HARURUAR 19 - BIBEL JAMITA NA DENGGAN

Halak Israel di Dolok Sinai

^1-2 Dung i kehe ma bangso Israel manadingkon Rafidim jana di tanggal sada bulan patoluhon dung kehe halahi sian Mesir, lalu ma halahi di Parhorsihan Sinai. Jana dibaen halahi ma bandar di pat ni Dolok Sinai,

³ tapi anggo si Musa kehe ma ia manangkok tu dolok i laho marsuo dohot Debata. Pio-pio ma Tuhan sian dolok i tu si Musa jana disuru paboa ia ma tu halak Israel, pomparan ni si Jakob i:

⁴ “Madung diida hamu sanga aha Na Hubaen, Au Tuhan mambaensa maradopkon halak Mesir, jana sanga songon dia Hubaen maroban hamu tu Au di inganan on mardongan kuaso na godang songon unggas rajawali na maroban anakna di ginjang ni habongna.

⁵ Saonnari, muda ra do hamu mangoloi na Hudok jana ingot rohamunu tu parjanjianKu, baenonKu ma hamu gabe bangso, hapunjunganKu sandiri. Au do nian nampuna tano on sudena,

⁶ tapi hamu ma na gabe songon malim na mangoloi Raja i, bangso na badia. On do angka hata sidohononmu tu angka halak Israel.”

⁷ Jadi manuat ma si Musa jana dipiohon ia ma angka pamimpin ni bangso i marlagut laho paboahon tu halahi sandok na niparentahon ni Tuhan i tusia.

⁸ Jadi rap mangalusi ma sude bangso i, “Patulusonnami ma sude na nidok ni Tuhan i,” ning halahi mangalusi. Jana dipalalu si Musa ma alus on tu Tuhan.

⁹ Didokkon Tuhan ma tu si Musa, “Ro ma Au mandapotkon ho di bagasan ombun na hapal, anso dibege angka jolma i mandok hata Au tu ho, jana mamungka sian on, porsaya noma halahi tu ho.” Laing dipalalu si Musa muse ma antong alus ni bangso i,

¹⁰ jana didok Tuhan ma tusia, “Kehe ma ho manopotkon halahi jana suru ma halahi marhobas sadari on dohot ancogot laho maribadat. Angkon basuon ni halahi do pakeanna be.

¹¹ Haduan, angkon hobas ma halahi sude. Di ari i ma Au mijur di ginjang ni Dolok Sinai, anso disi tarbaen halahi sude marnida Au.

¹² Baen ma batasna humaliang pat ni dolok on, tanda ni na so tola boluson ni bangso i. Baen ma larangan tu bangso i na so tola halahi manangkok tu dolok on, salang padonok-donokkon pe ulang. Sanga ise na manyalpui batas i, nimatehon do.

¹³ Angkon nidangguran do halakna i dohot batu sanga nisior, sahalak pe nada tola manjamasa. Tu jolma dohot tu pahan-pahanan do na nidok on, angkon nimatehon sude. Dung dipalu sarune, baru pe anso tola bangso i manangkok tu dolok.”

¹⁴ Dung i manuat ma si Musa sian dolok i, jana ditonahon ia ma tu bangso i anso marhobas laho maribadat. Marsibasu pakeanna ma halahi.

¹⁵ Jana didok si Musa ma tu halahi, “Angkon hobas do hamu haduan jana ulang hamu marcampur sahatiha on.”

¹⁶ Di ari patoluhon, ro ma ronggur dohot hilap. Tarida ma ombun na hapal di ginjang ni dolok i jana habegean ma sora ni sarune na lobi gogo. Humitir ma sude halak na di bandar hara ni biarna.

¹⁷ Dioban si Musa ma halahi ruar sian bandar i anso marsuo dohot Debata; jadi marjongjongan ma halahi di pat ni dolokna i.

¹⁸ Ditutupi timus ma sudena Dolok Sinai i, angke madung mijur Tuhan tu ginjangna i songon api tompana. Martimbual ma timus idaon songon timus sian tataring, jana humutur ma dolok i gogo sajo.

¹⁹ Mur manggogo muse ma sora ni sarune i. Mandok hata ma si Musa, jana dialusi Debata ma dohot ronggur.

²⁰ Mijur ma Tuhan di ambubu ni Dolok Sinai i jana dipiohon Ia ma si Musa anso ro tu puncut ni dolok i. Manangkok ma antong si Musa

²¹ jana didok Tuhan ma tusia, “Manuat ma ho paingotkon bangso i bahaso na so tola halahi manyalpui batas i giot ro tuson laho mangaligi Au. Muda laing dilanggar halahi do antong, bahat do sian halahi marmatean.

²² Salang angka malim na giot mandonohi Au pe, angkon paiasonna do dirina; anggo nada songon i, hona uhum do halahi.”

²³ Ning si Musa ma tu Tuhan, “Nanggo tarbaen bangso i be da manangkok, harana madung diparentahon Ho tu hami, anso hami etong on songon dolok na badia, jana nibaen batasna humaliang.”

²⁴ Dialusi Tuhan ma, “Manuat ma ho, jana ulahi ro tuson rap dohot si Harun. Tapi anggo angka malim dohot rayat i sudena, nada tola salpuanna batas i anso ro tu Au. Muda dilanggar halahi batas i, niuhuman ma halahi.”

²⁵ Jadi manuat ma si Musa mandapotkon bangso i jana dipalalu ia ma na nitonahon ni Tuhan i tu halahi.