HARURUAR 20 - BIBEL JAMITA NA DENGGAN

Tona na sampulu

¹ Dung i didok Debata ma songon on,

² “Au do Tuhan Debatamu, na maroban ho ruar sian tano Mesir, sian tano parhatobanan i.

³ Ulang adong di ho debata na asing di jolongKu.

⁴ Ulang baen di ho patung na manyarupai sanga aha pe na adong di langit di ginjang sanga na adong di tano on bope na adong di aek na di toru ni tano.

⁵ Ulang unduk marsomba tusia sanga maribadat tusia, angke Au, Tuhan, Debatamu, i ma Debata na so ra padiarkon adong imbangKu. UhumanKu do sanga ise na margoyak ni roha di Au lopus tu sundut patoluhon dohot paopatkon.

⁶ Tapi patidahononKu do holong ni rohangKu maradopkon marribu-ribu halak; i ma na mangkaholongi Au jana na mangoloi parentangKu.

⁷ Ulang dokkon goar ni Tuhan Debatamu, di na so dalanna, dibaen uhumon ni Tuhan do halak na mandok goarNia di na so dalanna.

⁸ Ingot ma Ari Sabat, anso diparbadiai ho ari i.

⁹ Onom ari ma lolotmu mangkarejohon sude karejomu,

¹⁰ tapi ari papituhon, i ma Ari Sabat ni Tuhan, Debatamu. Nada jadi mangkarejohon nasa karejo di na sadari i, bope ho, bope anakmu, bope borumu, bope naposomu halaklahi, bope naposomu dadaboru, bope pahan-pahananmu, bope halak na mardagang di hutamu.

¹¹ Dibaen di bagasan onom ari do lolotna ditompa Tuhan langit dohot tano, laut dohot nasa isina, jana maradian do Ia di ari papituhon i. Hara ni i ma dibaen dipasupasu Tuhan Ari Sabat i jana diparbadiai.

¹² Pasangap ma amangmu dohot inangmu, anso ginjang umurmu di tano na nilehen ni Tuhan Debatamu di ho.

¹³ Ulang mamunu.

¹⁴ Ulang markarosuan.

¹⁵ Ulang manangko.

¹⁶ Ulang gabe saksi pargabus maradopkon dongan.

¹⁷ Ulang impol rohamu di bagas ni donganmu jolma; ulang impol rohamu di dadaborunia, bope naposona bope lombuna bope halodena, bope di sanga aha nampuna ni donganmu jolma.”

Mabiar halak Israel

¹⁸ Disi dibege angka jolma i ronggur dohot sora ni sarune i jana diida halahi dohot hilap bope dolok na martimus i, humitir ma halahi mabiar jana mandao ma halahi jongjong.

¹⁹ Didok halahi ma tu si Musa, “Ho sajo ma mandok hata tu hami, hami bege pe; tapi ulang ma Debata na mandok hata tu hami, naron gabe mate hami.”

²⁰ Didok si Musa ma, “Ulang mabiar hamu, na giot mancubo rohamunu sajo do dibaen na ro Debata, anso tongtong mangoloi hamu tuSia jana ulang mardosa hamu.”

²¹ Tapi anggo angka jolma i laing mandao-dao do jongjong, jana hum sasada si Musa sajo do na mandonohi ombun na golap i di inganan parmianan ni Debata.

Aturan taringot tu langgatan

²² Diparentahon Tuhan ma tu si Musa anso dipaboa ia tu bangso Israel, “Madung diida hamu sanga songon dia, Au Tuhan, Au na mandok hata tu hamu sian banua ginjang.

²³ Ulang baen-baen hamu angka debata di hamu sian perak sanga sere gabe sisombaonmunu tamba ni Au.

²⁴ Baen hamu ma di Au sada langgatan sian tano jana pasahat hamu ma tu Au biri-biri dohot pahan-pahananmunu gabe haul situtungon dohot haul haluaan. Di ganop inganan paribadatanmunu tu Au na dung Hutontuhon, tusi ma Au ro mandapotkon hamu jana disi ma Hupasupasu hamu.

²⁵ Muda sian batu do baenonmunu langgatan di Au, ulang ma baen hamu batu na dituhil, harana anggo dipake hamu do tuhil laho mambola batu i, nada patut be pakeon di Au langgatan i.

²⁶ Ulang baen hamu langgatan na gincat na jabat martangga laho manaeksa, anso ulang haidaan goar-goaran ni pamatangmu na pantang idaon.”