HARURUAR 25 - BIBEL JAMITA NA DENGGAN

Haul pajongjongkon Bandar Na Badia

¹ Didok Tuhan ma tu si Musa,

² “Suruhon ma halak Israel maroban somba-somba tu Au. Jagiti sajo ma sanga aha na nipasahat ni halahi sian ias ni rohana be.

³ Adong do i na maroban sere, perak dohot tumbaga;

⁴ abit linen na halus, abit wol na rata langit, na bunga torung dohot na rara, abit na nibaen sian imbulu ni hambeng,

⁵ huling-kuling ni biri-biri jantan na niraraan, huling-kuling na nipahalus, hayu akasia,

⁶ miak lampu, parmasak sipakeon gabe miak badia dohot tu hamonyan na huskus,

⁷ ragam-ragam ni simata sibaenon laho pajegeskon pakean ni Malim Godang dohot panutup ni andorania i.

⁸ Suru ma anso dibaen bangso i di Au sada Bandar Na Badia, anso maringanan Au di tonga-tonga ni halahi.

⁹ Angkon marguru tu sangkap na giot patuduhononKu tu hamu do baenonmunu Bandar Parmianan dohot sude panjamaan sipakeon disi.”

Poti Parjanjian

¹⁰ “Baen ma sada poti sian hayu akasia, 110 sentimeter ginjangna, tohangna 66 sentimeter, jana Hincatna 66 sentimeter.

¹¹ Lampisi ma sian bagasan songon i sian duru dohot sere na polin jana baen bingkena humaliang laing sian sere.

¹² Baen ma opat golang-golangna sian sere anso adong sitiopanna jana di patna na opat i ma lohotkon golang-golangna i, dua sabariba.

¹³ Baen ma hayu porsan-porsanna laing sian akasia jana lampisi muse ma i dohot sere,

¹⁴ susukkon ma porsan-porsanna i tu golang-golang sinangkin na di ganop suhina i.

¹⁵ Angkon hot do porsan-porsanna i di golang-golang i, nada tola ulduson.

¹⁶ Jadi pamasuk ma tu bagasan poti i batu na dua, panyuratan ni angka parentangKi na giot pasahatonKu tu ho.

¹⁷ Baen ma tutup ni poti i sian sere na polin, ginjangna 110 sentimeter, bidangna 66 sentimeter.

¹⁸ Baen ma dua kerub sian sere na nitopa,

¹⁹ sada be di ujung ni poti i. Malo ma mambaen anso laing sada kherubim na dua i dohot tutupna i.

²⁰ Angkon paadop-adop do kerub na dua i jana angkon tutupon ni habongna i ma poti i.

²¹ Pamasuk ma batu panyuratan na dua i tu bagasan poti i, baru ma tutupi sian ginjang dohot tutup pardamean i.

²² Disi ma Au marsuo dohot ho, jana sian ginjang tutupna i di holang-kolang ni kerub na dua na marhabong i, sian i ma lehenonKu angka aturan tu bangso Israel.”

Meja sipakeon inganan ni roti na nisombahon tu Debata

²³ “Baen ma sada meja sian hayu akasia, 88 sentimeter ginjangna, bidangna 44 sentimeter, jana gincatna 66 sentimeter.

²⁴ Lampis ma dohot sere na polin jana baen bingkena humaliang sian sere.

²⁵ Baen topina i 7,5 sentimeter jana baen ma sere batas ni topina i humaliang.

²⁶ Baen ma opat golang-golang sian sere panyusuhan ni porsan-porsanna jana di suhi-suhi na opat i ma sabola patna i lohotkon.

²⁷ Angkon sian lambungna do pasangon golang-golang panyusuhan ni porsan-porsanna i, di lambung ni topi ni meja i.

²⁸ Angkon sian hayu akasia do baen porsan-porsanna i jana nilampis dohot sere.

²⁹ Baen ma angka pinggan, sambong-sambong, gunci, dohot angka mangkuk inganan ni anggur sisombahononkon. Sian sere do sudena i baenon.

³⁰ Angkon di jolo ni Poti Parjanjian i do baenon meja i, jana di ginjang ni meja i angkon tongtong do adong roti na badia na nisombahon tu Au.”

Taringot tu parlampuan

³¹ “Baen ma sada parlampuan sian sere. Jongjonganna dohot sitiopanna i angkon sian sere tompoan do baenonmunu; bunga-bunga parhiasanna, masuk ma disi lampusungna dohot bulung ni bungana i angkon laing sada dohot jongjonganna i dohot sitiopanna i.

³² Baen ma mardangka onom sitiopanna i tolu be angkup bariba.

³³ Ganop dangkana na onom i, dibaen ma hiasanna songon bunga ni jambu na marlampusung dohot bunga na kombang.

³⁴ Di tiang ni parlampuan i angkon adong opat kelopak songon bunga ni jambu na marlampusung dohot bunga na kombang.

³⁵ Di toru ni ganop angka dangkana na tolu i adong ma sada lampusung.

³⁶ Angka lampusungna i, dangkana i sude dohot jongjonganna i sian sere na polin, na himpal, na nipatompohon.

³⁷ Baen ma pitu lampu di parlampuan i, adop ginjang ma baen sude anso marsinondang tu jolo.

³⁸ Pangkoisna dohot talamna, laing sian sere na polin ma baen.

³⁹ Angkon adong ma tolu pulu lima kilo borat ni sere hum mambaen parlampuan i dohot angka parkokasna.

⁴⁰ Jagohon ma anso laing tudosan ni parlampuan na Hupatidahon na di ginjang dolok i tu ho pambaenna.”