, na nitimbang di sikal na badia – dua pulu gera boratna sikal on; – satonga sikal on ma boratna haul sipasahaton tu Tuhan.

¹⁴ Ganop halak na giot daftarkonon i, na marumur dua pulu taon tu ginjang, angkon pasahatonna ma haul sisongon i tu Tuhan.

¹⁵ Ulang lobi dihaulkon halak na maradong, jana halak na pogos pe ulang hurang sian satonga sikal dipasahat haulna di na pasahatkon haul sisongon i maradopkon Tuhan laho manggarar hepeng tobus ni hosa ni halahi.

¹⁶ Jana angkon pangidoonmu do hepeng pandamei i sian halak Israel jana pargunahononmu ma i pature-ture Bandar ParmiananKu, anso gabe parningotan ma i di adopan ni Tuhan laho paingotkon halak Israel dohot laho patupahon pandamei salaho tu hosamunu sasude.”

Sambong pamasuan

¹⁷ Didok Tuhan ma tu si Musa,

¹⁸ “Angkon baenonmu do sambong dohot muse do ingananna sian tumbaga baen pamasuan, jana baen ma i di antara ni Bandar Parmianan dohot langgatan i, jana baen ma aek tu bagasan.

¹⁹ Jadi angkon sian aek na disi i ma si Harun dohot angka dakdanaknia mamasu pat dohot tangan ni halahi.

²⁰ Muda laho masuk halahi tu Bandar Parmianan i, angkon basuon ni halahi ma dohot aek i tangan dohot pat ni halahi, anso ulang mate halahi. Laing songon i muse ma muda giot ro halahi tu langgatan i laho mandalankon ibadat bope laho manutung haul na marapi tu Tuhan,

²¹ angkon basuon ni halahi do tangan dohot pat ni halahi, anso ulang mate halahi. Songon i ma na nitotopkon di halahi tongtong salolot-lolotna, disia dohot di angka pomparannia marsundut-sundut.”

Miak upacara

²² Didok Tuhan ma tu si Musa,

²³ “Pulung ma parmasak na dumenggan – onom kilo miak mur, tolu kilo hulim, tolu kilo tobu na huskus,

²⁴ dohot hayu teja onom kilo (sudena i nitimbang ma di timbangan na rasmi). Tambahon ma opat liter miak zetun,

²⁵ jana baen ma i gabe miak upacara na nibaur songon miak na huskus.

²⁶ I ma pake laho mamiahi Bandar ParmiananKu, Poti Parjanjian,

²⁷ meja dohot sude panjamaanna, inganan parlampuan dohot panjamaanna,

²⁸ langgatan panutungan ni hamonyan dohot sambong bope hajongjonganna.

²⁹ Baen ma sudena i gabe hapunjunganKu markite-hite cara na songon on gabe badia sasudena i. Marmara ma sanga ise jana sanga aha sajo na mangantulsa hara ni hagogoan ni haiasonna.

³⁰ Dung i miahi ma si Harun dohot angka anaknia i jana lantik ma halahi gabe malim laho mangoloi Au.

³¹ Dok tu halak Israel, miak upacara angkon pakeon do sapanjangna di bagasan ibadatKu.

³² Nada tola niusehon miak i tu angka jolma sihabahatan jana nada tola baenonmunu ramuan na sarupa laho mambaen pulungan na tudos tusi. Badia do miak i, jana angkon songon barang na badia do baenonmunu tusi.

³³ Sanga ise mambaen miak na songon i, sanga mamakesa sanga na tu ise pe na so malim, nada sietongon be i songon sahalak sian bangsongKu.”

Hamonyan

³⁴ Didok Tuhan ma tu si Musa, “Pulung ma angka parmasak on sarupa be bahatna – gota ni damar, lampak ni korang, gota ni hayu rasamala dohot pultak ni hamonyan.

³⁵ I ma pake sudena laho mambaen pulungan ni hamonyan songon miak na huskus. Baen sirana anso tongtong jeges jana badia.

^36-37 Deba sian pulunganna i angkon lamot do nigiling. Oban ma i tu Bandar ParmiananKu jana sirsirhon ma di jolo ni Poti Parjanjian i. Etong ma hamonyan i songon barang na badia sihaulkonon tu Au. Ulang dibaen ramuan na songon i laho mambaen hamonyan na sarupa tusi na giot di hamu sandiri.

³⁸ Sanga ise na mambaen na huskus sisongon i nada sietongon be songon sada halak sian bangsongKu.”