HARURUAR 2 - BIBEL JAMITA NA DENGGAN

Hasosorang ni si Musa

¹ Di hatiha i adong ma sada halaklahi sian Marga Levi, mambuat boru laing sian Marga Levi.

² Dung i ditubuhon dadaboru i ma sada anak halaklahi. Dung diida ia jeges ni rupa ni dakdanak i, dibunihon ia ma dakdanak i tolu bulan honokna.

³ Dung mur lolot nada tarbunihon ia be. Gabe dibuat ia ma karanjang na nibayu sian galoga, dilapis ia ma i dohot ter anso tahan tu aek. Dipamasuk ia ma dakdanak i tu bagasan karanjang i, lalu dioban tu batang aek, jana dipayakkon ia ma tu galoga na di topi ni batang aek i.

⁴ Jongjong ma iboto ni dakdanak i tar dumao sian inganan i laho mangaligi-ligi sanga aha na masa tu angginia i.

⁵ Dung i ro ma boru ni raja ni Mesir, mijur tu batang aek i giot maridi jana mardalan-dalani ma pandonganina i ditopi ni aek i. Jadi ompot ma diida boru ni raja i karanjang i ditonga-tonga ni galoga i, gabe disuru ia ma sahalak hatobannia dadaboru mambuatsa.

⁶ Dung dibuka boru ni raja i karanjang i, diida ia ma sada dakdanak di bagasan. Tangis do dakdanak i, gabe ibo ma roha ni boru ni raja i, lalu didok ia, “Anak ni halak Ibrani do on.”

⁷ Dung i ro ma angkang ni dakdanak i lalu marsapa tu boru ni raja i, “Diloas boru ni raja i dehe au manjalahi sada ina ni halak Ibrani laho pataguk dakdanak on?”

⁸ “Denggan,” ninna boru ni raja i. Dung i kehe ma bujing-bujing i mangalap inang ni dakdanak i.

⁹ Didok boru ni raja i ma tu ina i, “Oban ma dakdanak on, pataguk ma ia anso di au, dung i hugarar pe di ho.” Jadi dioban ina i ma dakdanak i anso dipataguk ia.

¹⁰ Dung tuk godang ni dakdanak i, dilehen inangna i ma dakdanak i tu boru ni raja i. Gabe dibaen boru ni raja i ma dakdanak i anak angkatnia. “Hubaen ma goarnia si Musa, angke na hubuat sian aek do ia antong,” ninna boru ni raja i di bagasan rohana.

Si Musa lintun tu Midian

¹¹ Dung magodang si Musa, saulak kehe ma ia mangaligi-ligi bangsonia i sandiri, i ma halak Ibrani. Gabe diida ia ma sanga songon dia halahi markarejo paksa borat situtu. Diida ia muse ma sada halak Mesir mamukul halak Ibrani, sahalak sian bangsonia sandiri.

¹² Diligi si Musa humaliangnia, jana di na niidania na so adong pola mamparrohahon ia, dibunu ia ma halak Mesir i, jana dibunihon ia bangkena tu bagasan horsik i.

¹³ Ancogotna i ro muse ma si Musa, diida ia ma dua halak Ibrani topet marbadai. “Biasi dipukul ho dongan sabangsomu?” ninna si Musa tu halak na marsala i.

¹⁴ Dialusi halakna i ma, “Ise he mangangkat ho gabe pamimpin dohot hakim di hami? Adong he giot bunuonmu muse au, songon halak Mesir na nibunumi?” Gabe mabiar ma si Musa, ninna rohania, “Ah, madung diboto halak hape parkaro on.”

^15-16 Dung tarbege tu raja na masa i, dijalahi ia ma dalan laho mamunu si Musa. Gabe lintun ma si Musa jana maringanan di Luat Midian ma ia. Malim sian Midian margoar si Jetro, pitu do borunia. Di na sadari, hatiha juguk si Musa di lambung ni sada sumur, ro ma bujing-bujing na pitu i; giot manimba aek mangisi panginuman ni habanan ni hambeng dohot biri-biri ni amang ni halahi.

¹⁷ Hape ro ma angka parmahan pakehe angka dadaboru i. Gabe ro ma si Musa mangurupi bujing-bujing i mangalehen minum angka pahan-pahanan ni halahi.

¹⁸ Dung mulak halahi disapai amang ni halahi ma, “Biasi sigop hamu mulak sadari on?”

¹⁹ Dialusi halahi ma, “Adong sada halak Mesir na mangurupi hami. Ia do manimba aek i, jana mangalehen minum angka pahan-pahananta i.”

²⁰ “Di dia do ia saonnari?” ninna si Jetro tu angka borunia i, “Biasi ditinggalkon hamu ia disi? Kehe ma hamu marpio ia anso mangan ia rap dohot hita.”

²¹ Dipasada si Musa do rohania maringanan disi. Dung i dilehen si Jetro ma borunia si Zipora di si Musa gabe dadaborunia.

²² Dung i ditubuhon si Zipora ma sada anak halaklahi. Dibaen ma goar ni dakdanak i si Gersom, angke ninna roha ni si Musa di bagasan, “Halak na leban do au dison.”

²³ Dung sanga piga-piga taon honokna, raja Mesir i pe mate ma. Tapi anggo halak Israel tongtong do marhoi-hoi hara ni na diparhatoban, pola tehe gogo sora ni halahi mangido tolong. Lalu ma angguk-angguk ni halahi tu Debata.

²⁴ Dibege Debata do angguk-angguk ni halahi, jana diingot Ia do janjiNa tu si Abraham, si Ishak dohot si Jakob.

²⁵ Diida Ia do halak Israel diparhatoban, gabe diparate-atehon Ia ma bagian ni halahi.