HARURUAR 23 - BIBEL JAMITA NA DENGGAN

Na adil dohot na tigor

¹ “Ulang hata-hatahon hamu angka carito gabus jana ulang urupi hamu halak na sala, jadi gabe saksi pargabus hamu.

² Ulang dohot-dohotan hamu di halak na bahat anggo na mambaen na sala do halahi sanga na mandok hasaksian na paegolkon na tigor.

³ Ulang mamihak hamu tu halak na pogos hatiha niadilan ia.

⁴ Muda topet diida hamu lombu sanga halode ni musumunu lilu, paulak mangulahi tu nampunasa i.

⁵ Muda tinggang halode ni musumunu hara ni dokdok ni bobanna, urupi ia laho pajongjongkonsa mangulahi; ulang laosi sajo ia songon i.

⁶ Ulang tabunihon mambaen na tigor tu halak na pogos muda ro ia mangaduhon parkaronia tu pangadilan.

⁷ Ulang nibaen-baen hata na so tutu tu halak, jana ulang nidabu uhum mamatehon halak na so marsala, harana hona bura do baenonKu sanga ise na mambaen hajahatan na songon i.

⁸ Ulang jagit hamu hepeng sisip, angke gabe mapitung do halak tu na tigor baenon ni hepeng sisip jana mangarugihon do i diparkaro ni angka halak na so marsala.

⁹ Ulang hapit hamu halak na asing; angke diboto hamu do sanga songon dia partinaonan ni halak na asing, harana hamu pe halak na asing do najolo di Mesir.”

Taon papituhon dohot ari papituhon

¹⁰ “Onom taon honokna suananmunu ladangmunu jana pambuatanmunu suhana i.

¹¹ Tapi anggo taon papituhon, angkon padiaronmunu do tano i. Anggo di na sataon i, ulang palagut hamu sanga aha na tubu sandiri di ladangmunu i. Padiar hamu ma i di angka na pogos sian hamu, jana asingna i padiar dipangan binatang harangan. Laing songon i ma baen hamu dohot tu kobun anggur bope tu angka bona ni zetunmunu.

¹² Angkon markarejo hamu onom ari di bagasan saminggu, tapi ulang hamu karejo anggo di ari papituhon, anso tarbaen angka hatobanmunu dohot halak na asing na markarejo di hamu bope angka pahan-pahananmunu maradian.

¹³ Tangihon hamu ma sanga aha na Hudok tu hamu, Au sandiri Tuhan na mandok tu hamu. Ulang martangiang hamu tu angka debata na asing, hum mandok goarna pe indangkon.”

Ari pesta na tolu

¹⁴ “Ganop taon angkon baenonmunu do tolu ari pesta laho pasangapkon Au.

¹⁵ Di bulan Abib, angkon baenonmunu do Pesta Roti Na So Marragi songon na dung Huparentahon tu hamu, angke di bulan i ma hamu manadingkon tano Mesir. Ulang pangan hamu roti na nibaen marcampur ragi salolot pesta sipitu ari i. Ulang hamu ro maribadat tu Au anggo so maroban haul.

¹⁶ Pestahon hamu ma Pesta Gotilon di na mamungka mambuat patumonaan ni suha ni suan-suananmunu hamu. Pestahon hamu ma dohot Pesta Bandar Bulung-bulung ganop ujung ni taon di na mamutik suha ni kobun anggur sanga kobun suan-suanan na marbatu hamu.

¹⁷ Ganop taon di hamamasa ni ari pesta na tolu on, sude halaklahi angkon ro maribadat tu Au, Tuhan Debatamunu.

¹⁸ Ulang haulkon hamu mudar ni binatang sisambolon tu Au dohot roti na marragi jana ulang tebahon tabo-tabo ni binatang na nihaulkon di ari pesta i lalu tu ancogotna i.

¹⁹ Ganop taon angkon obanonmunu do tu Bagas Ni Tuhan Debatamunu eme patumonaan ni suha ni sabamunu. Ulang lompa hamu anak ni biri-biri sanga hambeng di bagasan susu ni indukna.”

Janji dohot parenta

²⁰ “Ingot ma suruonKu do surusuruanKu manjoloi hamu laho mangondihon hamu di pardalanan dohot maroban hamu tu inganan na dung Huparade.

²¹ Matahon hamu ma tusia jana oloi hamu. Ulang mangalo hamu tusia angke na Huutus do ia, jana indangkan na ra ia mangampuni halak na mangalanggar songon i.

²² Tapi muda burju do hamu mangoloi tusia dohot patuluskon sandok na Huparentahon, sosohononKu ma musumu jana Au ma marporang mangalo sude musumunu.

²³ Joloanan ni surusuruanKi ma hamu jana obanonnia hamu tu luat ni halak Amori, halak Het, halak Peris, halak Kanaan, halak Hewi dohot halak Jebus, jana haromkononKu ma halahi sude.

²⁴ Ulang mangalompit tot hamu mangoloi angka debata ni halahi jana ulang tiru-tiru hamu cara ni halahi maribadat. Ropuki hamu ma sude angka debata ni halahi i jana ponggoli hamu angka tiang langgatan ni halahi i.

²⁵ Muda disomba hamu Au, Tuhan Debatamunu, pasupasuonKu ma hamu pasingkop sipanganon dohot si inumonmunu, jana padaoonKu ma nyae sian hamu.

²⁶ Nada adong dadaboru na haambungan sanga na so maruntungan di luat ingananmunu. Hupaginjang pe umurmunu.

²⁷ Gok biar maradopkon Au baenonKu angka bangso na mangalo hamu. PagolaponKu roha ni angka halak na mamorangi hamu; mulak be do angka musumunu marsipalua dirina sian hamu.

²⁸ PasarsaronKu ma angka musumunu jana paorotonKu halak Hewi, halak Kanaan dohot halak Het anso tarbaen hamu torus maju.

²⁹ Nanggo di bagasan sataon manigor usironKu halahi sude. Sugari songon i Hubaen, tontu gabe tarulang do tano i, jana angka binatang panyoro noma na marroha-roha.

³⁰ Mardeba-deba do usironKu halahi, lopus tuk bahatmunu laho mamasuhi tano i.

³¹ Hupabidang pe batas ni tanomunu mamungka sian Solok Akaba lalu tu Batang aek Efrat jana sian Laut Tonga lopus tu halongonan parhorsihan. Hulehen pe kuaso di hamu maradopkon halak luat i humani di na maju hamu mangarampas tano i, paorotonmunu ma halak na manginganisa.

³² Ulang baen hamu partahian sanga aha pe dohot halak i sanga dohot angka debata ni halahi.

³³ Ulang padiar-diar hamu halahi mangingan-ingani luatmunu i; harana anggo dipadiar hamu do halahi disi, gabe mardosai do hamu baenon ni halahi. Muda disomba hamu angka debata ni halahi, madabu do hamu tu tirangkap ni hamatean.”