HARURUAR 26 - BIBEL JAMITA NA DENGGAN

Bandar Parmianan Ni Tuhan

¹ “Angkon baenonmu do Bandar ParmiananKi sian abit linen na halus. Angkon baenonmu do sampulu tenda di Bandar Parmianan i sian abit linen na halus, na ditonun sian wol na rata langit, na bunga torung dohot na rara. Sulamkon ma tusi gambar ni angka kerub.

² Angkon sarupa do ukuran ni ganop potong, dua bolas meter ginjangna jana tohangna dua meter.

³ Sambung ma lima abit i anso gabe sada, jana sambung muse ma abit na lima nari gabe sada.

⁴ Baen ma sangkotan ni abit na rata langit i sian topina i dua-dua sabola ruar,

⁵ lima pulu ma sangkotanna i di abit na parjolo i jana lima pulu nari di abit na sada nari i.

⁶ Baen muse ma lima pulu sangkotan sian sere laho padomuhon abit na dua i.

⁷ Baen ma panutup ni Bandar Parmianan sabolas nari abit na nitonun sian imbulu ni hambeng.

⁸ Ganop abit angkon sarupa ukuranna, tolu bolas meter ginjangna jana tohangna dua meter.

⁹ Niudut ma gabe sada na lima potong i, jana na onom nari pe laing niudut gabe sada. Angkon lompit duaon do sionom potong i anso tartutupisa Bandar Parmianan di bagasan.

¹⁰ Baen ma lima pulu sangkotan di topi ni abit na parjolo i, jana lima pulu sangkotan di topi ni abit na sada nari i.

¹¹ Baen muse ma lima pulu sangkotan sian tumbaga jana pamasuk ma i tu sangkotan i anso tarpadomu gabe sada panutupi ni Bandar Parmianan.

¹² Na lobi sian pangalompitan na gantung i, songon i ma i gantung di sabola pudi ni undung-undung na badia i.

¹³ Silima pulu sentimeter lobi ni abit i di ujung ni unjurna i, nipadiar ma i manutupi topi ni Bandar Parmianan.

¹⁴ Baen ma dua nari panutup ni Bandar Parmianan, sada ma i sian kulit ni biri-biri jantan na niraraan, jana na sada nari sian kulit na halus panutupna sian ruar.

¹⁵ Pajongjong ma parhayu ni Bandar Parmianan sian hayu akasia.

¹⁶ Ganop tiang opat meter ginjangna jana bidangna onom pulu onom sentimeter.

¹⁷ Nibaen ma antong rasuk anso denggan mardomu angka tiangna i.

¹⁸ Baen ma dua pulu tiangna bagian Selatan ni Bandar Parmianan,

¹⁹ na niojakkon di dua ojahan perak laho manahan rasuk na dua i, jadi gabe opat pulu ma sude ojahanna i.

²⁰ Baen ma dua pulu tiang ni Bandar Parmianan sian bagian Utara

²¹ jana opat pulu batu ojahanna sian perak, dua be ganop tiang.

²² Di pudi sabola Hasundutan, angkon adong onom tiangna

²³ jana dua tiang di suhi-suhina i.

²⁴ Angkon baenon do langgu padomuhon tiang sidua-dua na di suhi-suhi i di toru lopus tu ujung. Songon i ma nibaen tiang suhi-suhi na dua i.

²⁵ Jadi gabe salapan ma tiangna jana onom bolas ojahanna sian perak, dua be ganop tiang.

²⁶ Baen ma ururna bujur lima bolas balok sian hayu akasia, lima ma i tu angka tiang na sabariba ni Bandar Parmianan,

²⁷ lima nari tu sabariba nari jana lima ma tu sabola Hasundutan ni Bandar Parmianan, i ma sabola sian pudi.

²⁸ Urur na bujur i di tonga-tonga satonga ni tiang ma nibaen gincatna, jana bujur ma i sian topi tu topi ni Bandar Parmianan.

²⁹ Parhayu ni Bandar Parmianan dohot balok na bujur i angkon nilampis do i dohot sere. Golang-golang paniop ni balok i pe angkon sere do baenon.

³⁰ Songon rancangan na Hupatidahon di ginjang dolok i ma pajongjong Bandar Parmianan.

³¹ Baen ma tire sian abit linen na halus na nitonun dohot wol na rata langit, na bunga torung dohot na rara, na nisulaman dohot bonang na bontar, disulamkon panyulam na malo ma bonang linen i gabe gambaran ni angka kerub.

³² Gantungkon ma abit i di tiang hayu akasia na opat na marlampis sere i jana na marsangkotan sere i jana na nipajongjong di ginjang ni ojahan perak na opat i.

³³ Baen ma tire i di toru ni sangkotan na marbaris di tarup ni Bandar Parmianan. Pamasuk ma tu balik ni tire i Poti Parjanjian inganan ni batu na dua i. Tire i ma manyirang Inganan Na Badia sian Bilik Na Sun Badia situtu.

³⁴ Baen hamu ma tutupna i di ginjang ni Poti Parjanjian.

³⁵ Anggo meja parsombaan i angkon di ruar ni Bilik Na Sun Badia situtu do i baenon, i ma sabola Utara; jana parlampuan i angkon sabola Selatan do i baenon di bagasan Bandar Na Badia i.

³⁶ Pintu ni Bandar Parmianan pe angkon baenon do sada tire sian abit linen na halus na nitonun dohot wol na rata langit, na bunga torung dohot na rara na nihiasan dohot sulaman.

³⁷ Angkon baenonmu muse do inganan ni tire i lima tiang sian hayu akasia na marlampis sere. Baen muse ma jongjongan ni tiang i lima ojahan sian tumbaga.”