HARURUAR 22 - BIBEL JAMITA NA DENGGAN

Aturan ni na mandangdangi

¹ “Sanga ise na manangko lombu sanga biri-biri dung i disambol sanga digadis ia, angkon gararonnia ma lima lombu gonti ni lombu na sada i, jana opat biri-biri gonti ni biri-biri na sada i.

^2-4 Angkon gontionnia do barang na nitangkona i. Muda nada adong artania, angkon nigadis ia songon hatoban, baen gonti ni na nitangkonia i. Muda lombu, sanga halode sanga biri-biri umpamana na nitangkonia i, tardapot di halak na manangko i laing mangolu, angkon gontionnia do i dua noli lompit. Muda adong tardapot sada panangko di sada bagas borngin-borngin, gabe dibunu, nada marsala halak na mambuat hosana i hara ni na mamunu ia. Tapi anggo arian do i tarjadi, parsala do halak na mamunu panangko i.

⁵ Sanga ise na padiarkon pahan-pahananna manjampal di ladang sanga kobun anggur, jadi malua pahan-pahanan i rarat manjampali suan-suanan ni halak na asing, angkon gararan ni nampuna pahan-pahanan i do dangdangna sian suha ni ladangnia sanga kobun anggurnia sandiri.

⁶ Sanga ise na marapi di ladangnia sandiri, hape rarat api i sian ri i lalu tu ladang ni halak na asing gabe gor sude eme na tubu disi sanga eme na baru disabi, angkon gararan ni na mambaen api i do dangdangna.

⁷ Sanga ise na pasimpankon hepeng sanga barang sigodang arga tu donganna, hape ro panangko mambuat barang i sian bagasnia; jadi muda tardapot, angkon gararan ni panangko i dua noli lompit.

⁸ Tapi anggo so tarboto do sanga ise na manangko i, angkon obanon ma halak na manyimpan angka barang sigodang arga i tu inganan paribadatan, jana angkon disumpahon ia disi paboa na so ia manangko barang na nipasimpankon i disia.

⁹ Ganop adong parsalisian taringot tu parnampunaan, sanga pe i taringot tu lombu, halode, biri-biri, pakean sanga barang-barang aha sajo pe na mago, angkon nioban do dua-dua, halak na mandok dirina nampuna barang-barang i tu inganan paribadatan. Sanga ise na nidok ni Debata parsala, angkon manggarar dua lompit bahatna tu na sada nari i.

¹⁰ Sanga ise na papahankon tu donganna sada halode, lombu, biri-biri sanga pahan-pahanan ni halak na asing, hape gabe mate pahan-pahanan i, sanga mabugang, sanga dioban halak pangarampas na ro mangaroro, hape nada adong sanga ise saksina.

¹¹ Muda songon i pangalahona angkon kehe ia tu inganan paribadatan laho marsumpa mandok na so ia manangko pahan-pahanan na nipapahankon i tusia. Muda tutu do na so ditangko sanga ise pahan-pahanan i, nampuna i ma na mananggung harugian, jana nada pola manggarar bagi aha na marmahan i.

¹² Tapi muda na hona tangko do pahan-pahanan i, angkon dangdangan ni na marmahan i do i tu nampunasa i.

¹³ Muda na hona soro ni binatang panyoro do pahan-pahanan i, angkon patidahonon ni na marmahankon i do teba-tebana i tu nampunasa i songon buktina; nada pola porlu gararannia dangdang ni pahan-pahanan na nisoro ni binatang panyoro i.

¹⁴ Muda adong sada halak na manginjam pahan-pahanan sian halak na asing, gabe mabugang sanga mate pahan-pahanan i dompak so disi nampunasa i, angkon dangdangan ni na manginjam i do i.

¹⁵ Tapi muda topet do disi antong nampuna i, nada pola gararan ni na manginjam i dangdangna. Muda pahan-pahanan siongkosan do pahan-pahanan i, ongkosna i ma manutup harugian.”

Aturan taringot tu hapantunon dohot ibadat

¹⁶ “Sanga ise na mamaksa marcampur tu sada bujing-bujing na so martunangan dope, angkon digarari ia serena tu habujingonna i jana angkon pakeonnia anak boru i gabe ripenia.

¹⁷ Tapi muda nada diisinkon amang ni bujing-bujing i buaton ni bayo i borunia i, angkon gararan ni bayo i do tu amang ni anak boru i sabahat ni sere boli ni sada bujing-bujing.

¹⁸ Ganop dadaboru na mambaen aji angkon bunuon.

¹⁹ Ganop na marcampur dohot binatang, angkon bunuon.

²⁰ Sanga ise na pasahat haul sanga tu debata dia pe i asing sian Au Tuhan, angkon mate niuhuman.

²¹ Ulang niparkancitan sanga nisosak halak na asing; ingot hamu ma, hamu pe halak na asing do najolo di Mesir.

²² Ulang nibaen roha-roha tu na mabalu sanga tu na tinggal menek.

²³ Muda dibaen hamu songon i, Au do Tuhan, Au sandiri ma mangalusi halahi muda pio-pio mangido tolong tu Au.

²⁴ MuruhanKu do hamu jana bunuonKu di porang. Mabalu ma daborumi jana nada marama be angka dakdanakmi.

²⁵ Muda painjamkon hepeng hamu tu halak na pogos sian dongan sabangsomunu, ulang baen hamu songon partunggu ni parsingir na manuntut bunga ni hepeng i.

²⁶ Muda dibuat hamu mantel ni halak songon jaminan ni utangna, angkon paulahonmunu do mantelna i painte so sundut mataniari,

²⁷ harana hum pakean na sada i noma sialitkononnia anso las pamatangnia. Aha dope he pakeonnia mangulosi pamatangnia modom? Muda pio-pio ia tu Au mangido tolong, alusanKu ma ia hara ni ibo ni rohangKu.

²⁸ Ulang burai hamu Debata jana ulang pasumpahon pamimpin ni bangsomu.

²⁹ Haulkon ma tu Au deba sian suha ni ememu, sian aek ni anggurmu, sian miak ni zetunmu muda mandapot hasil hamu. Pasahat ma tu Au angka dakdanakmunu siangkaan.

³⁰ Lehen ma di Au na parjolo sorang sian pahan-pahananmunu dohot sian biri-birimunu. Padiar hamu ma laing rap dohot inangna pahan-pahanan jantan na parjolo sorang rap dohot indukna i, pitu ari lolotna, jadi pasahat hamu ma i tu Au gabe haul di ari pasalapankon.

³¹ Angkon badia do hamu di jolongKu, jadi ulang pangan hamu juhut ni binatang bagi aha pe na nisoro ni binatang panyoro, tapi tu anjing ma lehen hamu juhutna i.”