HARURUAR 3 - BIBEL JAMITA NA DENGGAN

Dipio Debata si Musa

¹ Di sada ari dompak diparmahan si Musa angka biri-biri dohot hambeng ni si Jetro, tulangnia malim di tano Midian i, jana hatiha mangolat pahan-pahanan i ia tu bariba ni halongonan, lalu ma ia tu Dolok Sinai, i ma dolok na badia.

² Ro ma surusuruan ni Tuhan tusia di bagasan jilam ni api na ruar sian ramba i. Diida si Musa do ramba i marjilam, hape nada mosok.

³ “Hahomangan do i,” ning rohania. “Biasi nada mosok ramba-ramba i? Kehe ma au dumonok mangaligi tusi.”

⁴ Dung diida Tuhan si Musa donok tu inganan i, pio-pio ma Tuhan sian tonga-tonga ni ramba i, “Musa! Musa!” “Olo dison do au,” ning si Musa mangalusi.

⁵ Dung i didok Debata ma, “Ulang padonok. Buka solopmi, angke di tano na badia do ho na jongjong on.”

⁶ Didok Debata ma muse, “Au do Debata ni ompumu, Debata ni si Abraham, si Ishak dohot si Jakob.” Gabe ditutupi si Musa ma bohinia, dibaen biarnia marnida Debata.

⁷ Dung i didok Debata ma, “Madung Huida parkancitan ni bangsongKu di Mesir. Madung Hubege angguk-angguk ni halahi mangido anso dipalua sian angka na mamparkanciti halahi. Olo! Madung Huboto pardangolan ni halahi.

⁸ Jadi hara ni i, madung mijur Au laho palua halahi sian tangan ni halak Mesir, bope maroban halahi haruar sian luat i, tu sada luat na bidang jana na napu, tano inganan ni susu dohot aer ni loba, jana saonnari diingani halak Het, Amori, Peris, Hewi dohot Jebus.

⁹ Madung Hubege tangis ni bangsongKi jana madung Huida sanga songon dia halahi diparkanciti halak Mesir.

¹⁰ Saonnari Husuru ho anso kehe mangadop tu raja ni Mesir, anso bolas ho manguluhon bangsongKi haruar sian luat i.”

¹¹ Tapi didok si Musa ma tu Debata, “Ise ma he au umbaen na pola au manopot raja, jana maroban halak Israel haruar sian Mesir?”

¹² Dialusi Debata ma, “Hudongani pe ho, jana dung dioban ho bangso i haruar sian Mesir, angkon oloanmunu ma Au di dolok on. I ma buktina, paboa Au do marsuru ho.”

¹³ Dialusi si Musa ma, “Tapi muda kehe au manopot halak Israel jana hudok tu halahi, ‘Debata ni ompumunu i do marsuru au manopot hamu,’ sapaan ni halahi ma, ‘Ise ma he goarNa?’ Jadi aha ma alusku tu halahi?”

¹⁴ Didok Debata ma tu si Musa, “Au do Au Na Adong. I ma dohononmu tu halahi, ‘Na nigoaran i Au Na Adong i do na marsuru au manopot hamu.’

¹⁵ Baritahon ma tu bangso Israel, paboa Au do Tuhan Debata ni ompu ni halahi, Debata ni si Abraham, si Ishak dohot si Jakob na marsuru ho manopot halahi. I do goarKu ro di salolot ni lolotna. On ma panggoaringKu di sude bangso marsundut-sundut.

¹⁶ Kehe ma ho, palagut ma sude hatobangon ni Israel. Pabotohon ma tu halahi, na dung ro tu ho, Au, Tuhan, Debata ni ompu ni halahi, Debata ni si Abraham, si Ishak dohot si Jakob, na dung patidahon diriNa tu ho i do marsuru ho paboahon tu halahi, jana madung Huida sanga songon dia pambaen ni halak Mesir i tu halahi.

¹⁷ Madung Huputuskon di rohangKu laho maroban halahi ruar sian Mesir, inganan ni halahi diparkanciti, jana taruhononKu ma halahi tu luat na mora bope na napu – luat ni halak Kanaan, Het, Amori, Peris, Hewi dohot Jebus.

¹⁸ Tangihonon ni bangsongKi do angka hata na nidokmu. Dung i kehe ma ho rap dohot angka hatobangon ni Israel mangadop tu raja ni Mesir mandok tusia, ‘Tuhan, Debata ni halak Ibrani madung ro pataridahon diriNa tu hami. Paloas ma hami kehe saonnari, hira-hira tolu ari pardalanan daona tu halongonan laho manghaulkon haul tu Tuhan, Debatanami.’ ”

¹⁹ Dung i didok Debata dope, “Huboto do, nada loason ni raja Mesir i hamu kehe, asing ma muda na nipaksa.

²⁰ Jadi patidahononKu ma kuasongKu, jana uhumonKu ma halak Mesir i marhite angka bala na jorbut tu halahi. Dung i loasonnia ma hamu kehe.

²¹ Pasangapon ni halak Mesir i ma hamu baenonKu, di hatiha hakekehe ni bangsongKi, nada rumar tangan ni halahi.

²² Ganop dadaboru sian bangso Israel angkon pangidoonna ma sian hombar bagasna halak Mesir, bope sian boru Mesir na maringanan di bagasna, pakean bope barang perak dohot sere. Papakehonon ni halahi ma i tu angka dakdanak ni halahi jana dohot dalan na songon i ma gabe dioban halahi sinadongan ni halak Mesir i.”